რა ეამაყება ირაკლი ღარიბაშვილს _ პრემიერ-მინისტრმა ორწლიანი საქმიანობის ანგარიში წარადგინა

მთავარი თემა

რა ეამაყება ირაკლი ღარიბაშვილს _ პრემიერ-მინისტრმა ორწლიანი საქმიანობის ანგარიში წარადგინა

27 ოქტ. 2014, 20:14:43
დემოკრატიული ინსტიტუტების გაძლიერება - ორი წლის ერთ-ერთი მთავარი მონაპოვარი, - პრემიერ-მინისტრმა საზოგადოებას დღეს საქმიანობის ანგარიში წარუდგინა. 
"თავისუფალი მედიის და თავისუფალი სასამართლოს გარეშე დემოკრატიული სახელმწიფო არ არსებობს", - ამბობს ირაკლი ღარიბაშვილი. 
მთავრობის მეთაური მოხარულია, რომ ორ წელიწადში ყველა სფეროში მნიშვნელოვანი წინსვლა დაფიქსირდა - ჯანდაცვის, განათლების, მეწარმეობის, სოფლის მეურნეობის ხელშეწყობიდან კანონის უზენაესობის დამკვიდრების ჩათვლით. 
პრემიერს ეამაყება უპრეცენდენტოდ დემოკრატიულ გარემოში ჩატარებული ორი არჩევნები და 50%-მდე გაზრდილი საარჩევნო ბარიერი, რომლის შედეგად საქართველოს პირდაპირი წესით არჩეული 12 ქალაქის მერი და 59 გამგებელი ჰყავს. 
წინა ხელისუფლების მიერ დატოვებული მემკვიდრეობა მოქმედის ყველაზე დიდი გამოწვევაა - ოკუპირებული ტერიტორიები. 
"დღეს ჩვენ ვიმკით იმ შედეგებს, რაც სიძულვილის ენას, გაუაზრებელ ნაბიჯებს და დაუბალანსებელ პოლიტიკას მოჰყვა. სწორედ ამ პოლიტიკის შედეგია ის, რომ დღეს ქვეყნის 20 პროცენტი ოკუპირებულია, საქართველოს ტერიტორიაზე კი ახალი მავთულხართებია გაბმული. ოკუპირებულია წლობით ნალოლიავები და შენარჩუნებული კოდორის ხეობა. ამ პოლიტიკის შედეგია 10 ათასობით ახალი დევნილი და საქართველოს შუაგულში გაჩენილი დევნილთა ახალი დასახლებები. ეს არის უმთავრესი გამოწვევა, რის წინაშეც ჩვენი ხელისუფლება დგას", - განაცხადა პრემიერ-მინისტრმა და აღნიშნა, რომ საქართველო წარსულის ანალიზით, თავშეკავებით, მაგრამ პრინციპულობით, ნაბიჯ-ნაბიჯ უნდა მიუახლოვდეს უმთავრეს ოცნებას - ტერიტორიული მთლიანობის აღდგენას. 
მძიმე სოციალური ფონი და ორ მილიონზე მეტი გაჭირვებული ადამიანი ხელისუფლების კიდევ ერთი გამოწვევაა. წყალი, გაზი და გზები ბევრ სოფელში დღესაც პრობლემაა. 
"28 სოფელი დაგვხვდა საერთოდ ელექტროენერგიის გარეშე. ყველაზე აღმაშფოთებელი კი ისაა, რომ იმ ხელისუფლების ხელში, რომელიც თავს იწონებდა აღმშენებლობით, ხალხი უწამლობისა და უექიმობის გამო იღუპებოდა. აი, ასეთი ქვეყანა გადმოვიბარეთ ჩვენ. სწორედ ამიტომ ჩვენ დავიწყეთ სასწრაფოდ ამ რეალობის შეცვლა, რათა რაც შეიძლება სწრაფად მიეცეს ხალხს ამოსუნთქვის საშუალება", - განაცხადა პრემიერ-მინისტრმა. 
პრემიერ-მინისტრის პრესსამსახურის მიერ გავრცელებული ინფორმაციის თანახმად, საყოველთაო ჯანდაცვის პროგრამა ახალი ხელისუფლების ერთ-ერთი ყველაზე წარმატებული პროექტია. 1 მილიარდი ლარით გაზრდილი ჯანდაცვის ბიუჯეტი და 2 მილიონ 781 ათასი ბენეფიციარი - დღეს საქართველოს ყველა მოქალაქე დაზღვეულია. 
პრემიერის ინფორმაციით, 20 წლის განმავლობაში პირველად, ქვეყანაში შემცირდა სიკვდილიანობა და დაფიქსირდა პენსიონერთა რიცხვის ზრდა; რეგიონებში აშენდა და მოეწყო 82 ამბულატორია, 30 პროცენტით გაიზარდა სოფლის ექიმებისა და ექთნების ხელფასი.
"ჩვენ დავიწყეთ კიდევ ერთი უაღრესად მნიშვნელოვანი პროექტი, რომლის ინიციატორი ბატონი ბიძინა ივანიშვილია - ზუგდიდში, სოფელ რუხში დაიწყო მულტიპროფილური, თანამედროვე ტექნოლოგიებით აღჭურვილი საუნივერსიტეტო კლინიკის მშენებლობა. ეს კლინიკა იქნება ძალიან დიდი შესაძლებლობა არა მხოლოდ სამეგრელოს რეგიონისთვის, არამედ ჩვენი აფხაზი ძმებისთვისაც", - განაცხადა ირაკლი ღარიბაშვილმა. 
მთავრობის გადაწყვეტილებით, C ჰეპატიტით დაავადებული 10 ათასი პაციენტი სამკურნალო მედიკამენტებზე 60-პროცენტიანი ფასდაკლებით სარგებლობს, ამ პროგრამით, 2 ათასამდე პაციენტმა ისარგებლა და დაიზოგა 2 მილიონ 315 ათასი ლარი. პატიმრებისთვის C ჰეპატიტის მკურნალობა სრულიად უფასოა. შედეგად უკვე განიკურნა 173 პატიმარი. 1000 დაავადებული პატიმრის მკურნალობისთვის სახელმწიფო 6 მილიონ ლარს ხარჯავს. 
პრემიერ-მინისტრის ინიციატივით შექმნილმა „სოლიდარობის ფონდმა", რომელმაც, როგორც საჯარო, ისე კერძო სექტორში დასაქმებული ადამიანები გააერთიანა, ონკოლოგიური დაავადებების მქონე 25 ბავშვის მკურნალობა უკვე დააფინანსა. 2 თვის განმავლობაში ფონდში მობილიზებულია მილიონ ლარამდე თანხა. 
ირაკლი ღარიბაშვილის განცხადებით, გაიზარდა პენსია და დახმარება ყველა კატეგორიის პენსიონერისა და შეზღუდული შესაძლებლობების მქონე პირისთვის. 
„ჩვენ გავაორმაგეთ დახმარება სოციალურად დაუცველებისათვის, გავაორმაგეთ დევნილთა და ლტოლვილთა შემწეობები. ვიცით, რომ არც ეს არის საკმარისი, მაგრამ ვალდებული ვართ, მაქსიმუმი გავაკეთოთ იმისათვის, რომ მათ ცხოვრების ადამიანური პირობები ჰქონდეთ. დევნილები წლების განმავლობაში ცხოვრობდნენ აბსოლუტურად უღირს პირობებში. 2012 წლის ოქტომბრიდან დევნილებს სოციალური პაკეტის ფარგლებში 14,5 მილიონი ლარის დახმარება გაეწიათ. საცხოვრებლით უკვე უზრუნველყოფილია 10 ათას 500 დევნილი. 1 ლარად საცხოვრებელი ფართობი დაუკანონდა და კერძო საკუთრებაში გადაეცა 4 ათასამდე ოჯახს. ჩვენი მიზანია, არც ერთი დევნილი არ დარჩეს საკუთარი ჭერის გარეშე", - აღნიშნა პრემიერ-მინისტრმა.
კონკრეტული ნაბიჯები გადაიდგა დემოგრაფიული პრობლემის მოგვარების მიზნით - საქართველოს იმ რეგიონებში, სადაც შობადობის მაჩვენებელი დაბალია, გაიცემა ფინანსური დახმარება ყოველ მესამე და შემდგომ ბავშვზე - მთაში - 200 ლარი, ბარში კი - 150 ლარი. 
პრემიერის შეფასებით, წარმატებით ხორციელდება პროექტები, რომლებიც განათლების მხარდაჭერას ისახავს მიზნად. 
მეორე წელია, სკოლის მოსწავლეები უფასოდ იღებენ სახელმძღვანელოების კომპლექტს და ამან 60 პროცენტამდე შეამცირა ოჯახის წლიური დანახარჯი ზოგად განათლებაზე - მოსწავლეების მშობლები ყოველწლიურად 75 მილიონ ლარს ზოგავენ. გარდა ამისა, 1065 სკოლის 53 ათასამდე მოსწავლეს ემსახურება უფასო სასკოლო ტრანსპორტი. რეგიონებში, იმ ადგილებში, სადაც ბავშვებისთვის სკოლაში მისვლა დიდ პრობლემებთან იყო დაკავშირებული, დანიშნულია სპეციალური ავტობუსები. ჩვენ ვაშენებთ და ვარემონტებთ სკოლებს. საქართველოს მასშტაბით უკვე ავაშენეთ 9 ახალი სკოლა და კიდევ ვაშენებთ 8 სკოლას. 1000 სკოლას ჩაუტარდა რეაბილიტაცია", - განაცხადა ირაკლი ღარიბაშვილმა. 
გარდა ამისა, სახელმწიფო სრულად აფინანსებს 21 საბაკალავრო პროგრამას. აგრეთვე მთლიანად ფინანსდება 12 ათასამდე სტუდენტი, რომლებიც საჯარო კოლეჯებში იღებენ პროფესიულ განათლებას. 
ამასთან, პრემიერის ინიციატივით, თბილისში დაიწყო თანამედროვე საერთო საცხოვრებლის მშენებლობა სოციალურად დაუცველი, რეგიონებიდან ჩამოსული სტუდენტებისთვის. ასეთივე საერთო საცხოვრებლები შენდება ახალქალაქში, ზუგდიდსა და ქუთაისში. პრემიერ-მინისტრის ინიციატივით შექმნილმა განათლების საერთაშორისო ცენტრმა კი საზღვარგარეთის წამყვან უნივერსიტეტებში სწავლის გაგრძელების მსურველი სტუდენტები დააფინანსა, რომლებიც სამშობლოში დაბრუნების შემდეგ საჯარო სექტორში დასაქმდებიან და ცოდნას საკუთარ ქვეყანას მოახმარენ. 2 წლის განმავლობაში 147 სტუდენტის სწავლა დაფინანსდა. 
საქართველოს ეკონომიკური ზრდის მაჩვენებელი ამ ეტაპზე 6 პროცენტია. მსოფლიო ბანკის 2014 წლის ანგარიშით, ეკონომიკური ზრდის მაჩვენებლის მიხედვით, რეგიონში ქვეყანა არის პირველ ადგილზე, ხოლო მსოფლიო ბანკის წევრ ქვეყნებს შორის - მეორე ადგილზე. 
გაუმჯობესებულია ეკონომიკური მაჩვენებლები - რამდენიმე ავტორიტეტული საერთაშორისო რეიტინგის - „Fitch" და „Moody's" მიხედვით, საქართველოს პოზიციები სტაბილურიდან პოზიტიურამდე გაუმჯობესდა, ხოლო „გლობალური კონკურენტუნარიანობის ინდექსში" ქვეყანა 19 საფეხურით დაწინაურდა.
„განსაკუთრებული წინსვლა გვაქვს ექსპორტის კუთხით. 2012-2014 წლებში საქართველოდან ექსპორტი გაიზარდა 24 პროცენტით, მათ შორის, 2012 წელთან შედარებით, ექსპორტი ევროკავშირთან 70-პროცენტით, ხოლო რუსეთთან - 534-პროცენტით. 2 წლის განმავლობაში, ბოსტნეულის ექსპორტი გაზრდილია 53%-ით, ხილი - 91%-ით, მინერალური წყლები - 159%-ით, ღვინო - 221%-ით; ხოლო ციტრუსი - 1040%-ით", - განაცხადა პრემიერმა. 
2 წლის განმავლობაში უკვე დარეგისტრირდა და გააქტიურდა 46 ათასზე მეტი ახალი ბიზნესსუბიექტი. ასეთი მიდგომით, შემდგომ ორ წელიწადში ინტენსიურად უნდა შეიქმნას ახალი სამუშაო ადგილები. ორი წლის განმავლობაში 3 მილიონ ლარზე მეტი ბრუნვის მქონე გადამხდელების, ანუ მსხვილი გადამხდელების რაოდენობა 418-ით, ხოლო მათი ერთობლივი შემოსავალი - 4 მილიარდ ნახევარი ლარით გაიზარდა. 
„ამ ცვლილებების ლოგიკური გაგრძელებაა, რომ ჩვენთან, თბილისში 2015 წელს, ტარდება EBRD-ის წლიური შეხვედრა, რაც ჩვენს ქვეყანას კიდევ ერთხელ სათანადოდ წარმოადგენს თანამდეროვე მსოფლიოში. ჩემი ინიციატივით საქართველოში ფუძნდება „აბრეშუმის გზის საერთაშორისო ფორუმი", რაც მნიშვნელოვნად გაზრდის ჩვენს სავაჭრო-ეკონომიკურ მიმართულებებს. ჩვენი ბიუჯეტი გაიზარდა 1 მილიარდი ლარით და გახდა სოციალურად ორიენტირებული", - აღნიშნა ირაკლი ღარიბაშვილმა. 
პრემიერის შეფასებით, ბიზნესი სრულად გათავისუფლდა პოლიტიკური წნეხისგან და სახელმწიფომ შექმნა პირობები, სადაც კერძო სექტორს შეუძლია სწორად და გრძელვადიანად განვითარდეს. 
ამასთან, წარმოების განვითარების მიზნით ხორციელდება რამდენიმე პროგრამა. პრემიერმა განსაკუთრებით გამოყო „აწარმოე საქართველოში", რომლის ფარგლებშიც 25 ახალი საწარმო დაფინანსდა.
ასევე, კერძო სექტორისთვის გამოიყო სახელმწიფოს საკუთრებაში არსებული 100 საწარმო, რომელიც წლების განმავლობაში დაკეტილი იყო და ყურადღებას არავინ აქცევდა, და ბიზნესს მიეცა საშუალება, ეს ქონება შეიძინონ სიმბოლურ ფასად, 1 ლარად; 
მათ ვუდგებით გარანტორად, რათა აიღონ ბანკებიდან სესხი, ორი წლის განმავლობაში გადაიხადონ სესხის მხოლოდ 1-2 პროცენტი, ხოლო 10 პროცენტს სახელმწიფო გადაიხდის. ჩვენ ხელი უნდა შევუწყოთ და მაქსიმალურად უნდა წავახალისოთ ქართული პროდუქციის წარმოება. ჩვენ დავიწყეთ კიდევ ერთი ძალიან მნიშვნელოვანი პროგრამა მიკრო და მცირე მეწარმეობის ხელშესაწყობად. სახელმწიფო მცირე მეწარმეებსაც აძლევს საშუალებას, მიიღონ ფინანსური რესურსი და დაიწყონ სამეწარმეო საქმიანობა", - განაცხადა პრემიერმა.
სოფლის გადარჩენა ხელისუფლების ერთ-ერთი მთავარი პრიორიტეტია. 
ჩვენ ვეხმარებით მცირემიწიან ფერმერებს საგაზაფხულო სამუშაოებში - 2 წლის განმავლობაში დაიხნა 420 ათასი ჰექტარი მიწა. ყოველ წელს 800 ათასი გლეხი იღებს დახმარებას სახელმწიფოსგან. ამაში 300 მილიონამდე ლარია დახარჯული. ასეთი პრეცედენტი საქართველოში არ ყოფილა, სოფელს ასეთი დახმარება არ ახსოვს. გლეხებს უსასყიდლოდ მივაწოდეთ 9 მილიონამდე ლარის ღირებულების სათესლე მასალა, 48 მილიონ ლარამდე ღირებულების შხამქიმიკატები, 54 მილიონამდე ლარის ღირებულების ინვენტარი. და ეს ყველაფერი არ არის - ამოქმედდა შეღავათიანი აგროკრედიტის პროექტი. 2013 წლის მარტიდან გაცემულია 492 მილიონი ლარის 21 ათას 400 აგროკრედიტი. წარმოიდგინეთ, მეგობრებო, ესაა ნახევარი მილიარდის ინვესტიცია მხოლოდ ამ პროექტში და ახალი საწარმოებისთვის, რომლის უმნიშვნელოვანეს შედეგებს უახლოეს მომავალში ყველა დაინახავს. ამ პროექტის ფარგლებში, დაფინანსდა 89 ახალი საწარმო, ხოლო გადაიარაღდა 521. ინტენსიურად ვმუშაობთ სასმელი და სარწყავი წყლით სოფლების მომარაგებაზე. 35 მუნიციპალიტეტში განხორციელდა სასმელი წყლით მომარაგების 53 პროექტი. ჩატარდა პრაქტიკულად ყველა სარწყავი მაგისტრალური არხის რეაბილიტაცია. გარემონტდა 1500 ჰიდროტექნიკური ნაგებობა, ხოლო 3 ათას კილომეტრამდე სარწყავ არხს ჩაუტარდა სარეაბილიტაციო სამუშაოები. ორი წლის განმავლობაში უპრეცედენტო რთველი გვქონდა. მოდით შევადაროთ და თავად დავრწმუნდეთ, რამხელა განსხვავებაა წინა წლებთან შედარებით, რამხელა განსხვავებაა ქართული სოფლისა და გლეხის მიმართ ჩვენს დამოკიდებულებასა და წინა ხელისუფლების მიდგომებს შორის. მაშინ, როცა 2009-2011 წლებში, მთელი სამი წლის განმავლობაში გადამუშავდა მხოლოდ 88 ათას 700 ტონა ყურძენი, ჩვენი ხელისუფლების პირობებში, ბოლო 2 წლის განმავლობაში, სახელმწიფო სუბსიდიის დახმარებით, გლეხებისგან შესყიდულია 200 ათასი ტონა ყურძენი. წლების განმავლობაში ყურძნის ფასი 50-დან 90 თეთრამდე მერყეობდა, 90 თეთრი იყო მაქსიმუმი, რასაც გლეხი იღებდა. შარშან და წელს კი ყურძნის ფასი საგრძნობლად გაიზარდა და მინიმუმ ლარი ღირდა. თუმცა, რქაწითელის ფასმა ლარნახევარს, საფერავის კი - 3 ლარსა და 40 თეთრსაც კი მიაღწია. ხალხმა თავისი შრომის შედეგად 270 მილიონი ლარი აიღო. სოფელში გაჩნდა იმედი, ოჯახებს გაუჩნდათ შემოსავალი. მე ვფიქრობ, რომ სწორედ ამ იმედის გაჩენაა ჩვენი ყველაზე დიდი წარმატება. წელს პირველად სახელმწიფო ეხმარება ვაშლის მწარმოებლებს და გაიცემა სუბსიდია არასტანდარტულ ვაშლზე, რისთვისაც ჩვენ 1 მილიონ 600 ათას ლარს ვხარჯავთ. ეს სერიოზული შეღავათი იქნება ჩვენი გლეხებისთვის და ხილის მწარმოებლებისთვის. წელს სულ სხვა ვითარება გვქონდა ატმის რეალიზაციაშიც, რაც წლების განმავლობაში უდიდესი პრობლემა იყო. ატმის ექსპორტი გაზრდილია 74%-ით და შეადგინა 5.4 ათასი ტონა - ეს ნიშნავს, რომ მოსახლეობამ ატმის რეალიზაციით 5 მილიონ 500 ათასი ლარის შემოსავალი მიიღო. 
ასევე, მნიშვნელოვნადაა გაზრდილი თხილის ექსპორტი. წელს 107 მილიონი დოლარის ღირებულების თხილის რეალიზაცია მოახდინეს ჩვენმა გლეხებმა და ფერმერებმა",
- აღნიშნა პრემიერ-მინისტრმა. 
ირაკლი ღარიბაშვილის შეფასებით, მთავრობის თანმიმდევრული, გათვლილი ნაბიჯებისა და რეალური პოლიტიკის წარმოების შედეგად, ქართველ გლეხებს პროდუქცია უკვე გააქვთ რუსეთის ბაზარზე და ამავდროულად, საქართველოსთვის ევროკავშირის 500-მილიონიანი ბაზარი გაიხსნა. 
რაც შეეხება ინფრასტრუქტურულ პროექტებს, პრემიერმა ხაზგასმით აღნიშნა, რომ საქართველოში არც ერთი ინფრასტრუქტურული პროექტი არ შეჩერებულა. 
„გზებიც შენდება და ხიდებიც. დღემდე 2 მილიარდ 400 მილიონი ლარია დახარჯული. უფრო ნათელი წარმოდგენა რომ შეგექმნათ, მხოლოდ ერთ ციფრს მოვიტან. წინა ხელისუფლებამ თავის ორ ვადაში ჩქაროსნული ავტომაგისტრალის მხოლოდ 70 კილომეტრი დააგო. ჩვენმა მთავრობამ მხოლოდ ორ წელიწადში 40 კილომეტრი უკვე დააგო და წლის ბოლომდე ამ გზის კიდევ 18 კილომეტრი დაიგება. აი, ეს არის, ბატონებო, რეალობა, დანარჩენი თავად განსაჯეთ. მეტსაც გეტყვით, ჩვენ დავიწყეთ პირაქეთა და პირიქითა ხევსურეთის დამაკავშირებელი გზის გაყვანა არხოტის ხეობაში, იმ გზის, რომელიც საქართველოში არასოდეს ყოფილა. გარდა ამისა, რეგიონებში ვახორციელებთ უამრავ პროექტს. ავაშენეთ 16 ახალი ხიდი, რეაბილიტაცია ჩაუტარდა 554 კილომეტრ გზას და 87 ხიდს. ჩვენი მიზანია საბოლოოდ გზებისა და ხიდების პრობლემა არც ერთ სოფელში არ დარჩეს", - აღნიშნა პრემიერმა. 
ირაკლი ღარიბაშვილის განმარტებით, 21-ე საუკუნეში, წინა ხელისუფლების მიერ ლამის სინათლის ქვეყნად გამოცხადებულ საქართველოში, ჯერ კიდევ იყო სოფლები, სადაც არასოდეს ანთებულა სინათლე და ხალხი სანთლის შუქზე ცხოვრობდა. 
ხელისუფლება, დაიწყო უშუქო სოფლების ელექტრიფიცირება და უკვე განათდა 8 უშუქო სოფელი. ამჟამად კიდევ 20 სოფლის განათების სამუშაოები მიმდინარეობს. 
„გარდა ამისა, 117 ათასზე მეტ აბონენტს უკვე მიეწოდება ბუნებრივი აირი. ჩვენ მაქსიმალურად ვცდილობთ ხელი შევუწყოთ ჩვენს მოქალაქეებს ცხოვრების ნორმალური პირობების შექმნაში. ჩვენ შევამცირეთ ტარიფები, მართალია მცირედით, მაგრამ, ამით ჩვენმა მოსახლეობამ 110 მილიონი ლარი დაზოგა", - განაცხადა ირაკლი ღარიბაშვილმა. 
მთავრობის მეთაური ჰიდროელექტროსადგურების თემასაც შეეხო და განაცხადა, რომ უკვე ამუშავდა 7 ახალი ჰიდროელექტროსადგური და მხოლოდ ენერგეტიკაში 347 მილიონი დოლარის პირდაპირი უცხოური ინვესტიცია განხორციელდა. 
„ვიცი, რომ საზოგადოებას აღელვებს ჰიდროელექტროსადგურების მშენებლობის საკითხი და ამიტომ მინდა ხაზგასმით ვთქვა, რომ ჩვენ არ ვიღებთ არც ერთ გადაწყვეტილებას ისე, თუ არა გვაქვს კვალიფიციური ექსპერტული დასკვნა და მხოლოდ ამის შემდეგ ვიწყებთ პროექტების განხორციელებას. გარდა ჰიდროელექტროსადგურებისა, ჩვენ ვმუშაობთ ალტერნატიულ წყაროებზეც. დავიწყეთ ქარის სადგურების პროექტის განხორციელება", - აღნიშნა პრემიერმა. 
ხელისუფლების ერთ-ერთ მთავარ მიღწევად პრემიერ-მინისტრმა დეპოლიტიზებული პოლიცია დაასახელა. 
ირაკლი ღარიბაშვილის განმარტებით, დღეს ვერავინ იტყვის, რომ ქვეყანაში პოლიცია ვინმეს პოლიტიკური ნიშნით დევნის ან რომელიმე პოლიტიკური ძალის სამსახურშია. 
„გაუქმდა სადამსჯელო ორგანიზაციები - სოდი და კუდი. განადგურდა უკანონოდ მოპოვებული პირადი ცხოვრების ამსახველი ათასობით ვიდეო ჩანაწერი. ეს იყო სირცხვილი, რომლის განმეორებას ჩვენ აღარასდროს დავუშვებთ! აშენდა და რეკონსტრუქცია ჩაუტარდა შინაგან საქმეთა სამინისტროს 100-ზე მეტ ობიექტს. 2013 წლიდან შინაგან საქმეთა სამინისტროს მრავალშვილიანი თანამშრომლები ყოველთვიურ 200-დან 500 ლარამდე დახმარებას იღებენ. ასევე, ფინანსდება თანამშრომელთა და მათი ოჯახის წევრთა მკურნალობის ხარჯები, როგორც საქართველოში, ასევე საჭიროების შემთხვევაში, მის ფარგლებს გარეთ. 2014 წლის 5 თვის განმავლობაში სამინისტროს თანამშრომელთა მკურნალობაზე 1 მილიონ 75 ათასი ლარი დაიხარჯა", - განაცხადა პრემიერმა. 
მთავრობის მეთაურის განმარტებით, განსაკუთრებული ყურადღება ეთმობა საზღვრის დაცვას - საქართველო-რუსეთის სახელმწიფო საზღვრის მონაკვეთზე აშენებულია 3 ახალი სასაზღვრო სექტორი; საქართველო-აზერბაიჯანის მონაკვეთზე - 2 სასაზღვრო სექტორი; საქართველო-სომხეთის მონაკვეთზე - 4 სასაზღვრო სექტორი; საქართველო-თურქეთის მონაკვეთზე აშენებულია 1 სასაზღვრო სექტორი. 2014 წლის ბოლოსთვის კიდევ 3 ახალი სასაზღვრო სექტორი გაიხსნება.
როგორც პრემიერმა აღნიშნა, 2014 წლის თებერვლიდან მესაზღვრეებს ხელფასები მნიშვნელოვნად გაეზარდათ. საერთაშორისო კვლევების მიხედვით, წინა წლებთან შედარებით, საქართველოს პოზიცია ორგანიზებულ დანაშულთან ბრძოლაში 48 საფეხურით გაუმჯობესდა. 
ცვლილებები, რომლებიც ამ 2 წლის განმავლობაში განხორციელდა, პრემიერის განცხადებით, ყველაზე მეტად იგრძნობა სასჯელაღსრულების სისტემაში. 
როგორც ირაკლი ღარიბაშვილმა აღნიშნა, გაუმჯობესდა სასჯელის მოხდის პირობები - დაიხვეწა საკანონმდებლო ბაზა და მოწესრიგდა ინფრასტრუქტურა. გარდა ამისა, მუშაობს სპეციალური პროგრამა C ჰეპატიტით და ტუბერკულოზით დაავადებული პატიმრების მკურნალობისათვის. 
ცვლილებებია თავდაცვის სფეროშიც. პრემიერის შეფასებით, საქართველოს ჯარი არასოდეს ყოფილა ისე ახლოს ნატოს სტანდარტებთან, როგორც ახლა. 
„ჩვენ ვზრუნავთ ჩვენს სამხედროებზე. 2013 წლიდან ჩვენ გავზარდეთ შეიარაღებული ძალების სამხედრო მოსამსახურეების ხელფასები 20-25 პროცენტით. ჩვენ არ ვივიწყებთ მათაც, ვინც თავი შესწირა სამშობლოსათვის ბრძოლას. დაღუპულებს ვერავინ გააცოცხლებს და მათი დაკარგვით მიყენებულ ტკივილს ვერაფერი მოაშუშებს, მაგრამ ჩვენ ვალდებული ვართ, მაქსიმალურად დავუდგეთ გვერდში მათ ოჯახებს, ეს სახელმწიფოს ვალდებულებაა. 2014 წლიდან საქართველოს ერთიანობისა და დამოუკიდებლობისათვის ბრძოლებში, საერთაშორისო მისიებში დაღუპული სამხედრო მოსამსახურეების ოჯახებს დაენიშნათ ყოველთვიური კომპენსაცია 500 ლარის ოდენობით, 2015 წლიდან კი კომპენსაცია 1000 ლარი გახდება. ჩვენი გადაწყვეტილებით, საერთაშორისო მისიებში დაღუპული ჯარისკაცების ოჯახების კომპენსაცია გახდა 100 ათასი ლარი, რაც მანამდე მხოლოდ 15 ათას ლარს შეადგენდა", - განაცხადა ირაკლი ღარიბაშვილმა. 
პრემიერის განმარტებით, განხორციელდა იუსტიციის უმაღლესი საბჭოს სრული დეპოლიტიზაცია, გაიზარდა მოსამართლეთა ჩართულობა საბჭოს მოსამართლე წევრთა არჩევის პროცესში; პოლიტიკოსების ნაცვლად საბჭოს არასამოსამართლე წევრებად სამოქალაქო საზოგადოებისა და აკადემიური წრეების წარმომადგენლები აირჩევიან. 
განხორციელებულმა მართლმსაჯულების რეფორმამ, ხელისუფლების გაცხადებულ პოლიტიკურ ნებასთან ერთად, ხელი შეუწყო სასამართლოს დამოუკიდებლობის უზრუნველყოფას. რეგიონებში უკვე გაიხსნა 12 და წლის ბოლომდე გაიხსნება 5 ახალი საზოგადოებრივი ცენტრი, რომელიც 100 ათას მოქალაქეს მოემსახურება და სოფლიდან გაუსვლელად 200-ზე მეტი სერვისის მიღება იქნება შესაძლებელი", - აღნიშნა ირაკლი ღარიბაშვილმა. 
პრემიერმა გამყოფი ხაზის მიმდებარე სოფლებთან დაკავშირებითაც ისაუბრა და განაცხადა, რომ ხელისუფლება იქ მცხოვრებ ადამიანებს უყურადღებოდ არ ტოვებს - 39 სოფელში უკვე აღდგენილია სარწყავი წყლის მიწოდება, 4 სოფელს მიეწოდება სასმელი წყალი, შეკეთებულია გზები, აშენდა ამბულატორია, გაზიფიცირებულია ყველა - 58 სოფელი. გამყოფი ხაზის გასწვრივ, 50 სოფლის 11 ათასზე მეტმა ოჯახმა ზამთარში გათბობისთვის 200-ლარიანი დახმარება მიიღო. სახელმწიფო დაფინანსება მიიღეს იმ სტუდენტებმა, რომლებიც გამყოფი ხაზის მიმდებარე სოფლებიდან არიან. 
„მე ძალიან კარგად ვიცი, თუ როგორი მძიმე, დაძაბული შეიძლება იყოს მათი ცხოვრება. ამიტომ მინდა აქედან შევეხმიანო თითოეულ ოჯახს და მადლობა გადავუხადო გამძლეობისთვის. ასევე, მინდა კიდევ ერთხელ შევეხმინო ჩვენს აფხაზ და ოს ძმებს - ჩვენ ერთი მიწის შვილები ვართ, ერთი ტკივილი გვაერთიანებს და ერთად უნდა გავაგრძელოთ გზა მომავლისაკენ",
- განაცხადა პრემიერ-მინისტრმა და აფხაზებს აფხაზური ენის დღე მიულოცა. 
მთავრობის მეთაური დარწმუნებულია, რომ მხოლოდ საქართველოში, ქართველების გვერდით შეძლებენ აფხაზები საკუთარი ენის, კულტურისა და თვითმყოფადობის შენარჩუნებას. 
"ჩვენ ძალიან მძიმე წარსული გადავიტანეთ ყველამ ერთად, იყო ძალიან მძიმე შეცდომები, მაგრამ დღეს ჩვენ ვცხოვრობთ 21-ე საუკუნეში და ჩვენ გთავაზობთ, ვიცხოვროთ ერთიან, ძლიერ საქართველოში. მე მჯერა, რომ თქვენ შეიძლება ჯერ კიდევ გაქვთ ნდობის პრობლემა, მაგრამ შეხედეთ ჩვენს პოლიტიკას, ჩვენს მიდგომას. ჩვენ რეალურად გვაქვს ძალიან დიდი წინსვლის პერპექტივა, მაგრამ ჩვენ არ გვინდა განვითარება თქვენს გარეშე. ასე რომ, კიდევ ერთხელ, მინდა მოგიწოდოთ ყველას - ჩვენს აფხაზ და ოს ძმებს, კიდევ ერთხელ კარგად გააანალიზეთ და დაფიქრდით, რომ ეს არის ერთიანი საქართველოს ტერიტორია. თქვენ იყავით ავტონომიური რესპუბლიკა და ჩვენ გთავაზობთ იგივეს, რომ გქონდეთ ავტონომია, მაგრამ ერთიანი, ძლიერი საქართველოს ფარგლებში და ვიცხოვროთ მშვიდად. ეს არის ჩემი კიდევ ერთი ძმური და მეგობრული შემოთავაზება", - აღნიშნა პრემიერმა. 
ხელისუფლებამ ასევე დაიწყო კულტურული მემკვიდრეობის გადარჩენის, ძეგლთა აღდგენისა და დაცვის ისეთი მასშტაბური პროექტები, როგორიცაა მუცოს გადარჩენა, ჩაჟაშისა და დართლოს რეაბილიტაცია. უკვე დაწყებულია ვარძიის გადარჩენის პროექტი.
„ის, რასაც ჩვენ ვაკეთებთ, არ იქნება ძეგლების ფასადური აღდგენა მხოლოდ ვიზუალური ეფექტის მოსახდენად. ძეგლების რესტავრაცია მოხდება ისე, რომ მათ შეუნარჩუნდეთ პირვანდელი სახე. ჩვენ არავითარ შემთხვევაში არ დავუშვებთ იმას, რაც, სამწუხაროდ, ბაგრატის ტაძარს დაემართა. ჩვენი კულტურა სულ უფრო საინტერესო უნდა გავხადოთ მთელი მსოფლიოსათვის. მე მინდა გითხრათ, რომ 2018 წელს საქართველო ფრანკფურტის წიგნის ბაზრობაზე საპატიო სტუმარი ქვეყნის სტატუსით წარდგება, რაც დიდი პატივია ჩვენი ქვეყნისთვის", - აღნიშნა პრემიერ-მინისტრმა. 
ირაკლი ღარიბაშვილის განცხადებით, საქართველოს შეუძლია, ქართული კულტურა მსოფლიოს ტურიზმის მეშვეობითაც გააცნოს. პრემიერი მოხარულია, რომ ვიზიტორების რაოდენობამ 10 მილიონს მიაღწია, რასაც, რა თქმა უნდა, კულტურულთან ერთად მნიშვნელოვანი ეკონომიკური შედეგიც მოჰყვა - შემოსავალმა 2-მილიარდ-ნახევარი დოლარი შეადგინა.
სახელმწფო სპორტის მხარდაჭერის პროგრამასაც ახორციელებს, რისთვისაც 47 მილიონამდე ლარია გამოყოფილი. 
„ამჟამად ვემზადებით 2015 წლის ევროპის ახალგაზრდული ოლიმპიადის მასპინძლობისთვის, რომელსაც, დარწმუნებული ვარ, ყველა საერთაშორისო სტანდარტის დაცვით ჩავატარებთ. 2015 წელს თბილისში ჩატარდება უეფას სუპერ თასის ფინალური მატჩი, რაც ნამდვილი დღესასწაული იქნება ფეხბურთის გულშემატკივრებისთვის", - განაცხადა პრემიერ-მინისტრმა. 
ირაკლი ღარიბაშვილმა საერთაშორისო ასპარეზზე არსებულ მიღწევებზეც ისაუბრა და განაცხადა, რომ ევროკავშირთან ასოცირების შეთანხმების ხელმოწერამ ქვეყანა განვითარების სრულიად ახალ ეტაპზე გადაიყვანა. 
„დღეს საქართველოს ეძლევა ისტორიული შანსი დაუბრუნდეს თავის ბუნებრივ გარემოს - ევროპას, მის პოლიტიკურ, ეკონომიკურ, სოციალურ და კულტურულ სივრცეს. ასოცირების შეთანხმებით საქართველო იღებს ვალდებულებას ქვეყანაში ეტაპობრივად დანერგოს ევროპული პოლიტიკური, ეკონომიკური, სოციალური და სამართლებრივი სტანდარტები, რაც ჩვენს ქვეყანასა და ხალხს კეთილდღეობასა და სტაბილურობას მოუტანს. ასოცირების შეთანხმება გახლავთ ჩვენი ქვეყნის ევროპეიზაციის და რეალური მოდერნიზაციის სამოქმედო გეგმა. ყველა სახელმწიფო უწყება დღეს უკვე სწორედ ამ გეგმით მუშაობს, რათა შეუქცევადი გახდეს ჩვენი ევროინტეგრაციის პროცესი", - აღნიშნა პრემიერმა. 
მთავრობის მეთაურის განმარტებით, წარმატებით ხორციელდება ევროკავშირთან სავიზო რეჟიმის ლიბერალიზაციის სამოქმედო გეგმით გათვალისწინებული ღონისძიებები.
როგორც ირაკლი ღარიბაშვილმა აღნიშნა, საქართველოს დიდი მხარდაჭერა აქვს დასავლელი პარტნიორებისა და მეგობრებისგან, რომლებიც უპირობოდ უჭერენ მხარს ქვეყნის ტერიტორიულ მთლიანობას. 
„არაღიარების პოლიტიკა ჩვენი საგარეო პოლიტიკის ქვაკუთხედია, და ამ ორ წელიწადში ჩვენ ამ მხრივაც გვაქვს მნიშვნელოვანი წარმატება - ორმა ქვეყანამ უარი თქვა ოკუპირებული ტერიტორიების დამოუკიდებლობის აღიარებაზე და მხარი დაუჭირა საქართველოს ტერიტორიულ მთლიანობას. დარწმუნებული ვარ, რომ ეს პროცესი გაგრძელდება და სასურველ შედეგებამდე მივალთ", - განაცხადა პრემიერმა. 
ირაკლი ღარიბაშვილის განმარტებით, ქვეყნისთვის ამ უმნიშვნელოვანეს ეტაპზე განსაკუთრებული პასუხისმგებლობა ეკისრება როგორც ხელისუფლებას, ისე ხალხს. 
მთავრობის მეთაური დარწმუნებულია, რომ საქართველო წარმატებით გადალახავს ყველა სირთულეს და ამ გარდამტეხ პერიოდს ღირსეულად გაივლის. 
და მაინც, ხშირად ისმის კრიტიკა, მაგრამ ჩვენ არ ვაპირებთ ამ კრიტიკის, გამო, თუნდაც სრულიად უსაფუძვლო კრიტიკის გამო, დავიჭიროთ ადამიანები, მათი ოჯახის წევრები, დავაშინოთ მათი შვილები და მშობლები (რაც უახლეს წარსულში, სრულიად სამარცხვინოდ, უამრავმა ჩვენმა მოქალქემ საკუთარ თავზე გადაიტანა). ჩვენ განსხვავებული აზრის გამო არასდროს ხელვყოფთ კერძო საკუთრებას, არ შევიჭრებით ტელევიზიაში და სამაგალითოდ არ დავსჯით ჟურნალისტებს მათი სიუჟეტების გამო. ჩვენ არ ვაწამებთ ადამიანებს და ამით არ დავაშანტაჟებთ მათ ახლობლებს. ჩვენ არასდროს შევქმნით ჩვენგანვე მართულ ოპოზიციას, საკუთარ, დაქირავეულ ექსპერტებს და ჟურნალისტებს. და ჩვენ ამას არ გავაკეთებთ ერთადერთი მიზეზით - ჩვენ ეს არ გვჭირდება! ჩვენ საქმეს ვაკეთებთ ადამიანებისთვის და თუ მათ დავუკარგეთ ღირსება, მაშინ აღარაფერს არ აქვს აზრი! ჩვენ აღარასდროს დავუშვებთ შეშინებულ და დასტრესილ საზოგადებას, რადგან ჩვენ თავისუფალი საზოგადების შექმნას ვუწყობთ ხელს. ჩვენ ადამიანების თავისუფლებას და ღირსებას ვცემთ პატივს! ჩვენ მათთვის ვმუშაობთ და მათ წინაშე ვგრძნობთ პასუხისმგებლობას! და ყველა შედეგი, რასაც აქამდე მივაღწიეთ და რასაც მივაღწევთ უახლეს მომავალში, სწორედ ჩვენი ქვეყნის თითოეული მოქალაქისთვის, მისი თავისუფლებისა და ღირსებისთვის გვინდა!"- განაცხადა პრემიერ-მინისტრმა.



 ახალი ამბები
  • როგორი ამინდია მოსალოდნელი უახლოეს დღეებშიგარემოს ეროვნული სააგენტოს ინფორმაციით,  28-30 სექტემბერს დასავლეთ საქართველოში შენარჩუნებული იქნება თბილი და უმეტესად უნალექო ამინდი. ზოგან იქროლებს აღმოსავლეთის მიმართულების ძლიერი ქარი. ჰაერის ტემპერატურა +27, +32 გრადუსის ფარგლებში იქნება. 1 ოქტომბერს გაწვიმდება, ტემპერატურა +23, +28 გრადუსამდე დაიკლებს. აღმოსავლეთ საქართველოში კი მოსალოდნელია შედარებით გრილი და დროგამოშვებით ღრუბლიანი ამინდი. ზოგან შესაძლებელია მცირე წვიმა და ნისლი აღინიშნოს. ჰაერის ტემპერატურა +19, +24 გრადუსის ფარგლებშია მოსალოდნელი. თბილისში შესაძლებელია მცირე წვიმა და ნისლი. ჰაერის ტემპერატურა +21, +23 გრადუსი ... ...
  • პენიტენციური სამსახური: ადვოკატი კობაიძე პოლიტიკური ხასიათის წინასაარჩევნო ინსცენირებებშია ჩართული (R)სპეციალურმა პენიტენციურმა სამსახურმა საქართველოს ადვოკატთა ასოციაციის ეთიკის კომისიას მიმართა საჩივრით, რომლითაც ის ითხოვს ეთიკის კომისიამ შეაფასოს და შესაბამისი რეაგირება მოახდინოს ადვოკატ ალექსანდრე კობაიძის ქმედებებთან დაკავშირებით. კერძოდ, მიმდინარე წლის 25 სექტემბერს რამდენიმე ტელეარხის მიერ გავრცელდა ინფორმაცია ადვოკატ ალექსანდრე კობაიძის საპროტესტო აქციის შესახებ. ადვოკატი მტკიცებით ფორმაში საუბრობდა მსჯავრდებულთა მიმართ გაუპატიურებით დამუქრებაზე N8 დაწესებულების დირექტორის მხრიდან. პენიტენციური სამსახურის მიერ ადვოკატთა ასოციაციისათვის გაგზავნილ საჩივარში აღნიშნულია, რომ გავრცელებული ინფორმაცია არის ცილისწამება, ადვოკატი კობაიძე ორჯერ იქნა მიწვეული ფაქტების ან ინფორმაციის წარსადგენად მის მიერ გაჟღერებულ ბრალდებასთან დაკავშირებით, რაზეც მან უარი განაცხადა. პენიტენციური სამსახური გამოთქვამს მზაობას, ადვოკატთა ასოციაციის დაინტერესების შემთხვევაში, სრულად ითანამშრომლოს მასთან და მიაწოდოს სრულფასოვანი მტკიცებულებები, რომელიც ადასტურებს, რომ საქმე გვაქვს პოლიტიკური ხასიათის წინასაარჩევნო ინსცენირებებთან, რომელშიც ადვოკატი კობაიძე არის ჩართული. ასევე საჩივარში აღნიშნულია, რომ საეჭვოდ და პრობლემატურად გამოიყურება ამ ქმედებებში ალექსანდრე კობაიძის დიდი მონდომება პენიტენციური დაწესებულების დისკრედიტაციისთვის. ალექსანდრე კობაიძე არის პოლიტიკური პარტიის ლიდერი და აქვს საპარლამენტო არჩევნებში მონაწილეობის გაცხადებული გეგმა. როგორც ჩანს, ამ მიზნით ალექსანდრე კობაიძე არ ერიდება არც ტყუილს და არც პატიმრებისა და საპატიმროების თემით არაკეთილსინდისიერ მანიპულირებას. სპეციალური პენიტენციური სამსახური მიიჩნევს, რომ ადვოკატის მოცემული ქმედებები ნამდვილად არ შეუწყობს ხელს საზოგადოებაში ადვოკატის პროფესიის რეპუტაციისა და ადვოკატთა კორპუსის ავტორიტეტის ზრდას. ამიტომაც, თავად ადვოკატთა ასოციაციის ინტერესშია, რომ შეფასდეს და შესაბამისი რეაგირება მოჰყვეს ადვოკატ კობაიძის ზემოთ აღწერილ ქმედებებს. ... ...
  • ირანის მოქალაქის ჯანმრთელობის განზრახ მსუბუქი დაზიანების ბრალდებით 2 პირი დააკავესშინაგან საქმეთა სამინისტროს თბილისის პოლიციის დეპარტამენტის გლდანი-ნაძალადევის მთავარი სამმართველოს თანამშრომლებმა, ცხელ კვალზე ჩატარებული ოპერატიულ-საგამოძიებო მოქმედებების შედეგად, 1983 წელს დაბადებული შ.ლ. - ჯანმრთელობის განზრახ მსუბუქი დაზიანების ბრალდებით, ხოლო 1984 წელს დაბადებული ვ. შ. ძალადობის ბრალდებით, თბილისში დააკავეს. დანაშაულები 3 წლამდე ვადით თავისუფლების აღკვეთას ითვალისწინებს. გამოძიებით დადგინდა, რომ შ.ლ.-მ თბილისში, ცოტნე დადიანის ქუჩაზე, ერთ-ერთი სკვერის მიმდებარე ტერიტორიაზე, ირანის რესპუბლიკის მოქალაქეს -1987 წელს დაბადებულ ვ.რ.-ს, ურთიერთშელაპარაკების ნიადაგზე, ცივი იარაღით სხეულზე ორი მსუბუქი ჭრილობა მიაყენა და მიიმალა. დაშავებული მამაკაცი სამედიცინო დაწესებულებაში გადაიყვანეს. მისი ჯანმრთელობის მდგომარეობა დამაკმაყოფილებელია. სამართალდამცველებმა შ.ლ. მომხდარიდან რამდენიმე საათში, ცხელ კვალზე დააკავეს. იგი დანაშაულს აღიარებს. პოლიციამ დანაშაულის ჩადენის იარაღი - დანა ნივთმტკიცების სახით ამოიღო. გამოძიებით, ასევე, დადგინდა, რომ ამავე ინციდენტის დროს, შ.ლ.-ს თანმხლებმა - ვ.შ.-მ ბლაგვი საგნით სხეულზე დაზიანება მიაყენა ვ.რ.-ს თანმხლებ ირანის მოქალაქეს. ჯანმრთელობის განზრახ მსუბუქი დაზიანების და ძალადობის ფაქტზე გამოძიება სისხლის სამართლის კოდექსის 120-ე და 126-ე მუხლებით ... ...
  • ავტოსაგზაო შემთხვევა ფოთში _ არიან დაშავებულებიცოტა ხნის წინ ავტოსაგზაო შემთვევხევა მოხდა ფოთში. როგორც ადგილიდან "გურია ნიუსისს" ჟურნალისტი იუწყება, მსუბუქი ავტომობილი გზის სავალი ნაწილიდან გადავიდა და ხეს შეეჯახა. წინასწწარი ინფორმაციით, დაშავებულებია ოთხი მგზავრი. შსს-მ მომხდარზე გამოძიება სსკ-ის 276-ე მუხლის მე-2 ნაწილით დაიწყო. ... ...
  • “მინდოდა ჩემი შვილის გვერდით ვყოფილიყავი და ყველაფერ საშინელებას ვუძლებდი“83 წლის ლამარა წიქარიძე აფხაზეთის ომში გმირულად დაღუპული ზური წიქარაძის დედაა.  “მე ვარ 83 წლის. ვმუშაობ შეძლებისდაგვარად ჩაის პლანტაციებში. ჯანმრთელად ვარ და არანაირ ავადმყოფობას არ ვგრძნობ. ვფიქრობ, რომ ცოტა ხანი ვიცოცხლო და ვიცხოვრო ჩემი შვილიშვილების ხათრით“, _ ამბობს “გურია ნიუსთან“ საუბრის დროს ლამარა წიქარაძე. ლამარა წიქარაძე ოზურგეთის მუნიციპალიტეტის სოფელ ნაგომარში ცხოვრობს. იმ დროს, როდესაც აფხაზეთში ომი დაიწყო, ის მეუღლესთან სოსო წიქარიძესთან ერთად იმყოფებოდა სოხუმში. ლამარა წიქარაძე: გურიაში ვაპირებდით ჩამოსვლას, რადგან ზურის შვებულება ეწყებოდა. შვებულების ფურცელზე ხელი არ ჰქონდა მოწერილი იმ სამსახურის უფროსს, სადაც ზური მუშაობდა და ამიტომ გაგვიგრძელდა ყოფნა სოხუმში. აფხაზეთის ომში ჩემი შვილი ზური წიქარიძე გმირულად გარდაიცვალა. ის სოხუმში თან სწავლობდა და თან მუშაობდა. ის იყო სასოფლო-სამეურნეო ინსტიტუტის მესამე კურსის სტუდენტი, როდესაც ომი დაიწყო. ჩემი შვილი შინაგან ჯარში მუშაობდა და ომის დროს ქალაქიდან არ უნდა გასულიყო, მაგრამ... მას სთხოვეს დახმარება და წაიყვანეს სოფელ შრომაში. სოფელზე, სადაც ისინი წავიდნენ, მოხდა თავდასხმა, მოულოდნელი თავდასხმა იყო. მან გადაწყვიტა თავის მეგობართან ერთად ახალგაზრდები (ჯარში 25 ახალგაწვეულის სიცოცხლე იხსნა ზურიმ და მისმა მეგობრებმა) გამოეყვანა სამშვიდობოს. მოახერხეს კიდეც, იბრძოდა მანამ, სანამ ტყვიები, არ დაუმთავრდათ. ამის შემდეგ კი დაიჭერეს რუსმა სამხედროებმა და ცოცხლად დაწვეს. ჩემმა მეუღლემ კი დაიწყო გარდაცვლილი შვილის ძებნა, უიარაღოდ იყო და ისე ეძებდა. მან იპოვა ზურის დამწვარი სხეული და განადგურებულებმა ჩამოვასვენეთ ოზურგეთში, სოფელ ნაგომარში. მინდოდა ჩემი შვილის გვერდით ვყოფილიყავი და ყველაფერ საშინელებას ვუძლებდი. ერთ ამბავს კიდევ გავიხსენებ... ბოლოს, ძებნა რომ გაგვიჭირდა ჩემი შვილის, ბატონ ჟიული შარტავასთავან მივედი განცხადებით. მან კი მითხრა, არ მინდა განცხადება, ქალბატონო, თქვენ სახეზეც ვკითხულობ, როგორ იწვით ახლაო. ისე გააკეთა, რომ კიდევ ორი დღე მოგვცა შვილის ძებნის უფლება. არ გვქონდა უკვე ქართველებს ჩვენს მიწაზე თავისუფლად გადაადგილების უფლება. ამის შემდეგ სასწაული მოხდა და ვნახეთ ჩემი შვილი. ლამარა წიქარიძე ჩვენთან საუბრის დროს აცხადებს, რომ რუსეთი ოკუპანტი ქვეყანაა და ის მშვიდობიანი გზით დაკარგულ ტერიტორიებს არ გადმოგვცემს. “ომით დაკარგულ ტერიტორიას ომით დაბრუნება უნდა, სხვანაირად დაკარგულ ტერიტორიებს ვერ დავიბრუნებთ. მე, არ მჯერა რუსეთის კეთილსინდისიერების. აფხაზეთში იბრძოდნენ რუსები და ისინი აპირისპირებდნენ ქართველებს და აფხაზებს. თქვენ გგონიათ აფხაზები იბრძოდნენ თავიანთი ძმების წინააღმდეგ? ჩვენი ტანკები დაჩახჩახებდნენ, დანგრეულები. რუსების ტანკები კი დასრიალებდნენ, ანგრევდნენ შენობებს, გადამცემ ხაზებს, ელექტრო ბოძებს. ყველაფერი ჩემი თვალით ვნახე, რადგან ვიდრე ჩემი გარდაცვლილი შვილი არ ვნახე, მანამ არ დამიტოვებია სოხუმი.“ ზურის დაღუპვის შემდეგ, რამდენი თვეში სოფელ ნაგომარში მამამისი, სოსო წიქარიძე გარდაიცვალა. “10 წლის განმავლობაში სახლიდან არ გადავდიოდი. მაგრამ შემდეგ დავარწმუნე თავი, რომ ასე ცხოვრება აღარ შეიძლებოდა. შვილებს და შვილიშვილებს დახმარება უნდოდათ. ახლა კი მყავს ორი შვილი, შვიდი შვილიშვილი და ხუთი შვილთაშვილი. მინდა, რომ ეს თაობა მოესწროს საქართველოს მთლიანობას და მშვიდობიან ქვეყანაში ... ...

არქივი

ტესტები

ტესტი _ რა იცი ჰოლივუდის ვარსკვლავების შესახებ

ლეონარდოს დი კაპრიოს სახელი ლეონარდო...

ტესტი _ რამდენად ერკვევი სხვადასხვა სფეროში

რომელია ყველაზე პატარა სახელმწიფო მსოფლიოში?

ტესტი _ რა იცი მსოფლიოს ღირშესანიშნაობების შესახებ?

რომელმა ქვეყანამ აჩუქა აშშ-ს თავისუფლების...

ტესტი _ იკვებებით თუ არა სწორად?

ყოველდღე ჭამთ უმ ბოსტნეულს, სალათებს?

ტესტი _ რა გახსოვს სკოლიდან?

გამოქვაბულში ქვევიდან ზევით აღმართულ წარმონაქმნებს...

ტესტი _ იცი თუ არა ფეხბურთის ისტორია

ვის გაუტანა 1986 წელს მარადონამ...

კარმიდამო ჩემი

დროა, მივეჩვიოთ ბუნებრივი რესურსების ეკონომიურად ხარჯვას

პლანეტის გლობალური კლიმატური ცვლილებები ბევრ...

როგორ მოვრწყოთ ვარდები _ ნუ გამოვიყენებთ სუფთა წყალს

ყვავილები, განსაკუთრებით, ვარდები, ყველას უყვარს....

ჩითილების მომზადება კოშტების და ნახერხის დახმარებით

ჩვენი გამოცდილი მეურნეები, სხვადასხვა ხალხურ...

რომელი მცენარეა ფშატი?

ჩვენი არა ერთი მკითხველის გვთხოვს,...

ხალხური მედიცინა დეზინფექციისთვის

სისუფთავის ხარისხი იქ, სადაც ადამიანი...

"საშობაო ლიქიორის" მომზადების ყველაზე შედეგიანი მეთოდი

ძალზე პოპულარული, "საშობაო ლიქიორის" მომზადების...

ყაბაყის ტორტი

საჭირო მასალა: ორი ცალი ყაბაყი,...

სტაფილოს სალათი ცერეცოთი

საჭირო მასალა: სამი ცალი სტაფილო,...

სოკოს სალათი შებოლილი ქათმის ხორცით

ეს უგემრიელესი სალათი უნდა მოვამზადოთ...
free polls