მერიელების პრინციპულობას, შესაძლოა, "ქვიშის გენერლის კარიერა" ემსხვერპლოს

მთავარი თემა

მერიელების პრინციპულობას, შესაძლოა, "ქვიშის გენერლის კარიერა" ემსხვერპლოს

2011 აგვ 1 23:51:58
ადგილობრივი მოსახლეობა, ამ ფაქტის გამო, შეშფოთებულია და როგორც ისინი აცხადებენ, უკიდურესი ზომების მიღებას აპირებენ. მოარულ ხმებს თუ დავუჯერებთ, აქ ჩინელი, ინდოელი თუ მკვიდრი ქართველი მფლობელის შემოსვლა, ერთი მაღალი თანამდებობის პირის თანხმობის გარეშე, არ ხდება. ვინ არის "ქვიშის კარიერების გენერალი" და რატომ არ უფრთხის იგი ბუნებისა და ხალხის რისხვას? სანამდე უნდა ითმინოს მოსახლეობამ, რომელსაც საყანე ფართობები წყალმა უკვე წაართვა და ადვილი შესაძლებელია, მალე სახლკარიანად "ყლაპი" უყოს ადიდებულმა ნატანების წყალმა?

მერიელებმა "გურია ნიუსს" განცხადებით მიმართეს: "ჩვენი სოფლის პრობლემა ძალიან მწვავეა: მას შემდეგ, რაც მდინარე ნატანებში ქვიშისა და ხრეშის მოპოვება დაიწყეს, წყალმა შეიცვალა კალაპოტი, წაიღო რამდენიმე ჰექტარი მიწის ფართობი და ყველა ადიდებისას, იგივე მეორდება. მდინარისგან წართმეულ მიწის ნაკვეთზე არ მიგვიღია არანაირი კომპენსაცია. ჩვენი დიდი ძალისხმევის შედეგად, დროებით სარგებლობაში გადმოგვცეს ყოფილი აეროდრომის მიწები, ყოველგვარი გაფორმებისა და ხელშეკრულების გარეშე. ამ მიწების საკუთრებაში მიღების საკითხი დღესაც გაურკვეველია. გვეუბნებიან, რომ ამ მიწების კერძო საკუთრებაში გადაცემა შეუძლებელია, მაგრამ არსებობს კერძო საკუთრების აქტი, რომელიც მხოლოდ ერთ პიროვნებაზეა დაკანონებული. ეს არის იმავე მიწის მიმდებარე ტერიტორია, რომელიც ჩვენთვის ხელმიუწვდომელია. აქ არსებული კარიერი ყველაზე დიდ საშიშროებას სოფლის სასაფლაოს უქმნის. დიდი რაოდენობით ქვიშის ამოღების გამო, მდინარემ სასაფლაოსაც გამოუთხარა ძირი, შეიქმნა საფლავების დაკარგვის საშიშროება. ჩვენი კუთვნილი ფართობებიდან გადის დაუთვლელი კუბური მეტრის მოცულობის ქვა-ღორღი; მოუწესრიგებელი და დაზიანებულია მერია ჴ კონჭკათის ცენტრალური სამანქანო გზა და ღამით გავლაც კი შეუძლებელია. ამ გზით სამი სოფლის მოსახლეობა სარგებლობს. მთელი სოფლის სახელით მოვითხოვთ, მოგვაქციონ ყურადღება _ გასწორხაზოვანდეს მდინარე ნატანების კალაპოტი, დააკმაყოფილონ დაზარალებული მოსახლეობა, სასწრაფოდ შეწყდეს მდინარე ნატანებზე კარიერებში მოქმედება. ჩვენი მოთხოვნის დაუკმაყოფილებლობის შემთხვევაში, იძულებული ვიქნებით მივმართოთ ქუჩის აქციებს და ჩვენი ძალებით შევაჩეროთ იმ მანქანების მოძრაობა, რომელთაც გააქვთ აღნიშნული ინერტული მასალა. გვითხრან, ვინ ექცევა ასე უდიერად ჩვენს სასიცოცხლო გარემოს? დღეს მიწა ნაწილ-ნაწილ წაგვართვა წყალმა, ხვალ სათითაოდ წაგვიღებს! ამბობენ, რომ სახელისუფლებო ეშელონებიდან ხდება ასე დაუდევარი ქმედება, პრეზიდენტამდე რომ დაგვჭირდეს მისვლა, არ გავჩერდებით", _ ნათქვამია განცხადებაში, რომელსაც ხელს სოფელ მერიის მცხოვრებლები აწერენ.

"გურია ნიუსი" ამ განცხადების საფუძველზე ოზურგეთის მუნიციპალიტეტის სოფელ მერიაში ჩავიდა და მცხოვრებლებს ადგილზე გაესაუბრა.

შოთა ვასაძე, სოფელ მერიის მკვიდრი: _ 40 ჰექტრამდე საყანე ფართობი წაღებულია და ალბათ, აწი მეტს წაიღებს; საინტერესოა, აქვთ აღებული ლიცენზიები ამ კარიერების მეპატრონეებს?! ლიცენზიას რომ აძლევენ, ეს იმას ხომ არ ნიშნავს, რომ მთელი ახლომდებარე ტერიტორია გადათხარონ და ველურებივით მოექცნენ გარემოს? თუ 50 ჰექტარი საყანე ფართობი კიდევ წაიღო წყალმა, ხალხი მშიერი დარჩება. ეს ადგილებია "ნაკარვალი" და "ნაშუები." კონჭკათის საზღვრამდეც გვაქვს ფართობი "ნაწისქვილარი". ამბობენ, ეს კარიერი ჩინელებისააო. 200 მანქანას რომ ხრეში მიაქვს, ვითომც არაფერი და ჩვენ, ადგილობრივებს მიცვალებულის სასაფლაოსთვის რომ ერთი ურიკა ხრეში დაგვჭირდეს, უფლებას არავინ მოგვცემს ამოვიღოთ. რომ დაგვინახონ, ჯარიმა არ აგვცდება. არ შეიძლება, სოფელს ერთი ჰექტარი ფართობი გამოუყონ კარიერის სახით? აი, დადექით აქ, ცენტრალურ გზაზე და 20 წუთში 35 მანქანას მაინც ნახავთ დატვირთულს, ავტობანი კეთდებაო "ციცინათელასთან" და იქ მიაქვთო, _ ამბობენ. ჩვენი ლაპარაკი არავის ესმის. "ქვიშის გენერლის" ვინაობა ჩემთვის უცნობია, თუმცა იგი არსებობს და ხალხის გასაჭირს აინუნშიაც არ აგდებს. დაგვეხმარეთ, რომ ეს თავგასულობა შეწყდეს, ერთს აშენებენ და მეორეს ანგრევენ?!

თედო ვასაძე: _ ყველაზე დიდი საშიშროება და საშინელება ის არის, რომ ჩინელების კომპანიაა ჩამდგარი ჩვენს კარიერებში. მე გეტყვით კონკრეტულად ჩემი გაჭირვების შესახებ. ჩემს საკარმიდამო ნაკვეთში, შევარდნაძის დროიდან მოყოლებული, სარგებლობაში მქონდა 3000 კვადრატული მეტრი საყანე მიწის ფართობი. რაც კალაპოტი შეიცვალა წყალმა, გადმოვიდა და ჩემი ყანა დარჩა გაღმა ნაპირზე. საკუთარი ტერიტორიაა ეს, შუალედური აქტით გაფორმებული. ასეთ მდგომარეობაშია 12 ოჯახი. წყლის გადაღმა დარჩენილია მოსახლეობა, გამოღმა კი მათი კუთვნილი ფართობები, რომლითაც ვეღარ ვსარგებლობთ. ეს არის, ალბათ, 3 ჰექტრამდე ფართობი. ამ ადგილს "ნაწისქვილარს" ეძახიან; ვისაც არ ვკითხეთ, თუ რა ბედი გველის, ყველა "არ ვიცის" გვეუბნება; ასეთი განუკითხაობა შეიძლება? დგანან ახლა ჩინელები მდინარეში წითელი ტრაქტორებით, თხრიან და იღებენ ამ ქვიშას. ჩინელების უკან კი "ქვიშის" გენერალი დგას, როგორც უსაფრთხოების გარანტი.

_ ხელისუფლების წარმომადგენლებს არ მიმართეთ დახმარებისთვის?

_კი მივმართეთ, მაგრამ ყველამ კარგად იცის საქმის არსი: აქ იყო სამხედრო "გარადოკი", რომელიც დაიშალა. ახლა იმ ტერიტორიაზე არის ფართობი, ჩვენი მუნიციპალიტეტი ადგა და დროებით სარგებლობაში ვითომ დაგვათესინა ყანები. ვეუბნებით, ან მოგვეცით ან გაგვიფორმეთ სანაცვლოდ-თქო. ეს თავდაცვის სამინისტროსაა და ჩვენ არ გვეხებაო, _ გვპასუხობენ. მოკლედ, არც აქეთ ვართ და არც _ იქით. ახლა იძახიან, ვითომ, ეკონომიკის სამინისტროს გადავეცით და შესყიდვები წავაო. როგორია, ჩემს კუთვნილ მიწაზე ვიღაცამ ხრეში ამოიღოს და ყიდოს?! ნახეთ, ახლა რამდენი ტრაქტორი მიდის და ყველა ჩვენს წყალში ჩადგება! დღეში, მინიმუმ, 1000 კუბური მეტრი ხრეში გადის ჩვენი სოფლიდან. ამგვარი დამოკიდებულების გამო, ოზურგეთის მუნიციპალიტეტს, დამიჯერეთ, 4 ან 5 წელიწადში მდინარე დაბლა ჩაიტანს. ახლა ლაითურშიც გახსნეს ახალი კარიერი და ქვის სატეხი. სასაფლაოსთვის ხრეში რომ ავიღოთ, ჯარიმა არ აგვცდება. ყველა შეშინებულია. ჩვენს მიწაზე ამის უფლება აღარ უნდა გვქონდეს?! ისედაც გაქურდულია სასაფლაოები _ თუკი სადმე სპილენძი და ალუმინი იყო, ყველგან მოხსნილია. რა გვეშველება, არ ვიცით, წაგვიღებს წყალი, რაიმე თუ არ ვიღონეთ.

ფიქრია მაღრაძე: _ ძალიან ბევრი პრობლემა გვაქვს. ვერაფერს გავხდით ამ კარიერებთან დაკავშირებით. უკიდურეს ყოფაში ვართ, არავის ჩვენი არ ესმის, არავინ ყურადღებას არ გვაქცევს. ყანაა გლეხის სიმდიდრე და იმასაც გვართმევენ. წაიღო წყალმა ყველაფერი და რეაქცია არ აქვთ. რამდენი თვე ვირბინეთ გამგეობაში, რომ რაღაცისთვის მიგვეღწია. ვითხოვეთ, რომ იქნებ, დროებით სარგებლობაში მოეცათ აქ არსებული საყანე ფართობი, რადგან ვიცოდით, რომ ეს მიწა თავდაცვის სამინისტროს დაქვემდებარებაში იყო და არავინ ისე არ მოგვცემდა. ჩვენი კუთვნილი მიწები წაგვართვეს და სანაცვლოს ვითხოვდით. ახლა გავიგეთ, რომ ეს საყანეები ეკონომიკის სამინისტროს გადაეცა. მოვითხოვეთ, რომ თუკი გაიყიდებოდა აუქციონზე, მოეცათ გარკვეული რაოდენობით. თუმცა, უარი მივიღეთ. შევაწუხეთ ჩვენი სოფლის რწმუნებული და დეპუტატიც, მაგრამ, ჯერჯერობით, ეს საქმე ადგილიდან არ იძვრის. გამოგვითხარეს ძირი, წაგვართვეს მიწა, წყალი, აქ არ გაეკარო, იქ არ გაეკაროო, ესაა საქმე?! განადგურებულია სოფელი, არ გვაქვს საბალახო... მერია ისედაც მცირემიწიანია. მე, მაგალითად, მომცეს 8000 კვ. მეტრი მიწა და წყალმა იმდენი წამართვა, 3500კვ. მეტრიღა დამრჩა... არავინ ამაზე პასუხის გამცემი არაა. მართლაც, უკიდურესად გაჭირვებულია მთელი სოფელი.

"ხალხს ხელი ჩაქნეული აქვს _ ძალიან ბევრი გვაქვს ამ საქმეზე ნარბენი, მაგრამ ვერ გავიგეთ პასუხი. ჩვენი სოფლის რწმუნებულის მადლიერები ვართ, რაც შეუძლია, გვერდით გვიდგას, რაც არ შეუძლია, რა ქნას?! მოგვაქციოს მთავრობამ ყურადღება. ნეტა, ისე ჩაგვწერდეთ, რომ ამას პრეზიდენტს მოასმენინებდეთ! მიაწვდინეთ ხმა, ძალიან გთხოვთ, მოგვაქციონ ყურადღება. რა გახდა ეს გურია, რატომ შესძულდა ასე პრეზიდენტს?! შევარდნაძე იყო გურული და ვძულდით, სააკაშვილია და გურია საერთოდ არ აინტერესებს. გამოვალთ მთელი მოსახლეობა და ქუჩას გადავკეტავთ; ეს არ არის პოლიტიკური აქცია _ ჩვენი თავი გაგვჭირვებია და პოლიტიკა არ არის ჩვენი საქმე, მაგრამ ჩვენ მოვითხოვთ ჩვენსას _ დაგვიბრუნონ ჩვენი კუთვნილი მიწა-წყალი. აი, თუნდაც ამ პეპლებს გადაუღეთ, ერთხელაც რომ არ შეუწამლიათ! ერთ რამეს ძალიან გთხოვთ: ჩვენი პრობლემები ფართოდ და მწვავედ გააშუქეთ. მოვითხოვთ, სასწრაფოდ შეჩერდეს კარიერებზე ქვიშის ამოღება. არ გვაპატიებს ჩვენ ბუნება არაფერს და ამიტომ, ვერც ჩვენ ვაპატიებთ ვიღაცას, უკანონოდ და თავხედურად გადაგვითხაროს გარემო. თუნდაც კანონიერი და ლიცენზირებული იყოს, არ გვაინტერესებს _ შეჩერდეს ქვიშა-ხრეშის ამოღება! პატარა ხანში მერიაში სასაფლაო აღარ იქნება და აღარც მიცვალებულები გვეყოლება. ნახეთ, წამოდით, სასაფლაოს მიწა რა მდგომარეობაშია _ წყალმა გამოუთხარა ძირი და სულ გადმოკიდებულია საფლავები. ადამიანს რომ საფლავებს წაართმევ, ამაზე დიდი უბედურება რა არის?!" _ ამბობენ "გურია ნიუსთან" საუბარში სოფელ მერიის მცხოვრებლები.

"გურია ნიუსთან" ოზურგეთის მუნიციპალიტეტის სოფელ მერიის რწმუნებული ვაჟა ჩანჩიბაძე არსებული რთული ვითარების შესახებ საუბრობს:

_ სოფელ მერიაში ოდითგანვე იყო კარიერი, მაგრამ მოპოვებას ასეთი მასიური სახე არ ჰქონდა. ეს ორი წელია, რაც პიკს მიაღწია; ადრე ქვის სამტვრევიც იყო, მაგრამ მაშინ ამ ყველაფერს თავისი ადგილი ჰქონდა, ახლა კი საშიშროება, რაზეც ხალხი საუბრობს, ნამდვილად არსებობს. თქვენც ნახეთ, გადაიღეთ და ხართ იმის მომსწრე, როგორ აქვს შეცვლილი მდინარეს კალაპოტი; მდინარე უნდა გასწორხაზოვანდეს. ჩემი ინფორმაციით, 30-დან 40 ჰექტრამდე საყანე ფართობია წაღებული. რა თქმა უნდა, კიდევ ს 50 ჰექტარსაც წაიღებს თუ ასე გაგრძელდა... სოფლის მეურნეობა საყანე ფართობის გარეშე შეიძლება? გლეხმა რა ქნას?

_ თუ გქონდათ ხელისუფლების წარმომადგენლებთან საუბარი?

_კი, მქონდა. მივედი გია ტაკიძესთან. დახმარება აღუთქვა მოსახლეობას საკუთრებაში მიწის კანონიერად დამტკიცებაში. დაკანონების შემდეგ, საკუთრებაში ვინმეს ჩაუშვებთ? იმიტომ გახსნეს იქ კარიერი, რომ ოფიციალური საბუთი ვინმეს კუთვნილების შესახებ არ არსებობს; თუ დაკანონების შემდეგ კიდევ მოხდება მსგავსი რამ, საფუძველი ექნება მოსახლეობას სასამართლოს მიმართოს. დავეთანხმები ხალხის მოთხოვნებს. მოსახლეობას არ აქვს იმის უფლება, რომ მივიდეს და თვითნებურად ამოიღოს ქვიშა, ამისთვის დაჯარიმდება.

ოზურგეთის მუნიციპალიტეტის გამგეობის ზედამხედველობის სამსახურის მთავარი სპეციალისტი ბუნებრივი რესურსებით სარგებლობის საკითხებში გურამ ბერძენიშვილი "გურია ნიუსთან" საუბარში აღნიშნავს, რომ ოზურგეთის მუნიციპალიტეტში გაცემულია 44-მდე ლიცენზია:

_ ძირითადად, მოქმედი ლიცენზიები გაცემულია მდინარე ნატანებზე. ლიცენზიებს, როგორც წესი, ახლავს ნებართვა ქვიშა-ხრეშის მოპოვების თაობაზე. ასევე, ახლავს ტოპოგრაფიული რუკა, სადაც მითითებულია ლიცენზიის მოპოვების ადგილი და სამთო მინაკუთვნის პროექტი, რომლითაც განსაზღვრულია ლიცენზიანტის მუშაობის სქემა სამთო მინაკუთვნის ადგილზე. მთავარი, რასაც ყურადღება უნდა მიექცეს, ეს არის წყალდაცვითი ზონის ხელშეუხებლობის პირობა, რაც განსაზღვრულია საქართველოს კანონით წყლის შესახებ. სამთო მინაკუთვნის პროექტი კრძალავს მდინარიდან პირდაპირ ხრეშის ამოღებას, რაც დღეს ლიცენზიანტების მიერ ფართოდაა გამოყენებული. მოგეხსენებათ, რომ ხრეშის მდინარიდან ამოღების გამო, იცვლება კალაპოტი, წყალი იტაცებს მის მიმდებარედ არსებულ სასოფლო-სამეურნეო სავარგულებს და ფაქტობრივად, აზარალებს მოსახლეობას, როგორც ეს მოხდა სოფელ გურიანთასა და სოფელ მერიაში. დაზარალებული მოსახლეობის უმეტეს ნაწილს ხელთ აქვს მიწის საკუთრების დამადასტურებელი მოწმობები, იმ მიწისა, რომელიც ფაქტობრივად მიტაცებული აქვს მდინარეს და რეალურად აღარ არსებობს. ხშირად ირკვევა, რომ ლიცენზიანტი, რომელმაც სხვა ლიცენზიანტისგან შეიძინა ქვიშა-ხრეშის მოპოვების ნებართვა, არ ელოდება ბუნებრივი რესურსების სააგენტოს მიერ ლიცენზიის შეძენასთან დაკავშირებულ პროცედურებს და იწყებს ქვიშა-ხრეშის მოპოვებას, _ გვითხრა გურამ ბერძენიშვილმა.

მისი თქმით, კომპანია "ბლექ-სი გრუპმა" ბუნებრივი რესურსების სააგენტოს უფროსის ბრძანების საფუძველზე, განახორციელა როგორც ოზურგეთში, ასევე სოფელ ლიხაურში ქვიშა-ხრეშის მოპოვება, რომელსაც თან სდევს ისეთი თანმდევი დარღვევები, როგორიცაა წიაღისეულის გადატანისას, სატრანსპორტო საშუალებებით ასფალტის საფარის და რკინიგზის გადასასვლელების დაზიანება, ავტომაგისტრალების დანაგვიანება, რაც მოსახლეობის სამართლიან გულისწყრომას იწვევს. უფრო მეტიც, დგანან ყველაზე დიდი საშიშროების წინაშე _ ერთმევათ მიწის ის ნაკვეთები, რომლებიც მათ საარსებო წყაროს წარმოადგენს.

აღსანიშნავია, რომ ერთი კვირის წინ, ოზურგეთში კიტა მეგრელაძის ქუჩაზე მცხოვრებლებმა პროტესტის ნიშნად ქუჩა გადაკეტეს: "კარიერზე მომუშავე მანქანებმა დააზიანეს და ბოლო მოუღეს გზას _ 40-ტონიანი მანქანები დადიან და წყლის მილებიც ამის გამო დასკდა. ახლა "დრაბილკა" (ქვის გადამამუშავებელი საამქრო) დადგეს ქუჩის ბოლოს და მტვერიც გვახრჩობს", _ ამბობდნენ "გურია ნიუსთან" საუბარში მეგრელაძის ქუჩის მცხოვრებლები; სწორედ ამ დროს გაჟღერდა ამ ფირმის სახელიც.

გაზეთი "გურია ნიუსი" შპს "ბლექ-სი გრუპის" წარმომადგენელს თენგიზ გოგიშვილს ტელეფონით დაუკავშირდა (საუბრის სტილი დაცულია):

_ ბატონო თენგიზ, გაქვთ თუ არა ლიცენზია, რომლის საფუძველზეც გაქვთ უფლება მოიპოვოთ ქვიშა-ღორღი?

_ გვაქვს.

_ შეგიძლიათ, გვაჩვენოთ?

_ რატომ უნდა გაჩვენოთ? მიბრძანდით და მოიპოვეთ.

_ სად მოვიპოვოთ, იქნებ გვასწავლოთ?

_ იმ ორგანიზაციაში, ვინც გასცემს ლიცენზიებს. მიმართეთ გარემოს დაცვას.

_ ჩვენ მიერ მოპოვებული ინფორმაციით, თქვენ არ გაქვთ ლიცენზია და მხოლოდ ბრძანების საფუძველზე მუშაობთ.

_ თქვენ საიდან იცით და ვინ გითხრათ?

_ ჩვენ მოვიპოვეთ ინფორმაცია და წყაროს ნამდვილად ვერ დაგისახელებთ.

_ გეკითხებით, ვინ გითხრათ? მე გეუბნებით, რომ მაქვს ლიცენზია. მიმართეთ გარემოს დაცვის ორგანიზაციას. უნდა მოიპოვოთ იქ. რადგანაც ასეა, თქვენ ინფორმაციებს მოიპოვებთ, ესეც მოიპოვეთ.

_ მაშინ თუ შეიძლება, დაგვიკონკრეტეთ ზუსტად, სად გაქვთ კარიერი ოზურგეთის მუნიციპალიტეტის ტერიტორიაზე.

_ ეგეც იმათ ეცოდინებათ.

_ თქვენ არ იცით?

_ მე ვიცი, მაგრამ თქვენ არ გეუბნებით, როგორც თქვენ არ გვეუბნებით წყაროს, ვინც ეგ გითხრათ. საიდუმლო ორგანიზაცია ვართ და ამიტომ არ გეუბნებით.

_ საიდუმლო ორგანიზაცია რას ნიშნავს?

_ საიდუმლო ორგანიზაცია, ანუ არავის არ უნდა უთხრას, სახელმწიფო სტრუქტურების გარდა, სად აქვს კარიერი, სად და როგორ აკეთებს... თქვენ გაზეთიდან ბრძანდებით და ასე რომ, ეგაა. თქვენ, ალბათ, ამ საუბარსაც დაწერთ.

_ კი, რა თქმა უნდა.

_ მაშინ მეორეჯერ არ დამირეკოთ, რა. მეორეჯერ არ დარეკოთ საერთოდ, _ საკმაოდ მკაცრი ტონით გვითხრა თენგიზ გოგიშვილმა და ტელეფონი გაგვითიშა.

ბუნებრივი რესურსების სააგენტოს გურიის რეგიონული სამსახურის უფროსი, ნიკოლოზ ნოზაძე ოზურგეთში არ იმყოფებოდა და ტელეფონით დავუკავშირდით.

_ ბატონო ნიკოლოზ, გვაინტერესებს, აქვს თუ არა ლიცენზია შპს "ბლექს-სი გრუპს?"

_ არ ვარ სამსახურში და ასე როგორ გითხრათ? უნდა ჩავიხედო, ასე ზეპირად არ მახსოვს, ვის აქვს და ვის არა ლიცენზია. რომ გითხრათ, რომ არ აქვს და აღმოჩნდეს მერე რომ ჰქონია, უხერხულობაში ჩავვარდებით, ორშაბათს შეგხვდებით.

რამდენიმე წუთში ნოზაძე თავად დაგვიკავშირდა და გვარწმუნებდა, რომ შპს "ბლექს-სი გრუპს" ლიცენზია აქვს:

_ იცით რა, "ბლექ-სი გრუპს" ლიცენზია აქვს.

_ მაშინ ისიც გვითხარით, სად შეგვიძლია მოვითხოვოთ ლიცენზიის ასლი.

_ მაგათმა უნდა გაჩვენოთ.

_ "ბლეს-სი გრუპის" წარმომადგენელი უარს აცხადებს და ამბობს, რომ ლიცენზია თქვენ უნდა გვაჩვენოთ.

_ მაგათ აქვთ ლიცენზია, ვიკითხე.

_ სად იკითხეთ?

_ ჩემს თანამშრომლებს შევეკითხე.

_ თქვენ შეგიძლიათ გვაჩვენოთ ლიცენზია?

_ წერილის სახით... ვერ გეტყვით. უნდა მოვიძიო(?!).

_ ანუ მოიძიებთ და გვაჩვენებთ?!

_ კი, _ შეგვპირდა ნოზაძე, ისე რომ "საბუთებში არ ჩაუხედავს".

ჩვენ ოფიციალურად, წერილობით გამოვითხოვთ ამ დოკუმენტს, ისევე როგორც ოზურგეთის მუნიციპალიტეტის ტერიტორიაზე 44-მდე კარიერში მომუშავე ფირმების ლიცენზიებს და თემას ისევ დავუბრუნდებით.




 ახალი ამბები
  • ,,მშვიდობით, ვანიჩკა, შეხვედრამდე, შეფ!"- ივანე ხუხუნაიშვილი გარდაიცვალა47 წლის ასაკში, გულის შეტევით, მოულოდნელად გარდაიცვალა სამტრედიის მუნიციპალიტეტის საკრებულოს აპარატის უფროსი, ივანე ხუხუნაიშვილი. 1996 წლიდან ის იკავებდა საკრებულოს აპარატის უფროსის თანამდებობას. 2017 წლიდან იყო სამტრედიის მუნიციპალიტეტის საკრებულოს პირველადი სტრუქტურული ერთეულის ხელმძღვანელი. ივანე ხუხუნაიშვილი ლანჩხუთელია, სადაც  დედასთან და მეუღლესთან ერთად ცხოვრობდა. ივანე ხუხუნაიშვილის მამა, ლუდვიგ ხუხუნაიშვილი წლების განმავლობაში მუშაობდა სამტრედიის სამხედრო კომისრად. დღეს მთელი დღეა, საკრებულოს თანამშრომლები სამძიმარს იღებენ და უდიდეს გულისტკივილს გამოთქვამენ არაჩვეულებრივი ადამიანის, განათლებული და კეთილშობილი ხელმძღვანელი პირის გარდაცვალების გამო. სოციალურ ქსელში ადამიანები ივანე ხუხუნაიშვილს მოსაფერებელი სახელით ემშვიდობებიან: ,,მშვიდობით, ვანიჩკა, შეხვედრამდე, ... ...
  • მწვრთნელს მძლეოსნობაში, მარინა კოტრიკაძეს დამსახურებული მოღვაწის წოდება მიენიჭასაქართველოს განათლების, მეცნიერების, კულტურისა და სპორტის სამინისტრომ, საქართველოს სპორტის დამსახურებული მოღვაწის წოდება მიანიჭა ოზურგეთის მუნიციპალიტეტის სპორტულ - გამაჯანსაღებელ დაწესებულებათა გაერთიანების მწვრთნელს მძლეოსნობაში, მარინა კოტრიკაძეს. ინფორმაციას ამის შესახებ ოზურგეთის მუნიცილალიტეტის სპორტულ-გამაჯანსაღებელ დაწესებულებათა გაერთიანების პრესსამსახური ... ...
  • ტყემალაძე: "ვთხოვ ყველას, თავი შეიკავონ"საკრებულოს თავმჯდომარის განცხადებით, კუხიანიძის პოსტი იყო არაკორექტული, ხვალ გაიმართება უმრავლესობის სხდომა, რომლის შემდეგ გახდება ცნობილი, თუ რა გადაწყვეტილება იქნება მიღებული. „ეს განცხადება იყო ემოციური, არაკორექტული და შესაბამისად, მე მინდა ვთხოვო ყველას, თავი შეიკავონ, განსაკუთრებით ამ პერიოდში, ზოგადად ასეთი განცხადებების გაკეთება არის მიუღებელი. ჩვენ გვექნება უმრავლესობის სხდომა, კონსულტაციები და რა გადაწყვეტილებები იქნება მიღებული, ამას შეიტყობთ", - განაცხადა ტყემალაძემ. შეგახსენებთ, რომ ერეკლე კუხიანიძის ,,ფეისბუქ პოსტის"გამო ოპოზიციის წევრებმა და მოქალაქეებმა საკრებულოსთან აქცია გამართეს დეპუტატის თანამდებობიდან გადადგომის ... ...
  • მოჭენავს მერაბ ბრძენიშვილის ცხენი გურიაში? _საიუბილეო დაპირება ოზურგეთელებს_ვანდალური აქტი როცა  მოხდა ქუთაისში და მერაბ ბერძენიშვილის ქანდაკება დაშალეს, ეს იყო მისი ძალიან დიდი ტკივილი, რომელიც თან გაჰყვა დიდ ხელოვანს, _ თქვა ოზურგეთის სახვითი ხელოვნების ცენტრის 30 წლის  საიუბილეო ღონისძიებაზე, სამხატვრო გალერეის დირექტორმა, ავთანდილ თავართქილაძემ და ანონსის სახით  გააცნო ზეიმის მონაწილეებს სამომავლო ჩანაფიქრი. _თქვენ იცით, რომ ჩვენი სახვითი ხელოვნების ცენტრი მერაბ ბერძენიშვილის სახელს ატარებს. მინდა,   გითხრათ, რომ მომავალ წელს მერაბ ბერძენიშვილის ქანდაკება დაიდგმება ოზურგეთში, გალერეის წინ. როცა მისი ქნდაკება ისე დაშალეს, რომ მისი დემონტაჟიც არ მოხერხდა, მაშინ გვქონდა საუბარი, ძალიან კარგი ლაპარაკი იმის  შესახებ, რომ მერაბის ქანდაკება უნდა  დადგმულიყო აქ. „მზეჭაბუკი“ ჰქვიოდა ამ ქანდაკებას. მახსოვს, მაშინ  მითხრა: „ მე მგონია, ავთოია, ბიჭო, ჩემი ცხენი მოჭენავს გურიაშიო“... მერე ის პროექტიც ჩავარდა. სირცხვილია, რომ ასეთი ხელოვანის, დიდი გურულის ქანდაკება არ იყოს ოზურგეთში.  მართალია,  ასე ვთქვათ, ეს ცხენი რომ გამოჭენდეს გურიაში,  თანხები და მობილიზება სჭირდება,  თუმცა,  ეს მოხერხდება და ძალიან კარგი.  ასეთი  დიდ გურულის ძეგლი რომ არ იყოს გურიაში, სირცხვილიცაა,_  თქვა მან და დასძინა, რომ ბერძენიშვილის ქანდაკება განსაკუთრებით დაამშვენებს ფოლკლორის ქალაქს. საიუბილეო ღონისძიები მონაწილეები ტაშით და ოვაციით შეხვდნენ ავთანდილ თავართქილაძის ... ...
  • წარწერა ,,ღორი" და ,,ნაძირალა"- საკრებულოს წევრის კაბინეტის აბრაზეაქციის მონაწილე ოპოზიციის  დეპუტატებმა საკრებულოს წევრის ერეკლე კუხიანიძის კაბინეტის აბრაზე გააკეთეს წარწერა ,,ღორი" და ... ...

არქივი

ზაფრანი

ყველაზე მსმელი ქალები მსოფლიოში

ცოტა ხნის წინ ამერიკელმა მეცნიერებმა...

რატომ ცოცხლობენ ქალები მამაკაცებზე დიდხანს

მამაკაცები ქალებზე უფრო ხანმოკლედ ცოცხლობენ....

რა უპირატესობებს ფლობენ ქალები მამაკაცებთან შედარებით

მოქნილობა _ კუნთებში ელასტინის მაღალი და...

რომელი ცხოველი ხართ ინდიელთა ჰოროსკოპით

რომელია თქვენი ტოტემის ცხოველი ინდიელთა...

სამკაულები, რომლებსაც უბედურება მოაქვს

ზოგიერთ სამკაულს თავისი მფლობელისთვის წარუმატებლობის...
კარმიდამო ჩემი

"მოხრაკულა" დილით განსაკუთრებით საამოა

„მოხრაკულა“ _ ერთერთი ძველი ქართული...

საშიშია თუ არა ჯანმრთელობისთვის ლამინატის იატაკი

დღეს მოჭიმული იატაკი და ლამინატი...

როგორ ამოვიცნოთ ნატურალური თაფლი

ნამდვილი თაფლი არომატით გამოირჩევა ხელოვნურად...

უებარი საშუალება სიბერის შესაჩერებლად

მწვანილი ანელებს დაბერების პროცესს, აუმჯობესებს...

უებარი საშუალება გაციების წინააღმდეგ

ზამთრის მოახლოებასთან ერთად ვირუსებისა და...

მარილი _ უნიკალური გამაყუჩებელი საშუალება

თავის ტკივილით უამრავი ადამიანი იტანჯება....

ხურმა _ ჯადოსნური ხილი

ხურმა - ჩვენში დასავლეთ საქართველოში...

საშუალება, რომელიც კიბოს ამარცხებს

ლიკოპენს, რომელიც ბუნებრივი ძლიერი ანტიოქსიდანტია,...

უნიკალური მკურნალი მცენარე

მიუხედავად არაერთი მედიკამენტისა, საზოგადოების გარკვეული...

რას კურნავს მრავალძარღვა

მრავალძარღლვას საუკუნეების განმავლობაში იყენებდნენ, როგორ...