"იმდენად ბევრი აბსურდული კითხვებია, არ შეიძლება, ანგარიშვალდებული ვიყო, პასუხი გავცე"

მთავარი თემა

"იმდენად ბევრი აბსურდული კითხვებია, არ შეიძლება, ანგარიშვალდებული ვიყო, პასუხი გავცე"

18 ივლ. 2013, 18:12:15

გოჩა ჭანტურია უკვე მეშვიდე თვეა ამ თანამდებობაზეა და ყველა ელოდება საკრებულოს სხდომაზე გამგებლის სიტყვით გამოსვლას და 6 თვის მუშაობის შედეგების მიმოხილვას.

შემოსული წერილები შინაარსით ერთნაირია, ზოგი კოლექტიურია, ზოგს ინდივიდუალური ხელმომწერი ჰყავს. რედაქციამ დღესაც მიიღო წერილი ანჟელა ტყებუჩავასგან, რომელიც ამჟამად თურქეთში იმყოფება და როგორც თვითონ ამბობს, სიშორის მიუხედავად, აქტიურად ადევნებს თვალს რაიონში მიმდინარე მოვლენებს. წერილს საკმაოდ ვრცელია, ამიტომ შემოკლებით გთავაზობთ.

"აბაშის მუნიციპალიტეტის გამგებელს საერთოდ გაწყვეტილი აქვს კავშირი ხალხთან. მისი სამუშაო დღე შემოიფარგლება საცხოვრებელი სახლიდან სამუშაო ადგილზე მისვლით და თვის ბოლოს ბანკომატთან სახელფასო სარგოს აღებით.

გოჩა ჭანტურიას არჩევის დღიდან 7 თვე გავიდა. სრული პასუხისმგებლობით ვაცხადებ, რომ რაიონის 15 თემიდან არც ერთის მოსახლეობასთან გაცნობითი შეხვედრა არ ჰქონია. მეტიც, პირადად ვნახე სოფლებში ადამიანები, რომლებსაც გამგებელი ჯერ კიდევ გურამ გუნავა ჰგონიათ.

მეც და ძალიან ბევრი აბაშელი პირადად ვართ მოწმე, როგორი რიხით ელაპარაკება მასთან მისულ ადამიანს გამგებელი და ეუბნება, რომ ის ზემოდანაა დანიშნული და უპატრონო არ არის. ადრე ხვედელიძეს ასახელებდა მის "კრიშად", ხვედელიძის გათავისუფლების მერე კი ამბობს, რომ იზორია და ტაბატაძე არიან მისი ლობისტები და ვერავინ ვერაფერს დააკლებს.

გოჩა ჭანტურიას მხრიდან არანაირი დაინტერესება მოსახლეობის სოციალური პირობების გაუმჯობესების საქმეში არ ყოფილა. მთხოვნელებთან აშკარად აცხადებს, რომ არანაირი დაინტერესება არ არსებობს ცენტრალური ხელისუფლებისგან, უმეტეს შემთხვევაში, უარს ამბობს მოსახლეობასთან შეხვედრაზე. ვიცი ისეთი ფაქტებიც, როცა კატეგორიული მოთხოვნის შემთხვევაში იბარებს შესაბამისი თემის რწმუნებულს და კატეგორიულად აფრთხილებს, რომ ამ თემის მოქალაქეების განმეორებითი პრეტენზიების შემთხვევაში დაითხოვს რწმუნებულს, ისევ შანტაჟის ძალით ცდილობს სოფლებში მოჩვენებითი სიმშვიდის შენარჩუნებას.

გამგებლისთვის საერთოდ უცნობია სკოლამდელი და სასკოლო განათლების სფერო. ამ 7 თვის მანძილზე არც სკოლების დირექტორებს და არც ბაღების გამგეებს არ შეხვედრია, არ მოუსმენია მათი პრობლემები. ამბობს, რომ ეს საკრებულოს კომპეტენციაა. გამგებელი ვერ გარკვეულა იმაში, რომ იგი აღმასრულებელი ხელისუფლების წარმომადგენელია. თუ რომელიმე სკოლის დირექტორი რაიმე პრობლემით მიმართავს, გამგებელი მოკლედ პასუხობს _ მიმართეთ ცენტრალურ ხელისუფლებას, რითიც ცდილობს ხალხის უკმაყოფილების გაღვივებას ახალი მთავრობის მიმართ.

რაიონში არ არსებობს არანაირი დასაქმების პროგრამა. დასაქმების თხოვნით მისული ახალგაზრდები პასუხად იღებენ: "მიმართეთ ცენტრალურ ხელისუფლებას და მოითხოვეთ წინასაარჩევნო დანაპირები აასრულონ".

შერჩევითი დამოკიდებულება აქვს რაიონში მიმდინარე კულტურულ, სპორტულ თუ საქველმოქმედო ღონისძიებებთან; არ ითვალისწინებს სოფლის ახალგაზრდების თხოვნას სპორტული მოედნების მოწყობაზე. ამბობს, რომ არც ეს არის მისი კომპეტენცია. არც კი დაინტერესებულა სასოფლო-სამეურნეო სამუშაოების მიმდინარეობით და როცა აღელვებული მოსახლეობა რაიმე საკითხზე ურეკავდა, გამგებელი პასუხობდა, რომ ეს მის კომპეტენციაში არ შედიოდა და შესაბამისი სამსახურებისთვის მიემართათ.

აღსანიშნავია, რომ სასამართლო პროცესები გამგებლის დანიშვნასთან დაკავშირებით ჯერ კიდევ არ არის დამთავრებული.

დაიღალა ხალი ამდენი უსამართლობით, უყურადღებობით და ელოდება ცენტრალური ხელისუფლება როდის დაინტერესდება უნიათო გამგებლის საქმიანობით," _ წერს ანჟელა ტყებუჩავა.

ჩვენ გადავწყვიტეთ, შემოსული წერილებიდან ამოგვეკრიფა კითხვები და გამგებლამდე მიგვეტანა.

გამგებელი თავის სამუშაო კაბინეტში დაგვხვდა.

_ ბოლო ერთი კვირის მანძილზე უკვე მეხუთე განცხადება შემოვიდა მოსახლეობისგან, სადაც თქვენს მიმართ უამრავი კითხვაა დასმული და ამავე დროს ბევრი ისეთი საკითხია დაყენებული, რომელზე კომენტარის გაკეთება მხოლოდ თქვენ შეგიძლიათ. თუმცა, თქვენი გადასაწყვეტია, გასცემთ კითხვებზე პასუხს თუ არა. ჩვენ ორივე შემთხვევაში ვალდებული ვართ, მკითხველს სიმართლე მივაწოდოთ. თუმცა, მანამდე მინდა გითხრათ, რომ ძალიან გამიკვირდა შეხვედრაზე რომ დამთანხმდით, რადგან ყოველთვის უარს ამბობთ ინტერვიუზე და გაგახსენებთ თქვენს სიტყვებს _ "ინტერვიუები დავამთავრე!"

_ კი, ნამდვილად ასე იყო. ინტერვიუებზე უარს ვაცხადებდი იმიტომ, რომ ჩემზე დაკისრებულ საქმეს ვასრულებდი, მენდო მთავრობა და მეც ყველაფერს ვაკეთებ, რომ მისი ნდობა გავამართლო. ეს არის ჩემი მოვალეობა, არ მჭირდება პიარ-კამპანია და აფიშირება. თან ბევრჯერ ყოფილა ისეთი შემთხვევა, რომ რაღაც კითხვაზე გამიცია პასუხი ისე, როგორც სინამდვილეში არის, მაგრამ გაუშუქებიათ სულ სხვანაირად. ისე დაჭრიან და შეცვლიან ინტერვიუს, რომ საერთოდ ახლოს არ არის ჩემს ნათქვამთან.

_ არ ვიცი, ვის გულისხმობთ, მაგრამ ჩვენ ეს ნამდვილად არ გვეხება. მხოლოდ ერთხელ ჩავწერეთ თქვენთან ინტერვიუ და ყოველგვარი მოჭრისა და მონტაჟის გარეშე მივაწოდეთ საზოგადოებას.

_ ვისაც ეხება, ამ ნათქვამის შემდეგ, ალბათ, თვითონაც მიხვდებიან. მხოლოდ ეს არის და სხვა არაფერი. არ მინდა იფიქროთ, რომ ან თავს ვარიდებ კითხვებს, ან პასუხი არ მაქვს, უბრალოდ, აფიშირება საქმეს არ სჭირდება. რაც შეეხება დღევანდელ ჩვენს საუბარს, ჯერ ის მითხარით, რა საკითხებზეა საუბარი.

_ შემოსული წერილებიდან ამოვარჩიეთ ის ძირითადი თემები, რომლებიც განსაკუთრებით აინტერესებს საზოგადოებას. კიდევ გიმეორებთ, ეს ხალხის კითხვებია _ უკვე მე-7 თვეა, რაც გამგებლის თანამდებობაზე ხართ და აპირებთ თუ არა საკრებულოსა და ხალხის წინაშე გაწეული სამუშაოების შესახებ მოხსენების გაკეთებას, რატომ არ ხვდებით ხალხს, რატომ ამბობთ ყოველ საკითხზე, რომ ეს არ შედის თქვენს კომპეტენციაში, რატომ პასუხობს გამგებელი მასთან მისულ პიროვნებებს, მიმართონ ცენტრალურ ხელისუფლებას და მათ მოსთხოვონ წინასაარჩევნო დაპირებების შესრულება, რატომ ამბობს გამგებელი, რომ მას ხვედელიძე, შემდეგ კი იზორია და ტაბატაძე ლობირებენ და რატომ ჰგონია, რომ ხელშეუხებელია, რატომ ხუჭავს თვალს რაიონში გამეფებულ ნეპოტიზმზე და რატომ აქვს შერჩევითი დამოკიდებულება ხალხისადმი? ასევეა კითხვები იმ სასამართლო პროცესებზე, რომლებიც თქვენს წინააღმდეგ მიმდინარეობს.

_ ეს მოარული ხმები ყოველთვის იქნება საზოგადოებაში და არასდროს არ დამთავრდება. ეს ბუნებრივი პროცესებია. ასე რომ, მე ანგარიშვალდებული არ ვარ მოარულ ხმებზე, ან ჭორის დონეზე ვის რა კითხვა გაუჩნდება, მოხსენებები და ახსნა-განმარტება ვაკეთო. მიმდინარე პროცესები და შემდეგ უკვე შედეგები აჩვენებს პასუხებს საზოგადოებას ყველა იმ კითხვაზე, რაც მათ აინტერესებთ. ეს არის ყველა ამ კითხვაზე პასუხი. საქმე გამოაჩენს ყველაფერს და არა დაპირებები ან ის, რომ ვიღაცას რაღაცა ჰგონია. შემდგომში პროცესები ჩვეულებრივად წარიმართება, ყველა დაინახავს, რა რესურსი და რა შესაძლებლობები არსებობს, რა კეთდება და რა არ კეთდება. ყველა მშვენივრად ხედავს, რა პროცესები მიდის, რა საქმეები კეთდება, თუმცა, მეორე მხარეა ის, ვის როგორ უნდა დაინახოს, ზოგი თეთრზე ამბობს შავიაო და ზოგი კი თეთრს თეთრად ხედავს. ავი და კარგი ყოველთვის იყო, არის და იქნება. დღეისთვის ჩემი მთავარი ამოცანაა, რომ რაიონში ბევრი საკითხია გადასაწყვეტი და დროულად მოხდეს ამ საკითხების მოგვარება. ასე რომ, ჩემი პასუხი ამ კითხვებზე სწორედ ესაა _ დრო სჭირდება ყველაფერს და ყველა ყველაფერს დაინახავს. არ მინდა ისე გამოვიდეს, თითქოს კითხვებზე პასუხი არ არსებობს, მაგრამ იმდენად ბევრი აბსურდული კითხვებია, არ შეიძლება ანგარიშვალდებული ვიყო ამ კითხვებზე პასუხი გავცე.

_ გასაგებია, მაგრამ ხომ შეიძლება, რომ ამ "აბსურდულმა კითხვებმა" ძალიან ცუდი რეზონანსი გამოიწვიოს?

_ შეიძლება, მაგრამ ყველაფერს ორი მხარე აქვს _ ვისაც კარგის დანახვა უნდა და შეუძლია, ძალიან ბევრ კარგს დაინახავს, ვისაც ცუდის დანახვა უნდა და მიზეზებს ეძებს, ის ყოველთვის მოძებნის რაღაც მიზეზს ცუდის დასანახად. სწორედ ამიტომ არ არის ეს ისეთი დილემა, რომ ყველა გაჩენილ კითხვას პასუხი უნდა გაეცეს.

_ მაშინ მოდით ისეთ თემებზე ვისაუბროთ, რომელიც არ არის მოარული და ჭორის დონეზე დასმული. რა პროექტებზეა საუბარი?

_ წინა კვირას შევხვდი ჯანდაცვის მინისტრს. საუბრისას გამოიკვეთა აქცენტები, რომლებიც აღებულია სადაზღვევო კომპანიებზე, დაზღვევებზე, ბევრ ისეთ ახალ პროექტებზე, რომელიც ახლო მომავალში განხორციელებადი იქნება. მაგალითად იყო საუბარი იმ დასახლებული პუნქტში, რომელიც მოცილებულია ცენტრს, გაკეთდეს ახალი სამედიცინო ამბულატორია. იქნება ეს მხარდაჭერილი ცენტრალური ხელისუფლებისგან და ჩვენ ხელს შევუწყობთ. ჩვენი რაიონი ტრანსფერზეა დამოკიდებული და არ გვაქვს შესაძლებლობა, რომ ყველა ის პროექტი გავახორციელოთ, რომელიც მოსახლეობას სურს და ჩვენც გვინდა. ამიტომ საჭიროა მხარდაჭერა ხელისუფლებისგან, ჩვენ კი ჩვენი მხრიდან ყველაფერს გავაკეთებთ და მადლობა ღმერთს, რომ დღეს ხელისუფლებაში არსებობს ნება იმისა, რომ ისეთი პროექტები გახორციელდეს, რაც ჩვენს საზოგადოებას ყოფას შეუმსუბუქებს.

_ ძალიან ბევრი სტუდენტი გვეკითხება, იქნება თუ არა შესაძლებელი ზაფხულში სტაჟირება გამგეობაში, საკრებულოში, სხვადასხვა სამსახურებში?

_ ახლაც არის ერთი ადამიანი, ვინც გადის სტაჟირებას. თუ ამის რეალური საშუალება გამოინახება, მე პირადად მივესალმები, რომ ახალგაზრდებმა მიიღონ გამოცდილება, აიმაღლონ კვალიფიკაცია. კიდევ ვიმეორებ, თუ იქნება ამის შესაძლებლობა. მთელი რიგი პროექტებია, რომლებიც ელოდება დამტკიცებას, ჩამოყალიბებას და ამის მიხედვით დავიწყებთ ამ პროექტების ფუნქციონალურ შესრულებას.

_ ხალხი თქვენს უკონტაქტობას და არსებული პრობლემების მოგვარებაში მხარდაჭერის არარსებობას უჩივის.

_ არ ყოფილა ჯერ ისეთი შემთხვევა, რომ მოქალაქე აქ მოვიდა და ან არ მივიღე, ან იმედი გაუცრუვდა, ან ცრუ დაპირებით წავიდა. ვერიდებით ისეთ პრობლემებზე საუბარს, რომელიც დროშია გაწელილი _ როდესაც ადამიანს ეუბნები, რომ ეს იქნება რაღაც დროის შემდეგ, იმდენად იმედგაცრუებულია ხალხი, რომ დროზე საუბარი ასოცირდება ცრუ დაპირებასთან, რადგან მართლა გაწბილებული იყო მოსახლეობა ამ წლების განმავლობაში.

_ მაგრამ ხალხი ამბობს, რომ დარეკეს თქვენთან ხვნა-თესვასთან დაკავშირებული პრობლემის გამო და თქვენ უთხარით, რომ ეს პრობლემა არ გეხებათ.

_ ნამდვილად არ ვაპირებ, ვინმეს წინაშე თავი ვიმართლო. ამიტომ არ ვთვლი საჭიროდ ამ კითხვებზე პასუხი გავცე, გამგებელი არ არის ვალდებული, არჩიოს ვიღაცის მოსაზრებები. არსებობენ სპეციალური სამსახურები, შეუძლიათ ნებისმიერ ამ სამსახურს მიმართონ, ამომწურავი პასუხი მიიღონ ყველა კითხვაზე და იმ სამსახურებიდან მოითხოვონ რეაგირება, რომლებსაც ესა თუ ის საკითხი უშუალოდ ეხებათ. შეიძლება, ვიღაცას სჭირდება ასე გაავრცელოს ხმები, მაგრამ საქმე გამოაჩენს ყველაფერს, საქმეა ყველაზე უტყუარი დოკუმენტი.

_ 6 თვის შედეგებზე მოხსენებას გააკეთებთ?

_ საერთოდ გამგებელი წლის ბოლოს აკეთებს ასეთ მოხსენებას, თუმცა, სამსახურები ცვლიან ინფორმაციებს. დამალული ისედაც არაფერი არ არის _ რა პროექტები გახორციელდა, რა გახორციელდება მომავალში. ჩვენ სამინისტროებთან გვაქვს ხშირი კონტაქტი, რა ეტაპზეა ესა თუ ის სამუშაო თუ პროექტი, ინფორმაცია საიტებზეც დევს, ყველას შეუძლია უპრობლემოდ მოიპოვოს და იმ ფონზე, როცა ყველაფერი გამჭვირვალეა, რაღა მოხსენება და განცხადებებია საჭირო? ვისაც აინტერესებს, ყველაფერი თვალნათელია.

_ ხალხში ამბობს, გუნავას კაბინეტში ვერ შეიყვანდი და ჭანტურიას კაბინეტიდან ვერ გამოიყვანო.

_ ასეთ შედარებებს მე არ ვაკეთებ. ყველა ადამიანს თავისი ინდივიდუალური შეხედულება გააჩნია საკითხებზე. მთავარია, საქმე გაკეთდეს, კაბინეტში იქნები და იქ გააკეთებ თუ სხვაგან იქნები, მთავარია საქმე გაკეთდეს.

_ საჯარო მოხელეების ატესტაციის ჩატარებაზე რას იტყვით _ აქაც 1 იანვრამდე გადაიწია ჩატარების თარიღმა?

_ შევხედავთ და სიტუაცია როგორც განაპირობებს, იმის მიხედვით მივიღებთ ზომებს.

_ ბატონო გოჩა, ხალხი მართლა არ გიცნობთ?

_ საკუთარი აზრის გამოხატვის უფლება ყველას აქვს. სასარგებლო საქმის კეთება ნამდვილად შეიძლება ჩუმად, უხმაუროდ, ყოველგვარი აფიშირების გარეშე. რა საჭიროა იარო ხალხთან, ელაპარაკო, სამომავლო გეგმებზე, ისევ ნათელი ფერებით აუხვიო თვალები?! ჯობია, საქმე გააკეთო და შედეგების გასაცნობად ან ჩატარებული სამუშაოების შესაფასებლად მიხვიდე მათთან. ხალხი ხედავს, რა ჩიხშიც შეგვიყვანა ამდენმა დაპირებებმა, ტაშის კვრამ და წინასწარ გამარჯვებების ზეიმმა. ასე რომ, თუ ხშირად არ მივდივარ ხალხთან, ეს იმას არ ნიშნავს, რომ არ ვიცი მათი პრობლემების შესახებ. ზედმეტი პიარ-კამპანიები, თავის ქება და ტრაბახი კარგს არაფერს მოგვიტანს. გაივლის გარკვეული დრო და შესადარებელი მაინც იქნება _ ადრე ასე იყო, ახლა ასეა და რა იქნება მომავალში.

_ თქვენ ხართ პიროვნება, რომელსაც საკმაოდ ხმაურიანი განცხადებები უკავშირდება, პირველი დღიდან დღემდე სულ ყურადღების ცენტრშია.

_ ზოგი დადებითად მიყურებს, არც იმ მოარული ხმების მეშინია, რომელიც უარყოფით კონტექსტში განიხილავს ჩემს პიროვნებას. არც მომავლის მეშინია. მე ჩემი საქმე, სადაც ვიყავი, ყველგან მიკეთებია და მომავალშიც, სადაც ვიქნები, ყველგან მექნება პასუხისმგებლობა დაკისრებულ საქმესთან დაკავშირებით. არის ადამიანური პრინციპები, რასაც არსად ვუღალატებ _ გინდა საჯარო სამსახურში და გინდა მის გარეთ. მე დარწმუნებული ვარ, ეს ინტერესიც და ეს მოარული ხმებიც სულ იქნება _ მთავარია, დრო რა შედეგს დადებს.




 ახალი ამბები
  • გიორგი შაქარაშვილის დამამძიმებელ გარემოებაში განზრახ მკვლელობის ბრალდებით სისხლის სამართლის დევნა 5 პირის მიმართ დაიწყოგიორგი შაქარაშვილის დამამძიმებელ გარემოებაში განზრახ მკვლელობის ბრალდებით სისხლის სამართლის დევნა 5 პირის მიმართ დაიწყო. ამის შესახებ პროკურატურაში გამართულ ბრიფინგზე განაცხადეს. ცნობისთვის, დაბადების დღეზე სტუმრად წასულ 19 წლის ფეხბურთელს მაშველები მცხეთაში, რამდენიმე დღის განმავლობაში ეძებდნენ, ბოლოს კი არაგვში გარდაცვლილი ... ...
  • "თანხა წაღებულია, ხატებმა რა დაუშავეს, არ ვიცი"- კახეთში ეკლესია გაძარცვესგურჯაანის მუნიციპალიტეტის სოფელ ჩუმლაყში წმინდა გიორგის სახელობის ეკლესია გაძარცვეს და დაარბიეს. შემთხვევა გვიან ღამით მოხდა. ტაძრის სტიქაროსნის, უჩა ქემაშვილის თქმით, მძარცველები სავარაუდოდ ფანჯრიდან შევიდნენ. „მძარცველები სავარაუდოდ ფანჯრიდან შემოვიდნენ, რადგან ჩამტვრეულია, მრევლის მიერ შემოწირული და ასევე, გაყიდული სანთლების თანხა წაღებულია. ხატებმა რა დაუშავეს, არ ვიცი, დამტვრეულია დიდი ნაწილი“, _ ამბობს სტიქაროსანი. მომხდარ ფაქტთან დაკავშირებით მიმდინარეობს საგამოძიებო ... ...
  • თურნავა: გვაქვს რესურსი, რომ ვიზიტორები განვათავსოთ როგორც მესტიაში, ასევე დანარჩენ საქართველოშიეკონომიკისა და მდგრადი განვითარების მინისტრმა, ნათია თურნავამ მესტიის მუნიციპალიტეტში შექმნილი ვითარების შესახებ ისაუბრა. მინისტრის განცხადებით, ყველაფერი კეთდება, რომ ეპიდემიის აფეთქების ამ მორიგი კერის ლოკალიზება და გაუვნებელყოფა რაც შეიძლება სწრაფად, შედარებით უმტკივნეულოდ მოხდეს. „კორონავირუსი არსად გამქრალა და ეპიდემია არ დაგვიმარცხებია. ჩვენ ვისწავლეთ ეპიდემიის ეფექტური მართვა. მესტიაში უკვე შევარჩიეთ 20 სასტუმრო, აღვრიცხეთ ვიზიტორები და ყველაფერს ვაკეთებთ იმისთვის, რომ საკარანტინო სივრცეებში მათი გეგმაზომიერი გადაყვანა მოხდეს. საკარანტინო სივრცეები მოეწყო როგორც უშუალოდ მესტიის მუნიციპალიტეტში, ასევე დანარჩენ საქართველოშიც. გვაქვს ამისთვის საკმარისი რესურსი,“ - განაცხადა თურნავამ. თურნავას განცხადებით, უწყებათაშორისი საკოორდინაციო საბჭოს გადაწყვეტილებით ეკონომიკისა და მდგრადი განვითარების სამინისტროს სისტემაში შემავალი ტურიზმის ეროვნული ადმინისტრაცია საგანგებო მუშაობის რეჟიმშია გადასული. მასთან ერთად, პროცესში აქტიურადაა ჩართული მთის კურორტების განვითარების კომპანიაც. მინისტრმა აღნიშნა, რომ მნიშვნელოვანია იმ პროტოკოლების და წესების დაცვა, რაც ეპიდემიოლოგებმა მოამზადეს. საუბარია, სოციალური დისტანციაზე, პირბადის გამოყენებასა და სხვა უამრავ ... ...
  • ვახტანგ გომელაური - საერთაშორისო ორგანიზაციების ჩართულობით ყველაფერს ვაკეთებთ, ომს ვერ დავიწყებთშინაგან საქმეთა მინისტრმა, ვახტანგ გომელაურმა შინდისის გმირების მემორიალი გვირგვინით შეამკო და დაღუპულთა ხსოვნას პატივი მიაგო. ვახტანგ გომელაურმა ჟურნალისტების კითხვებს უპასუხა. როგორც მინისტრმა აღნიშნა, ხელისუფლება ოკუპაციის შედეგების საპასუხოდ, მის ხელთ არსებულ ყველა ბერკეტს იყენებს. „ჩვენ ყველაფერს ვაკეთებთ ჩვენი მეგობრების, საერთაშორისო ორგანიზაციების ჩართულობით. სხვას ვერაფერს გავაკეთებთ, ვერ დავიწყებთ ომს. ვინც ჩვენ მაგას გვეუბნება, რატომ არაფერს არ აკეთებს ხელისუფლება, ზუსტად ისინი იყვნენ ხელისუფლებაში და კითხვას თუ დაუსვამთ მათვე, რატომ მოხდა 2008 წლის ომი, ძალიან კარგი იქნება. ასევე, უფრო კარგი იქნება, კითხვა რომ დაუსვათ - 2008 წლის ომის შემდეგ ჩვენი გმირების გვამები ისევ მინდორზე, ტყეებში რომ ესვენა და თბილისში კონცერტები იყო გამართული, რატომ ხდებოდა? რას ზეიმობდნენ? ვიდრე ჩვენ გვკითხავენ რამეს, უფრო კარგი იქნება, ეს კითხვა რომ დაუსვათ მათ“, - განაცხადა ვახტანგ ... ...
  • შს მინისტრი: ბაჩალიაშვილის საქმეში თუ საჭირო იქნება, გამოძიების ფედერალური ბიურო ჩაერთვებაშინაგან საქმეთა მინისტრის, ვახტანგ გომელაურის თქმით, თამარ ბაჩალიაშვილის საქმეზე გამომძიებლები მუშაობენ და თუ საჭირო იქნება, გამოძიების ფედერალური ბიურო  ექსპერტიზის მიმართულებით ჩაერთვება. „ბაჩალიაშვილის საქმეზე მე ღიად ვერ ვისაუბრებ. გამოძიება მიდის, თუმცა მე ვფიქრობ, მალე დასრულდება. თუ საჭიროება იქნება, გამოძიების ფედერალური ბიურო ჩაერთვება სავარაუდოდ ექსპერტიზის მიმართულებით, თუ დაგვჭირდება, თუმცა ჯერჯერობით გამომძიებლები მუშაობენ“, - განაცხადა ... ...

არქივი

ტესტები

ტესტი _ იცი თუ არა ფეხბურთის ისტორია

ვის გაუტანა 1986 წელს მარადონამ...

ტესტი _ როგორ იცნობ საქართველოს ისტორიას

სად დაამარცხა თამარ მეფემ რუმის...

ტესტი _ რა არის გამოსახული ამ ისტორიულ ფოტოზე?

ისრაელის მიერ პალესტინის დაბომბვა თუ...

ტესტი _ შენ და საქართველოს ისტორია

საქართველოს რომელი მეფე დასაჯეს სიკვდილით...

ტესტი _ რა გახსოვს სკოლიდან?

გამოქვაბულში ქვევიდან ზევით აღმართულ წარმონაქმნებს...

ტესტი _ აქვს თუ არა თქვენს ერუდიციას ფართო ჰორიზონტი

ეიფელის კოშკი ზაფხულში 15 სანტიმეტრით...

ტესტი _ რა იცი ჰოლივუდის ვარსკვლავების შესახებ

ლეონარდოს დი კაპრიოს სახელი ლეონარდო...

კარმიდამო ჩემი

დროა, მივეჩვიოთ ბუნებრივი რესურსების ეკონომიურად ხარჯვას

პლანეტის გლობალური კლიმატური ცვლილებები ბევრ...

როგორ მოვრწყოთ ვარდები _ ნუ გამოვიყენებთ სუფთა წყალს

ყვავილები, განსაკუთრებით, ვარდები, ყველას უყვარს....

ჩითილების მომზადება კოშტების და ნახერხის დახმარებით

ჩვენი გამოცდილი მეურნეები, სხვადასხვა ხალხურ...

რომელი მცენარეა ფშატი?

ჩვენი არა ერთი მკითხველის გვთხოვს,...

ხალხური მედიცინა დეზინფექციისთვის

სისუფთავის ხარისხი იქ, სადაც ადამიანი...

"საშობაო ლიქიორის" მომზადების ყველაზე შედეგიანი მეთოდი

ძალზე პოპულარული, "საშობაო ლიქიორის" მომზადების...

ყაბაყის ტორტი

საჭირო მასალა: ორი ცალი ყაბაყი,...

სტაფილოს სალათი ცერეცოთი

საჭირო მასალა: სამი ცალი სტაფილო,...

სოკოს სალათი შებოლილი ქათმის ხორცით

ეს უგემრიელესი სალათი უნდა მოვამზადოთ...