ხსოვნა

gurianews.com

ხსოვნა

ხსოვნა

2018 მარ 8 21:37:58

სულიკო ლომჯარიას მოსაგონარი

სულიკო ლომჯარია ოზურგეთის მუნიციპალიტეტის სოფელ ჭანიეთში დაიბადა და გაიზარდა.   მშობლიური სოფლისა და ქვეყნის შეუდარებელი  ჭირისუფალს გარდაცვალების მეორმოცე დღეს ვიგონებთ და თავს ვხრით მისი ხსოვნის  წინაშე.

სულიკო ლომჯარია ეს იყო  დიდბუნებოვანი ქალბატონი,  უღალატო მეგობარი, ჭეშმარიტი, მორწმუნე, მოყვასი, ბუნებით ერთგული, სულით პოეტი, გონიერი და უაღრესად ნიჭიერი შემოქმედი _ მუდამ ძიებაში მყოფი ქალბატონი.   ის არასოდეს  მოხიბლულა საკუთარი თავით, იდეებით არასოდეს უვაჭრია, იდეებით მხოლოდ  იბრძოდა  და უანგაროდ, უხმაუროდ ემსახურებოდა    თავის საყვარელ საქმეს. ხალხური რეწვის ოსტატის წოდება მრავალი წლის წინ მიენიჭა, მისი ნამუშევრები უზადო შემოქმედების ნიმუშია.

სულიკო ლომჯარიას ნათელი ცხოვრება იყო მაგალითი იმის, თუ როგორ უნდა გიყვარდეს შენი სოფელი, მშობლიური მიწა-წყალი. მან უიშვიათესი მაგალითი მისცა ყველა თაობის წარმომადგენელს, როცა დედაქალაქიდან სოფელში დაბრუნდა  საცხოვრებლად და დაწერა ძალზე საინტერესო წიგნი: „ჩემო სოფელო“. ეს წიგნი თითოეული ჩვენგანისთვის სამაგიდო წიგნად იქცა და სამარადჟამოდ უკვდავყო როგორც სოფლის ისტორია, სულიკო ლომჯარიას სახელი.

უკვე ხანდაზმულმა და ჯანმრთელობაშერყეულმა  ადამიანმა რამდენი შრომა, ჯაფა და ენერგია ჩადო ამ საშვილიშვილო საქმეში. კარდაკარ დადიოდა, ხვდებოდა უამრავ ადამიანს, ესაუბრებოდა, აგროვებდა ისტორიულ მასალებს და შემდეგ წიგნად კინძავდა. დროს ეჯიბრებოდა, ჩქარობდა, უნდოდა, მეორე წიგნიც მოესწრო სოფელ ჭანიეთის  სასაფლაოს შესახებ. შეუპოვარი შრომით ეს მიზანიც წარმატებით აღასრულა.

აფერუმ შენს ქალობას. უღრმესი მადლობა ყოველივე ამისთვის. იმედია, უფლის ნებით ამ წიგნსაც მალე ვიხილავთ შენით  თანასოფლელები. დღეს კი მთელი სოფლის სახელით, გვინდა ბოდიში მოგიხადოთ  იმისთვის,  რომ სიცოცხლეში  სათანადოდ ვერ მოგეფერეთ, ვერ გაგახარეთ, ვერ შევაფასეთ შენი განუმეორებელი და შეუდარებელი ღვაწლი სოფლის წინაშე.

ღმერთმა ნათელში  ამყოფოს შენი ლამაზი სული,  შენი სამაგალითო ოჯახისა და საყვარელი სოფლის წინაშე,  სამშობლოს  წინაშე პირნათლად ვალმოხდილო დიდო ჭირისუფალო, ჩვენო ძვირფასო სულიკო!

სოფელ ჭანიეთის საზოგადოება
14.03.2019





არქივი