"მოსახლეობამ უნდა გადაწყვიტოს, ვინ იქნება ხელისუფლებაში და არა ვიღაც გაქცეულმა პიროვნებამ"

მთავარი თემა

"მოსახლეობამ უნდა გადაწყვიტოს, ვინ იქნება ხელისუფლებაში და არა ვიღაც გაქცეულმა პიროვნებამ"

2015 ნოე 26 17:20:25

"გურია ნიუსის" ექსკლუზიური ინტერვიუ ვიცეპრემიერ, ენერგეტიკის მინისტრ კახი კალაძესთან.

_ ბატონო კახი, პარტიულ შეკრებაზე თქვით, რომ სამი წლის განმავლობაში პარტიის დასალაგებლად ვერ მოიცალეთ. ახლა რას და როგორ ალაგებთ?

_ ამ სამი წლის განმავლობაში გავიარეთ სამი ძალიან მნიშვნელოვანი _ საპარლამენტო, საპრეზიდენტო და ადგილობრივი თვითმმართველობის არჩევნები, რომელსაც მართლაც მაღალი შეფასებები მოყვა ჩვენი სტრატეგიული და ევროპელი პარტნიორებისგან. მართლაც ღირსეულად გამოვიდა "ქართული ოცნება" და წარმატებასაც მიაღწია. რაც შეეხება პარტიის მიმართულებას _ ამ დროის განმავლობაში, იმის გამო, რომ სულ შტაბურ რეჟიმში ვიმყოფებოდით და არჩევნებიდან არჩევნებამდე ვიყავით, პარტიის სტრუქტურულად ჩამოყალიბება, მისი გაძლიერება ვერ მოხერხდა. დღეს უკვე გვაქვს ამის რეალური შესაძლებლობა. რამდენიმე თვეა, ამ მიმართულებით ვმუშაობ. პარტიაში დანიშნული იქნა აღმასრულებელი მდივანი _ ირაკლი კობახიძე. იგი ყოველდღიურადაა ჩართული პარტიის მუშაობაში.

პირველი, რაც გავაკეთეთ, იყო ცენტრალური ოფისის რეორგანიზაცია. უკვე დავიწყეთ რეგიონებში გასვლა, კონფერენციების ჩატარება, იმისთვის, რომ ავირჩიოთ პარტიის რაიონული ორგანიზაციების თავმჯდომარეები, შესაბამისად, ბიუროს წევრები, რომ პარტიამ გამართულად იმუშაოს, შეძლოს დავალებების მიღება-შესრულება, იმ პრობლემების მოტანა პარტიამდე, რომელიც დროულად არის მოსაგვარებელი. 2016 წლის საპარლამენტო არჩევნები ძალიან მნიშვნელოვანია და დავიწყეთ მზადება, მუშაობა, რომ ღირსეულად შევხვდეთ ამ არჩევნებს.

_ არჩევნები კარგად ჩავატარეთო, ამბობთ, თუმცა, ამ ცოტა ხნის წინ, საგარეჯოში ჩატარებული არჩევნების გამო ადამიანები შიმშილობენ კანცელარიის წინ და არა მარტო იქ _ აქციებმა მთელი საქართველო მოიცვა. თუ შეხვდით მათ, თუ დაინტერესდით მათი ბედით?

_ მე არ შევხვედრივარ მოშიმშილეებს. პრემიერ-მინისტრმა ამასთან დაკავშირებით გააკეთა განცხადება და მოუწოდა მათ, რომ შიმშილობა შეეწყვიტათ.

ჩვენ მზად ვართ, დავსხდეთ, ერთად გავიაროთ, თუ არის კითხვები ჩატარებულ არჩევნებთან დაკავშირებით და თუ რაიმე სახის პრობლემები არსებობდა, ერთიანი ძალებით მოვაგვაროთ.

_ ცოტა ხნის წინ განაცხადეთ, რომ საზღვარგარეთ მყოფი ახალგაზრდების ჩამოყვანას გეგმავთ... საუბარი იყო ასევე პარტიის "ინტელექტ კლუბის" წევრებით შევსების შესახებ. რა სიახლეებს გეგმავთ და დარჩებიან თუ არა "ქართული ოცნების" სახეებად თამაზ მეჭიაური და გუგული მაღრაძე, რომელთა განცხადებები, ბოლო დროს საზოგადოების გაღიზიანებას იწვევს.

_ ჩვენი კარი ღიაა ყველა იმ ადამიანისთვის, ვისაც ჩვენი ქვეყანა უყვარს, ვისაც უნდა წვლილი შეიტანოს ქვეყნის განვითარებაში, გაძლიერებაში. ეს არ ეხება მხოლოდ იმ ადამიანებს, რომლებიც უცხოეთში არიან. საქართველოშიც ძალიან ბევრი განათლებული, ღირსეული, ინტელექტუალური ადამიანია, რომლებსაც აქვთ იმის რესურსი, რომ "ქართულ ოცნებაში" გაწევრიანდნენ და ემსახურონ სამშობლოს და ხალხს. რაც შეეხება კონკრეტულ პიროვნებებს, ვინც თქვენ ჩამოთვალეთ _ თამაზ მეჭიაური, გუგული მაღრაძე. ისინი იდგნენ მოსახლეობის გვერდით, დგანან დღესაც და დარწმუნებული ვარ, მომავალშიც იდგებიან. თქვენ გახსოვთ, 2011 წელს, როცა ბატონმა ბიძინა ივანიშვილმა გააკეთა განცხადება პარტიის შექმნასთან დაკავშირებით როგორი ზეწოლა, როგორი ტერორი იყო იმ ადამიანებზე, რომლებიც ღიად გამოხატავდნენ მხარდაჭერას ამ გუნდის და ბატონი ბიძინას მიმართ. ძალიან რთულად იყო მოსაძებნი ადამიანი, ვინც ღიად გამოთქვამდა პროტესტს იმ რეჟიმის წინააღმდეგ, რომელსაც სააკაშვილი წარმოადგენდა. ბატონი მეჭიაური და ქალბატონი გუგული არიან ის ადამიანები, რომლებიც პირველივე დღიდან ამ გუნდის წევრები არიან. შეიძლება არის გარკვეული კატეგორია ადამიანებისა, ვისაც არ მოსწონს მათი გამონათქვამები, განცხადებები. შეიძლება არიან გარკვეული ადამიანები, რომლებსაც კახი კალაძე არ მოსწონს და მოსწონთ სხვა ადამიანები.

_ საზოგადოების დიდი ნაწილი გააღიზიანა ქალბატონი გუგულის იმ განცხადებამ, რომლის თანახმადაც, ხელისუფლებას არა აქვს პირდაპირი ვალდებულება შექმნას სამუშაო ადგილები. არადა, ეს ხელისუფლების ერთ-ერთი საარჩევნო დაპირება იყო.

_ სამუშაოების შექმნას თავად სახელმწიფო ვერ უზრუნველყოფს. ჩვენ შეგვიძლია მხოლოდ და მხოლოდ საჯარო სამსახურში დავასაქმოთ ადამიანები, თუმცა, აქაც შეზღუდულები ვართ. ჩვენ ხელი უნდა შეუწყოთ ბიზნესს, ბიზნესმა უნდა დაასაქმოს ადამიანები, მივიღოთ ისეთი კანონპროექტები, რომლებიც ბიზნესს გაამარტივებენ. დღეს ხომ იოლია საქართველოში ბიზნესის დაწყება, კომპანიის შექმნა და არ არსებობს ბიუროკრატია, მაგრამ პროცესი კიდევ უფრო უნდა გავამარტივოთ, რომ უფრო მეტი პროექტები გახორციელდეს და მეტი ადამიანი დასაქმდეს. ხელისუფლებამ ხელი უნდა შეუწყოს და მაქსიმუმი გააკეთოს იმისთვის, რომ ბიზნესი გაძლიერდეს. ბიზნესმა უნდა შექმნას სამუშაო ადგილები. ჯაჭვურად არის ეს ყველაფერი გადაბმული ერთმანეთზე.

_ ბატონო კახი, იქნებით თუ არა "ქართული ოცნების" საპარლამენტო სიის პირველი ნომერი?

_ ვერ გეტყვით _ ამაზე გუნდში საუბარი არ ყოფილა. გულწრფელად მინდა გითხრათ, რომ ეს არ არის ჩემთვის პრიორიტეტი. ვიქნები იქ, სადაც გუნდს, ჩემს ხალხს სჭირდება. არ აქვს მნიშვნელობა პოლიტიკაში ვიქნები, ბიზნესში თუ სხვაგან. ვიყავი სპორტში და ყოველთვის ვემსახურებოდი ჩემს სამშობლოს, ჩემს ქვეყანას. სადაც გუნდს სჭირდება, იქ ვიქნები იმ ფორმით, როგორითაც საჭირო იქნება.

_ თუ გუნდს დასჭირდება, გახდებით პრემიერ-მინისტრი, რაზეც დღეს აქტიურად მიდის საუბარი? იმასაც ამბობენ, რომ ბიძინა ივანიშვილის ფავორიტი ხართ...

_ დღეს ქვეყანას ჰყავს პრემიერ-მინისტრი, ახალგაზრდა პიროვნება, "ქართული ოცნების" ლიდერი, კოალიციის თავმჯდომარე ირაკლი ღარიბაშვილი. ვფიქრობ, რომ ის წარმატებული პრემიერ მინისტრია. ახალგაზრდა კაცია და ჩვენ, მთლიანად მთელი გუნდი, მაქსიმალურ თანადგომას ვუცხადებთ მას. ძალიან ბევრ მნიშნელოვან პროექტს ვახორციელებთ, ბევრი რეფორმა მიმდინარეობს ქვეყანაში. თუმცა, სამომავლოდ ვინ იქნება ლიდერი, ვინ იქნება ქვეყნის პრემიერ-მინისტრი, ამაზე გუნდი იმსჯელებს. ჯერ ძალიან ბევრი დროა 2016 წლის საპარლამენტო არჩევნებამდე. დაველოდოთ მოვლენებს.

_ არ გამორიცხავთ, რომ თქვენ გახდეთ პრემიერ-მინისტრი?

_ გამიჭირდება წინასწარ რაიმე კონკრეტულად ლაპარაკი. კიდევ ერთხელ ვამბობ, რომ მზად ვარ, კარისკაცადაც დავდგე, თუ ეს ჩემს გუნდს, ჩემს ქვეყანას დასჭირდება.

_ დღეს აქტიურად საუბრობენ, რომ თქვენსა და ირაკლი ღარიბაშვილს შორის შიდა ომი მიმდინარეობს. ბოლო თემა კი "გაზპრომი" და აზერბაიჯანში ვიზიტი იყო...

_ ეს სიცრუეა და არანაირი დაპირისპირება არ მიმდინარეობს. თუმცა, გარკვეულ დესტრუქციულ, ბოროტ ძალებს აქვთ იმის სურვილი, რომ ჩვენს შორის იყოს დაპირისპირება. იყო იმის მცდელობაც კი, რომ გარკვეული შუღლი ჩამოეგდოთ, ჩვენს შორის, ჩვენს მეგობრობას შორის, მაგრამ არ გამოუვიდათ.

მე და ირაკლი მეგობრები ვართ. არიან პიროვნებები, როგორც გუნდის შიგნით, ასევე გუნდის გარეთ, რომლებსაც აქვთ სურვილი, იყოს დაძაბულობა, მაგრამ ეს არ გამოუვათ, რადგან ჩვენ რეალურად ვაფასებთ სიტუაციას.

_ გუნდის შიგნით ვინ ცდილობს თქვენ დაპირისპირებას?

_ თავს შევიკავებ ამაზე საუბრისგან.

_ "გაზპრომის" თემას გვერდს ვერ ავუვლით, მით უმეტეს, რომ სწორედ ეს დასახელდა თქვენი და პრემიერის დაპირისპირების ერთ-ერთ მიზეზად.

_ არანაირი დაპირისპირება "გაზპრომთან" დაკავშირებით ჩემსა და პრემიერს შორის არ ყოფილა. "გაზპრომთან" ურთიერთობები წლების წინ იყო, დღესაც არის და დარწმუნებული ვარ, მომავალშიც გაგრძელდება. გარკვეულ ძალებს სურდათ საზოგადოება დაერწმუნებინათ, თითქოს ჩვენ ვაპირებდით აზერბაიჯანული გაზის ჩანაცვლებას რუსული გაზით. ეს ხომ წარმოუდგენელია? საიდან მოიტანეს?! მიზანმიმართულად ხორციელდებოდა ამ სიცრუის გავრცელება. აზერბაიჯანი ჩვენი სტრატეგიული პარტნიორია, დიდი ხნის განმავლობაში კარგი და მეგობრული ურთიერთობა, კარგი თანამშრომლობა გვაქვს.

 იმ მილსადენით, რომელიც რუსეთიდან საქართველოს გავლით სომხეთის მიმართულებით მიდის, ვიღებთ გატარებული გაზის მოცულობის 10 პროცენტს სრულიად უსასყიდლოდ. თუმცა, ამ მოცულობის ზევიდან, გვიწევდა დამატებითი მოცულობის შესყიდვა. ეს არის კომერციული გაზი. ყოველ წელს ვყიდულობდით და თუ ამის საჭიროება იქნება, აუცილებლად ვისარგებლებთ შემთხვევით, მაგრამ აქაც მნიშვნელოვანია _ უნდა იყოს კონკურენტული ფასები, იმისთვის, რომ ჩვენ შევძლოთ ბუნებრივი აირის მიღება. მოლაპარაკებები ყოველწიურად ხდებოდა, რადგან ხელშეკრულება, რომელსაც ვაფორმებთ ამ ათი პროცენტის მიღებისას, ერთწლიანია. შესაბამისად, ყოველ წელს გვიხდება მისი განახლება. ამაზე მიდის შეხვედრები, საუბრები. დეკემბრამდე გვაქვს დრო. ალბათ, კიდევ მოგვიხდება შეხვედრა, რომელიც ყველასთვის ღია და გამჭვირვალე იქნება.

_ გაზის ტარიფის შემცირება თქვენი წინასაარჩევნო დაპირება და ვიცით, ახლა რა მდგომარეობაცაა. რის საფუძველზე პირდებოდით ადამიანებს ტარიფების დაწევას? ბიძინა ივანიშვილმა "გურია ნიუსის" კითხვაზე, რატომ "ვერ იგრძნო ყველამ "ოცნების" მესამე წელი საკუთარ ჯიბეზე", აღნიშნა, რომ ეს მისი მხრიდან წამოცდენა იყო. თქვენც ფიქრობთ, რომ ტარიფების შემცირების დაპირება წამოცდენა იყო?

_ ჩვენ შევძელით 4 თეთრი დაგვეკლო ელექტროენერგიაზე, ხუთი თეთრი _ ბუნებრივ აირზე. ეს ორწელიწადნახევარი გრძელდებოდა. თუმცა, იმის შემდეგ, რაც მოხდა ტარიფის კორექტირება, გვაქვს განსხვავებული რეალობა, რაც გამოწვეულია დოლარის გამყარებით. იმაზე საუბარი და აპელირება, რომ ხელისუფლებამ ვერ შეძლო ტარიფების შემცირება, არასწორია. ჩვენ შევძელით ეს, თუმცა, იმის შემდეგ, როდესაც რეალობა შეიცვალა, იმისთვის, რომ ენერგეტიკის დარგი არ დანგრეულიყო, ისევ წინ წავსულიყავით, პროექტები არ შეჩერებულიყო და გაგვეუმჯობესებინა ინფრასტრუქტურა, მოვახდინეთ ტარიფის კორექტირება.

_ თქვენ ერთ-ერთ ინტერვიუში განაცხადეთ, რომ ყველა დაპირება, რომელიც "ქართულმა ოცნებამ" გასცა, შესრულდა, შესრულების პროცესშია ან აუცილებლად შესრულდება. შეგიძლიათ, შესრულებული დაპირებები ჩამოგვითვალოთ?

_შეგვიძლია ყველა ის დაპირება, რომელიც იყო გაცემული წინასაარჩევნოდ, სათითაოდ გავიაროთ. შეიძლება ვისაუბროთ იმ დაპირებებზე, რომლებიც ვერ შესრულდა.

_ მაგალითად, ათეულობით ათასი სამუშაო ადგილი...

_ ბოლო სამი წლის განმავლობაში, კერძო სექტორში, დაახლოებით, 90 000 სამუშაო ადგილია შექმნილი. თუმცა, მესმის, რომ ეს ძალიან ცოტაა. სამუშაო ადგილები განპირობებულია იქიდან, რომ ახალი საწარმოები შეიქმნა. ძველი, ძალიან ბევრი საწარმოს გადაიარაღება, განახლება მოხდა. მილიარდზე მეტია ამ მიმართულებით დახარჯული. გაცემულია იაფი კრედიტები და ეს ყველაფერი კეთდება იმისთვის, რომ ხელი შევუწყოთ სოფლის მეურნეობის განვითარებას, ეკონომიკის გაჯანსაღებას. მიუხედავად იმ მძიმე ეკონომიკური მდგომარეობისა, რაც მეზობელ ქვეყნებშია, მიუხედავად უკრაინაში მიმდინარე საომარი მოქმედებებისა, ჩვენ გვაქვს ეკონომიკური ზრდა. შეიძლება არა ისეთი, როგორიც გვინდა, მაგრამ რეგიონში ვართ ერთ-ერთი წარმატებული ქვეყანა.

აბსოლუტურად ვეთანხმები იმაში საზოგადოებას, რომ ყველაზე დიდი პრობლემა სამუშაო ადგილების ნაკლებობაა. თუმცა, აქვე მინდა ავღნიშნო, რომ ხელისუფლება ძალიან ბევრს აკეთებს იმისთვის, რომ ახალი სამუშაო ადგილები შეიქმნას. ზუსტად იმიტომ არის ის რეგულაციები, ახალი რეფორმები, რომ ბიზნესი გავაჯანსაღოთ; იმიტომ არის ისეთი პროექტები დაწყებული, როგორიცაა "აწარმოე საქართველოში"... ჩვენ არ უნდა ვიყოთ დამოკიდებული იმპორტირებულ საქონელზე და შევძლოთ ადგილობრივი პროდუქციით ჩავანაცვლოთ შემოტანილი. სამუშაო ადგილების შექმნა პირდაპირ კავშირშია ეკონომიკურ ზრდასთან და განვითარებასთან.

_ წინასაარჩევნო დაპირების თანახმად, დიდი ჰესებიც არ უნდა აშენებულიყო, თუმცა, საკმარისია ხუდონჰესი გავიხსენოთ... როდესაც ასეთ მაშტაბურ პროექტებზეა საუბარი, თუ არის გათვლილი ის რისკები, რაც ამ ყველაფერს მოყვება?

_ არც ერთი ჰიდროელექტროსადგურის მშენებლობა არ გახორციელდება, თუ არ არის შესწავლილი გარემოზე ზემოქმედება და თუ არ არის წარმოდგენილი შესაბამისი დოკუმენტი, სადაც დეტალურად იქნება გაწერილი ყველა კვლევა, ეკოლოგიური შეფასება. თან მოთხოვნაა, რომ ეს ყველაფერი უნდა შესრულდეს ძალიან მაღალი ევროპული სტანდარტებით. რაც შეეხება ზოგადად ჰიდროელექტროსადგურებს, ჩვენ უნდა გამოვიდეთ არსებული რეალობიდან. სამწუხაროდ, საქართველო ელექტროენერგიის თვალსაზრისით, დამოკიდებულია მეზობელ ქვეყნებზე, როგორც აზერბაიჯანზე, ასევე _ სომხეთზე, რუსეთზე, თურქეთზე. თუმცა, ქვეყნის წყლის რესურსებით გვაქვს რეალური შანსი, რომ უახლოეს მომავალში ვიყოთ ენერგეტიკულად დამოუკიდებელი ქვეყანა, შევძლოთ ამ რესურსების ათვისება და არა მარტო შიდა ბაზარი დავაკმაყოფილოთ, არამედ თურქეთის გავლით, ევროპულ ქვეყნებში გავიტანოთ ელექტროენერგია. ჩვენდა სამწუხაროდ, სექტემბრიდან მარტის ჩათვლით, შემოგვაქვს ელექტროენერგია რუსეთიდან, აზერბაიჯანიდან, სომხეთიდან _ იმის მიხედვით, თუ რომელი ქვეყანა შემოგვთავაზებს უკეთეს ფასს. არ გვაქვს იმის შესაძლებლობა, რომ ბევრი დიდი პროექტი განვახორციელოთ საქართველოში. შეიძლება ასეთი 4-5 იყოს, დანარჩენი მცირე და საშუალო პროექტებია. გარდა ჰიდროელექტრო სადგურებისა, თბოელექტროსადგურებსაც ვაშენებთ, ვაწესრიგებთ ინფრასტრუქტურას _ ეს არის ელექტროგადამცემი და ქვეყნებს შორის დამაკავშირებელი ხაზები. ეს იმისთვის, რომ საჭიროების შემთხვევაში, თავისუფლად შეგვეძლოს ელექტროენერგიის გაცემა- მიღება. ამ მიმართულებით ძალიან ბევრი და მნიშვნელოვანი პროექტია გახორციელებული.

_ რამდენადაა მოსალოდნელი ელექტროენერგიის დეფიციტი ზამთარში, მით უმეტეს იმ ფონზე, როცა ამინდის გაუარესების დროს შუქი ითიშება? რა იწვევს გათიშვას? წინა წლებში ასეთი ხშირი გათიშვები არ იყო.

_ ელექტროენერგიის გათიშვები წინა წლებშიც იყო. თქვენ შეგიძლიათ შესაბამის კომპანიებს მიმართოთ და ნახავთ სტატისტიკას, თუ რამდენად არის შემცირებული ელექტროენერგიის გათიშვა. ძალიან მძიმე ინფრასტრუქტურული მდგომარეობაა. ძალიან დიდი თანხებია საჭირო იმისთვის, რომ მთელი ქვეყნის მასშტაბით, ერთობლივად მოხდეს სისტემის რეაბილიტაცია, ახლის მშენებლობა. ეს ყველაფერი ეტაპობრივად ხორციელდება. ძალიან მოძველებულია ელექტროგადამცემი ხაზები, ბოძები, ტრანსფორმატორები, ქვესადგურები...

_ ეს განსაკუთრებით სოფლებს ეხება.

_ კი, სოფლებში, რეგიონებში ძალიან მძიმე მდგომრეობაა. ეს გუშინდელი პრობლემა არ არის _ წლების განმავლობაში დაგროვილი პრობლემაა. ამიტომ, კატეგორიულად ვთხოვთ კომპანიებს, რომ მაქსიმალურად განახორციელონ ინვესტიციები ამ პრობლემების ეტაპობრივად მოგვარებისთვის. სხვათა შორის, კომპანიები გათიშვებთან დაკავშირებულ სტატისტიკას უახლოეს მომავალში წარადგენენ, რომელსაც მეც დავესწრები.

_ გამრიცხველიანების საკითხს რამდენად ხშირად აყენებთ კომპანიებთან და აქვე გკითხავთ ბახმაროს შესახებ _ კურორტზე, წლებია ეს პრობლემა დგას.

_ ხელშეკრულებაც არის გაფორმებული და კომპანიასთან ვიყავით შეთანხმებული, რომ 2015 წლის ბოლოსთვის უნდა დასრულებულიყო გამრიცხველიანება. თუმცა, დიდი ალბათობით ეს ვერ მოხდება, რადგან კომპანიებს ჰქონდათ გარკვეული პრობლემები, რაც გამოწვეული იყო დოლარის გამყარებით. სანამ ტარიფის კორექტირება მოხდებოდა, ამასთან დაკავშირებით არაერთხელ გვისაუბრია. მას შემდეგ, რაც მოხდა კორექტირება, ჩვეულ რეჟიმში გაგრძელდება გამრიცხველიანების სამუშაოები. უბრალოდ, დროში იქნება ცოტათი გაწელილი _ თუ უნდა დასრულებულიყო 2015 წლის ბოლოსთვის, გადაიწევს 2016 წლის ბოლოსთვის...

_ ადგილობრივი ხელისუფლება ამბობს, რომ პირადად თქვენგან მიიღო დაპირება, რომლის თანახმადაც, მომავალ წელს, კურორტი ბახმარო სრულად იქნება გამრიცხველიანებული.

_ ჩვენ მაქსიმალურად ვთხოვთ კომპანიას, რომ ქვეყნის მასშტაბით მოხდეს დროული გამრიცხველიანება და ეს არ ეხება მარტო ბახმაროს.

_ ბახმაროს გამრიცხველიანება მხოლოდ რეგიონის თემა არ არის. იგი მნიშვნელოვანი კურორტია, ისევე, როგორც გომისმთა...

_ როცა ვამბობ, რომ 2016 წელს უნდა იყოს დასრულებული გამრიცხველიანება, ვგულისხმობ მთელ ქვეყანას.

_ მხოლოდ გურიის მაგალითით რომ ვიმსჯელოთ, "ნაციონალური მოძრაობის" წარმომადგენლები ხშირად ამბობენ, რომ მათ ჰქონდათ გეგმა, შეთანხმება, რომლის თანახმადაც, 2016 წელს მთელი გურიის გაზიფიცირება უნდა მომხდარიყო... ჩვენ ვაკვირდებით პროცესს და სამუშაოები ძალიან ნელი ტემპით მიმდინარეობს.

_ მიმდინარეობს პროექტების გახორციელება. აქაც საინტერესოა სტატისტიკა და თქვენც შეგიძლიათ გადაამოწმოთ. სანამ "ქართული ოცნება" მოვიდოდა ხელისუფლებაში, გვეუბნებოდნენ, რომ სოფლები, ქალაქები, რაიონები იყო გაზიფიცირებული. თუმცა, თუ აიღებდით კონკრეტულ სოფელს, მხოლოდ ერთ ქუჩაზე იყო გაზის მილი, მეორე მხარეს კი არ ჰქონდა შეყვანის საშუალება. სხვათა შორის, ბევრია ასეთი, მაგრამ მე არავისზე გადაბრალებას არ ვიწყებ. დაწყებული გვაქვს პროგრამა, რომ მთელი ქვეყნის მასშტაბით მოხდეს გაზიფიცირება და ეს პროექტი ხორციელდება. გარკვეული შეფერხება გვქონდა "სოკართან" მიმართებაში, რაც გამოწვეული იყო დოლარის გამყარებით.

_ ყველაფერი დოლარის გამყარების ბრალია?

_ დიახ, თუმცა, პრობლემების გამოც იყო გარკვეული შეფერხებები და სახელმწიფომ გაზის ტრანსპორტირების კომპანიის საშუალებით, დაახლოებით, 20 მილიონზე მეტი დახარჯა იმისთვის, რომ გაზიფიცირების სამუშაოები ჩაგვეტარებინა. 57 სოფლის გაზიფიცირება მოვახდინეთ. ეს არის, ძირითადად, საოკუპაციო ხაზთან არსებული სოფლები. ასევე, მნიშვნელოვანი იყო, რომ პრემიერის დავალებით და მთავრობის გადაწყვეტილებით, იქ მცხოვრებ ადამიანებს უფასოდ შეუყვანეს ბუნებრივი აირი. ვფიქრობ, რომ 2017 წელს შევძლებთ და მთელი ქვეყნის მასშტაბით დავასრულებთ გაზიფიცირების სამუშაოებს.

_ დღეს ძალიან აქტუალურია თემა პრემიებთან და დანამატებთან დაკავშირებით. აუდიტის სამსახურის უფროსმა განცხადებაც გააკეთა და აღნიშნა, რომ პრემიები დანამატებმა ჩაანაცვლა. მილიონობით გაცემულ ლარზეა საუბარი. თქვენ იღებთ დანამატს?

_ მე თავს ვიკავებ ყოველთვის მაგ თემაზე საუბრისგან. მეუხერხულება იმაზე საუბარი, რომ არ ვიღებ ხელფასს.

_ როგორც ვიცით, საქველმოქმედო ფონდში რიცხავთ...

_ კი, ძირითადად, ასეა. ზოგადად, რაც შეეხება პრემიას და დანამატს, ეს ყველაფერი დარეგულირებულია გარკვეული რეგულაციებით. რადგან ამ მიმართულებით ქაოსი იყო, პრემიებს გასცემდნენ, როგორც უნდოდათ და როცა უნდოდათ. ეს კატეგორიულად მიუღებელი იყო. თუმცა, მე მოვისმინე განცხადებები, რომ დაახლოებით 30 მილიონით არის პრემიები შემცირებული.

_ და პრემიები ჩანაცვლებულია დანამატებით...

_ დანამატებს რაც შეეხება, წახალისება ნებისმიერ ადამიანს, ნებისმიერ თანამშრომელს სჭირდება. თუმცა, ეს ყველაფერი იმ რეგულაციების გათვალისწინებით ხდება, რომელიც მიღებულია. მთავარია, მას არ გასცდე და ამას ჰქონდეს შესაბამისი ფორმა, ზომა და ზონა.

_ და ამ ფონზე ზოგიერთმა საჯარო მოხელემ, მაგალითად, მინდია ჯანელიძემ, ისიც კი არ იცის, რამდენი აქვს ხელფასი და დანამატი.

_ სიმართლე გითხრათ, არც მე არ ვიცი ზუსტად, რამდენია ჩემი ხელფასი. მინდია ჯანელიძესთან დაკავშირებით გამიჭირდება პასუხის გაცემა.

_ საჯარო მოხელემ არ უნდა იცოდეს, რამდენი აქვს სახელფასო ანაზღაურება?

_ შეიძლება უნდა იცოდეს, შეიძლება _ არა. მე, მაგალითად, არ ვიცი.

_ რას გვეტყვით უსაფრთხოების საკითხებზე? "გურია ნიუსმა" ისლამური სახელმწიფოს მებრძოლთან ინტერვიუ ჩაწერა, რომელიც მუქარას არ ერიდება. რამდენად დაცული ვართ?

_ ზოგადად, მსოფლიოში ძალიან მძიმე მდგომარეობა და ფონია. მინდა კიდევ ერთხელ მივუსამძიმრო ფრანგს ხალხს. რაც შეეხება საქართველოს, შესაბამისი სამსახურები მუშაობენ ამ მიმართულებით, განცხადებებიც გაავრცელეს. მინდა მოსახლეობას მოვუწოდო სიმშვიდისკენ. ჩვენ მაქსიმალურად ვფლობთ სიტუაციას.

_ მას შემდეგ, რაც ბიძინა ივანიშვილმა არასამთავრობო ორგანიზაციები გააკრიტიკა, ხელისუფლების თითქმის ყველა წევრმა იგივე გაიმეორა. ბიძინა ივანიშვილის სიტყვას არის ყველა აყოლილი თუ გაქვთ კონკრეტული მტკიცებულება, როცა არასამთავრობო ორგანიზაციებს "ნაციონალურ მოძრაობასთან" კავშირში ადანაშაულებთ?

_ გააჩნია თემას. მაგალითად, დღეს ერთ-ერთმა არასამთავრობო ორგანიზაციამ გააკეთა განცხადება, რომ "გაზპრომთან" დაკავშირებით არსებობს კითხვები და საზოგადოებას არ მიაწოდა სწორი ინფორმაცია. გულდასაწყვეტია ეს. თუნდაც "გაზპრომთან" დაკავშირებით არაერთი განმარტება გაკეთებულა ჩემი, ჩემი სამინისტროს მხრიდან. თუმცა, აქ არის ერთი საინტერესო დეტალი _ არსებობენ გარკვეული ჯგუფები, პოლიტიკური და მოტივირებული ადამიანები, რომლებიც ცდილობენ, რომ საზოგადოებას რაღაცით შეახსენონ თავი. 2016 წლის საპარლამენტო არჩევნები მოდის, ცდილობენ, რაღაც თემები ნახონ, ჩაებღაუჭონ და ამით მოახდინონ საზოგადოებაზე გარკვეული რეაგირება.

_ მათ შორის, თქვენი გუნდის წევრი გელა დუმბაძეც?

_ გელას არაფერი ცუდი არ უთქვამს, თუმცა, ძალიან გაზვიადებული იყო მისი ეს ნათქვამი. ამაზე მე გავაკეთე განცხადება. ცალკე პრემიერმა ისაუბრა "გაზპრომის" თემაზე, ცალკე ამერიკის ელჩი გამოვიდა და ილაპარაკა "გაზპრომთან" ჩვენს ურთიერთობებზე. თქვა, რომ ნორმალურია, როცა ქვეყანა ზრუნავს იმაზე, რომ არ იყოს დამოკიდებული მხოლოდ ერთ მიმწოდებელზე. ჩვენ, ყველა ჩემი თანამშრომელი, მთავრობა, სამინისტრო მხოლოდ და მხოლოდ გამოვდივართ ჩვენი ქვეყნის, ჩვენი ხალხის საკეთილდღეო მიზნებიდან.

_ ამერიკის ელჩის განცხადება "გაზპრომთან" დაკავშირებით მისაღებია და "რუსთავი 2"-თან დაკავშირებით _ არა?

_ "რუსთავი 2"-თან დაკავშირებით სხვა იყო. ელჩმა თქვა, რომ ეს იყო ღამით მიღებული გადაწყვეტილება, თუმცა, განმარტებაც გაკეთდა, რომ ეს გადაწყვეტილება 6-ის ნახევარზე იქნა მიღებული. მარტივად რომ ვთქვა, ამერიკის ელჩის მხრიდან ადგილი ჰქონდა გარკვეული ადამიანების მიერ გაკეთებული განცხადებების ინტერპრეტაციას.

_ ამ ყველაფერში პოლიტიკური მოტივი არ დევს და ხელისუფლება არ არის "რუსთავი 2"-ით დაინტერესებული?

_ მიმაჩნია, რომ ეს არის ორ სუბიექტს შორის დავა. თუ ჩვენ ვაშენებთ დემოკრატიულს სახელმწიფოს, თუ გვინდა, რომ სასამართლო იყოს დამოუკიდებელი, თუ ვენდობით მოსამართლის მიღებულ გადაწყვეტილებას, უნდა წავიდეთ ამ გზით. თუ ერთ შემთხვევაში ვამბობთ, რომ საკონსტიტუციო სასამართლომ შეაჩერა ნორმა და ეს არის მისაღები, ეს არის დემოკრატია და ყველა ტაშს უკრავს, მეორე შემთხვევაში რატომ არ უნდა იყოს მისაღები მოსამართლის გადაწყვეტილება?

_ მოსამართლემ საკუთარი გადაწყვეტილება ორ დღეში შეცვალა, რაც, ბუნებრივია, კიდევ მეტ კითხვას აჩენს...

_ სწორედ ამიტომ ვსაუბრობთ, რომ სასამარლო არის დამოუკიდებელი და პატივი უნდა ვცეთ იმის მიუხედავად, ვისთვის არის მისაღები ეს გადაწყვეტილება და ვისთვის _ არა. ჩვენ ვაშენებთ სახელმწიფოს, რომელიც დაფუძნებულია დემოკრატიულ ინსტიტუტებზე და ღირებულებებზე.

_ თქვენი აზრით, საკონსტიტუციო სასამართლოც დამოუკიდებელია?

_ გარკვეული კითხვები ჩნდება, თუნდაც, იგივე ნორმის შეჩერებასთან დაკავშირებით. ბოლო ოცი წლის განმავლობაში არ მომხდარა, ასეთი საკითხის განხილვა პარლამენტთან არ ყოფილიყო შეთანხმებული. თუმცა, ამ ყველაფრის მიუხედავად, პატივი უნდ ვცეთ მათ გადაწვეტილებას.

_ "რუსთავი 2"-ის საქმის გარშემო ბევრი განცხადება გაკეთდა, ბევრი კრიტიკა მოვისმინეთ უცხოელი პარტნიორებისგან და ამ ყველაფერში ხელისუფლება დაადანაშაულეს კიდეც...

_ მაქსიმალურად უნდა ვეცადოთ ყველამ, თავი შევიკავოთ პოლიტიკური განცხადებებისგან. ეს არის სამართლებრივი დავა და არავითარ შემთხვევაში პოლიტიკურ ჭრილში არ უნდა გადავიყვანოთ, რაც გარკვეული დაჯგუფებების მოტივი და მაზანია.

_ პოლიტიკური შეფასებები თქვენი გუნდიდან ისმის. გოგი თოფაძის განცხადებაც კმარა მაგალითად...

_ ჩვენ ვაშენებთ დემოკრატიულ ქვეყანას და აქ ყველას აქვს მოსაზრების გამოთქმის საშუალება. არავინ არ იზღუდება და თუნდაც ის, რაც დღეს "რუსთავი 2"-ის ირგვლივ ხდება, სიტყვის თავისუფლების ერთ-ერთი ნათელი მაგალითია. ნიღბებით არავინ არ უვარდება ტელევიზიებს, არავინ არ ართმევს ბიზნესს, არავინ არ ატერორებს ადამიანებს განსხვავებული პოლიტიკური შეხედულებების გამო.

_ თუმცა, ბევრი თოქშოუ დაიხურა, თუნდაც, ტელეკომპანია "იმედზე"...

_ "იმედი" კერძო პირის საკუთრებაა. ჩვენთვის მთავარია, მომავალში გვქონდეს იმის შესაძლებლობა, რომ პოლიტიკური განცხადებები გავაკეთოთ. მოვისმინეთ განცხადება, რომ "იმედი" ახალ შოუს აკეთებს. ხშირად საუბრობენ, რომ ხელისუფლებას, ბიძინა ივანიშვილს უნდა "რუსთავი 2". ჰქონდა ბატონ ბიძინას ტელევიზია და დახურა, როცა ხელისუფლებაში მოვიდა, რადგან არ იყო სწორი, ხელისუფლებას ჰქონოდა მისი ტელევიზია.

_ სამართლიანობის აღდგენაზე რას იტყვით? ამ დაპირების შეუსრულებლობის გამო ბევრი გსაყვედურობთ. შეიძლება გვითხრათ, რომ რამდენიმე მანქანა დაუბრუნეს პატრონს, მაგრამ ეს საკმარისი არ არის. ბევრი გამოძება აქვს ჩატარებული "გურია ნიუსს", ბევრი დოკუმენტია დადებული, თუმცა, ამას რეაგირება არ მოჰყოლია... ის ადამიანები ვინც, ამ ყველაფერს "აპრავებდნენ", იგივე გამომძიებლები, პროკურორები, თანამდებობებზე არიან. როგორ უნდა მოხერხდეს ამ ადამიანების ხელით სამართლიანობის აღდგენა?

_ ეს პროცესი დაწყებულია და სპეციალური დეპარტამენტიც არის შექმნილი პროკურატურაში, რომელშიც ათიათასობით საქმეა შესული. ამას დრო სჭირდება. არიან გარკვეული ადამიანები, რომლებიც ხელისუფლებისგან მოითხოვდნენ, გაგვეკეთებინა ის, რაც წინა ხელისუფლებამ გააკეთა, როდესაც 2003-ში მოვიდა. ვფიქრობ, ჩვენი ღირებულებები, შეხედულებები, რადიკალურად განსხვავებულია. თუ იგივე გზით წავიდოდით და იგივეს გავაკეთებდით, მაშინ არაფრით არ განვსხვავდებით წინა ხელისუფლებისგან. მთავარია, მივყვეთ სამართლებრივ გზას. ყველას მოეთხოვება პასუხი. წინა ხელისუფლების მაღალჩინოსნებისგან ზოგი სასჯელს იდის, ზოგს ბრალი აქვს წაყენებული, ზოგი _ გაქცეულია..

_ ზოგსაც დანაშაულს ვერ უმტკიცებენ...

_ ადრე სხვანაირად იყო. იჭერდნენ და სამართლებრივად ერთ დღეში ამთავრებდნენ ყველაფერს. ჩვენ თუ იგივე გზით და მეთოდებით გვინდა ქვეყნის მშენებლობა, მაგაზე ადვილი არაფერია, მაგრამ, ჩვენ რეალურად ვაპირებთ დემოკრატიული სახელმწიფო ავაშენოთ. მთელი მსოფლიო გვიყურებს _ ძალიან მნიშნველოვანია ევროპიდან წამოსული მესიჯები, თუნდაც ვიზალიბერალიცაზიასთან დაკავშირებით.

_ სკანდალურ ჩანაწერებთან დაკავშირებით რა ხდება? ყველამ მოისმინა შესაძლო არეულობის დაგეგმვის შესახებ და გამოძიების დაწყებაზეც მივიღეთ ინფორმაცია. შემდეგ?

_ არანირი არეულობა არ იქნება და ვერ იქნება. ხელისუფლება აკონტროლებს სიტუაციას და ვერავინ ვერ შეძლებს გადატრიალების გზით ხელისუფლებაში მოსვლას. იქნება არჩევნები და ვისაც სურვილი აქვს, მიიღოს მონაწილეობა, ხალხს უკეთესი პროგრამა შესთავაზოს, ჩაატაროს წინასაარჩევნო კამპანია. მოსახლეობამ უნდა გადაწყვიტოს, ვინ იქნება ხელისუფლებაში და არა ვიღაც კონკრეტულმა გაქცეულმა პიროვნებამ.

_ ფიქრობთ, რომ ხალხი "ქართულ ოცნებას" დაუჭერს მხარს?

_ ეს მოსახლეობაზეა დამოკიდებული. ჩვენ ყველაფერს გავაკეთებ იმისთვის, რომ მოქალაქეებს იმედები არ გავუცრუოთ. ვიცი, რომ დიდი იმედი აქვს ხალხს. ბევრი მნიშვნელოვანი რეფორმა, პროექტი იქნა გახორციელებული და ქვეყნის შენება აუცილებლად გაგრძელდება.




 ახალი ამბები
  • ავტოსაგზაო შემთხვევა მარტვილში_ ქალი ადგილზე გარდაიცვალამარტვილში,სოფელ ვედიდკარში მსუბუქი ავტომობილი ქვეითს დაეჯახა,რის შედეგადაც  შუახნის ქალი ადგილზე გარდაიცვალა.ინფორმაცია  "გურია ნიუსს" მერის წარმომადგენელმა დაუდასტურა. გულთაზ ცანავას თქმით,შემთხვევა გუშინ საღამოს მოხდა.  როგორც "გურია ნიუსს"შსს-ში განუცხადეს, მომხდარზე გამოძიება სსკ-ის 276-ე მუხლის მეორე ნაწილით ... ...
  • საოკუპაციო რეჟიმის მიერ დაკავებული მოზარდი გათავისუფლდა საოკუპაციო რეჟიმის მიერ დაკავებული 16 წლის მოზარდი გათავისუფლდა. ალექსანდრე შიუკაშვილი საქართველოს კონტროლირებად ტერიტორიაზე სამართალდამცავებს ერგნეთის საგუშაგოზე გადასცეს. გათავისუფლებულ მოზარდს შსს-ს შიდა ქართლის დეპარტამენტში გადაიყვანენ, სადაც მას ოჯახის წევრები ელოდებიან. გათავისუფლების ფაქტი დაადასტურა სახელმწიფო უსაფრთხოების სამსახურმა. გორის მუნიციპალიტეტის სოფელ კირბალთან, საოკუპაციო ხაზთან ოკუპანტებმა მოზარდი დღეს დააკავეს. წყარო: ... ...
  • ოზურგეთელი ჟურნალისტი ნუკრი ნიკოლაიშვილი გარდაიცვალა64 წლის ასაკში ოზურგეთელი ჟურნალისტი და მწერალი ნუკრი ნიკოლაიშვილი გარდაიცვალა. როგორც ჩვენთვის გახდა ცნობილი ის მოულოდნელად გახდა ცუდად. სასწრაფო დახმარების ბრიგადას ის უკვე გარდაცვლილი დახვდა. ნუკრი ნიკოლაიშვილი მუშაობდა გაზეთ “ლენინის დროშაში“, ტელეკომპანია “გურიაში“, გაზეთ “აჭარაში“ და გაზეთ “ალიონში.“ “ნუკრი ნიჭიერი კაცი, პროფესიით ჟურნალისტი იყო. ძალიან აქტიური ჟურნალისტი იყო და თავისი ერთგული მკითხველი ყავდა. ნუკრი ასევე იყო მწერალი, გამოცემული აქვს წიგნი. მისი მოთხრობები და ნოველები იბეჭდებოდა სხვადასხვა გამოცემებში, - გვითხრა “ალიონის“ რედაქტორმა ნუგზარ ასათიანმა. ნუკრი ნიკოლაიშვილი 20 წელზე მეტი მუშაობდა აჭარის რეგიონში. ის ბოლო წლებში მშობლიურ სოფელ ბახვში, მეუღლესთან ერთად დაბრუნდა. „გურია ნიუსი“ გამოთქვამს მწუხარებას და სამძიმარს უცხადებს გარდაცვლილის ოჯახს. ... ...
  • არჩილ თალაკვაძე: ოპოზიციას სხვა გზა არ ექნებასაქართველოს პარლამენტის თავმჯდომარის არჩილ თალაკვაძის განცხადებით, საარჩევნო სისტემასთან დაკავშირებით დიალოგი ოპოზიციასთან მალე გაგრძელდება. „ჩვენ გვაქვს სამართლიანი და დაბალანსებული შეთავაზება ოპოზიციასთან, რაც გულისხმობს, როგორც სამართლიან პროპორციებს, ასევე საარჩევნო კანონმდებლობის რეფორმას. სამწუხაროა, რომ ამ მომენტისთვის, როდესაც ჩვენ ვსაუბრობთ, აშშ, ევროკაშვირი და საქართველოს ხელისუფლება არის ერთ პოზიციაზე და ყველანი მხარს ვუჭერთ დიალოგს, ხოლო ოპიზიციის ნაწილი ემიჯნება ამ დიალოგს. თუმცა, დარწმუნებული ვართ, რომ უახლოეს დღეებში ჩვენ შევძლებთ, დიალოგის მაგიდას დავუბრუნდეთ. იქიდან გამომდინარე, რომ პოლიტიკა და ჩვენი ქვეყნის ინტერესები ამას მოითხოვს, ოპოზიციას სხვა გზა არ ექნება“ ,_ განაცხადა არჩილ თალაკვაძემ. ... ...
  • აპლიკანტს ნინო ჭელიძის განათლების ცენტრი გრანტის დაბრუნებას ედავებააპლიკანტი, რომელიც იაპონიამ დაასაქმა და გამოცდილებას საქართველოსთვის შეიძენს, ნინო ჭელიძის განათლების ცენტრი გრანტის დაბრუნებას ედავება. აღნიშნულ ინფორმაციას  „ახალგაზრდა ადვოკატები“ავრცელებს. "2020 წლის 21 თებერვალს, თბილისის საქალაქო სასამართლოს ადმინისტრაციულ საქმეთა კოლეგიამ მოსამართლე ლეილა გოგიშვილის თავმჯდომარეობით, „საერთაშორისო სამაგისტრო პროგრამები 2016-2017“-ის კონკურსში გამარჯვებული ნინო ც.-ის საქმეს განიხილა. სარჩელის ავტორი სსიპ განათლების საერთაშორისო ცენტრია, რომელიც იაპონიის სახელმწიფო უნივერსიტეტის კურსდამთავრებულს სახელმწიფო გრანტის პირობების დარღვევას და მიღებული გრანტის - 53,379,36 ლარის დაბრუნებას ედავება. თავის მხრივ, სასამართლოში წარდგენილია ნინო ც.-ის შეგებებული სარჩელი, რომლითაც მოთხოვნილია თანხის დაბრუნების შესახებ სსიპ განათლების საერთაშოროს ცენტრის 2019 წლის 9 იანვრის გადაწყვეტილების გაუქმება და ცენტრისთვის ახალი გადაწყვეტილების მიღების დავალება საქართველოში დასაქმების ვალდებულების შესრულების გადავადებასა და ვალდებულების შესრულების ვადის განსაზღვრული პერიოდიდან ათვილის დაწყების შესახებ.  საქმის მასალებით დადგენილია, რომ ნინო ც.-მა „საერთაშორისო სამაგისტრო პროგრამები 2016-2017“-ის ფარგლებში მოიპოვა სახელმწიფო გრანტი იაპონიაში, იაპონიის საერთაშორისო უნივერსიტეტში, პროგრამის ფარგლებში პრიორიტეტულად გამოცხადებულ საჯარო მმართველობის მიმართულების საჯარო მართვისა და პოლიტიკის ანალიზის პროგრამაზე 2016-2017 და 2017-2018 სასწავლო წლებისთვის სწავლის საფასურისა და სწავლის პერიოდში უცხო ქვეყანაში ცხოვრებასთან დაკავშირებული ხარჯების ასანაზღაურებლად. გრანტის შესახებ ხელშეკრულების მიხედვით, გრანტის მიმღები ვალდებულია საზღვარგარეთ სამაგისტრო პროგრამაზე სწავლის დასრულების შემდეგ, დაბრუნდეს საქართველოში არაუგვიანეს ერთი თვის ვადაში, დარჩეს ქვეყანაში 3 წლით და დასაქმდეს საქართველოში შესაბამის სფეროში/დაწესებულებაში. ადმინისტრაციული ორგანოს განმარტებით, გრანტის მიმღები არ დაბრუნდა ქვეყანაში, დაარღვია გრანტის ხელშეკრულება და მოეთხოვება ფინანსური პასუხისმგებლობა თანხის უკან დაბრუნებაზე.  სინამდვილეში, როგორც სსიპ განათლების საერთაშორისო ცენტრის დირექტორის 2016 წლის 26 აპრილის №10-16 ბრძანება, ასევე მხარეთა შორის გაფორმებული 2016 წლის 28 ივლისის, აგრეთვე 2017 წლის 25 სექტემბრის "გრანტის შესახებ" ხელშეკრულება ცალსახად აწესრიგებს შემდეგს - გრანტის მიმღებს უფლება აქვს, მიმართოს საკონკურსო კომისიას სწავლის დასრულებიდან არა უმეტეს ერთი წლის ვადით ამ ხელშეკრულებით გათვალისწინებული პრიორიტეტული საგანმანათლებლო პროგრამული მიმართულების შესაბამის სფეროში/მიმართულებით სამუშაო გამოცდილების დაგროვების მიზნით, უცხო ქვეყანაში დარჩენის უფლების მინიჭების თხოვნით. გრანტის მიმღები ვალდებულია წარმოადგინოს დასაბუთებული განცხადება და დასაქმების ოფიციალური დოკუმენტი. საკონკურსო კომისიის მიერ გრანტის მიმღებისათვის უცხო ქვეყანაში დარჩენის უფლების მინიჭება ჩაითვლება გათვალისწინებული ვალდებულების შესრულების ვადის გადავადებად და ვალდებულების შესრულების ვადის ათვლა დაიწყება საკონკურსო კომისიის მიერ გრანტის მიმღებისათვის მინიჭებული უცხო ქვეყანაში დასაქმების უფლების ვადის ამოწურვისთანავე.  „ახალგაზრდა ადვოკატები“ განმარტავს, რომ 2018 წლის 16 ოქტომბერს, ნინო ც.-მა განცხადებით მიმართა ცენტრს და მოითხოვა საზღვარგარეთ დასაქმების მიზნით 1 წლით, 2019 წლის შემოდგომამდე დარჩენა. 2018 წლის 9 ნოემბერს, დისკრეციული უფლებამოსილების საფუძველზე, ცენტრმა არ დააკმაყოფილა მოთხოვნა. კომისიის აზრით, ნინო ც.-ის მიერ წარმოდგენილი დოკუმენტებიდან არ იკვეთებოდა სამსახურეობრივი პოზიცია და ფუნქცია-მოვალეობების შესაბამისობა დაფინანსებული სამაგისტრო პროგრამის მიმართულებასთან, რაც საზღვარგარეთ სამუშაო გამოცდილების დაგროვების მიზნით დარჩენის უფლების მინიჭების წინაპირობას წარმოადგენდა. 2018 წლის 18 დეკემბერს, განცხადებით კვლავ მიემართა ცენტრს და წარედგინა სრული დოკუმენტაცია და მოთხოვნილ იქნა ხელთავიდან მათზე მსჯელობა. 26 დეკემბერის ცენტრის წერილში საუბარია, რომ ნინო ც.-ის განცხადება განხილვის მიზნით წარმოებაში იქნა მიღებული და იმავდროულად, მხარეს მოეთხოვა იმ ობიექტურ გარემოებებზე მითითება, თუ რატომ არ იქნა დოკუმენტაცია წარდგენილი პირველ ეტაპზე.  2019 წლის 3 იანვარს, ცენტრს კვლავ წარედგინა დაზუსტებული მოსაზრებები სამუშაო აღწერისა და შესაბამისობების თაობაზე, ასევე ობიექტური გარემოებების თაობაზე, თუმცა 9 იანვარს, ნინო ც.-მა ცენტრისგან მიიღო წერილი, სადაც ნათქვამია, რომ თითქოსდა: ა. ვერც დადგენილ და ვერც დამატებით განსაზღვრულ 10-დღიან ვადაში ვერ მოხერხდა ცენტრის ინფორმირება და ობიექტური გარემოების დამადასტურებელი ოფიციალური დოკუმენტის წარმოდგენა და ბ. ნინო ც.-ის მიერ წარმოდგენილი ცნობა ვერ ადასტურებდა 18/12/18 განცხადებაში მითითებული შემაფერხებელი ობიექტური გარემოების არსებობას. შესაბამისად, გრანტის მიმღებს მოეთხოვა თანხის სრული მოცულობით დაბრუნება. „ახალგაზრდა ადვოკატების“ განმარტებით, სსიპ განათლების საერთაშორისო ცენტრი შემჩნეულია აპლიკანტების მიმართ არამართლზომიერ და დაუსაბუთებელ მოქმედებებში, ნინო ც.-ის შემთხვევა კი გამონაკლის არ წარმოადგენს. იმ პირობებში, როდესაც ა. სახეზე იყო ხელშეკრულებით და პროგრამით გათვალისწინებული საჭირო დოკუმენტური მასალა, ბ. პროგრამასთან და მიღებულ განათლებასთან შესაბამისობაში არსებული საქმიანობის სფერო, უფლება-მოვალეობები და გ. სამუშაო გამოცდილების დაგროვების დასაბუთება, ცენტრს არ გააჩნდა არავითარი უფლება, სათანადო კვლევისა და ადმინისტრაციული წარმოების გარეშე დაეტოვებინა 2018 წლის 18 დეკემბრის ნინო ც.-ის განცხადება საზღვარგარეთ 1 წლის ვადით დარჩენის უფლების ხელთავიდან განხილვის შესახებ. შესაბამისად, სტრატეგიული სამართალწარმოების განხორციელების თვალსაზრისით, მნიშვნელოვანია. ცნობისთვის: სსიპ განათლების საერთაშორისო ცენტრმა ნინო ც.-ს მიმართ სარჩელი სასამართლოს 2019 წლის 16 სექტემბერს წარუდგინა, ხოლო ნინო ც.-მა სსიპ განათლების საერთაშორისო ცენტრს შეგებებული სარჩელით 2020 წლის 9 იანვარს მიმართა. როგორც სარჩელი, ასევე შეგებებული სარჩელი დასაშვებად იქნა ცნობილი. ნინო ც.-ის ინტერესებს სასამართლოში „ახალგაზრდა ადვოკატების“ ხელმძღვანელი, არჩილ კაიკაციშვილი და იურისტი ნიკა მენოგნიშვილი წარმოადგენენ. საქმეზე შემდგომი სხდომა 2020 წლის 20 მაისს გაიმართება.   ... ...

არქივი

ზაფრანი

რატომ უნდა მიირთვათ ბევრი შოკოლადი

შოკოლადის მირთმევის შედეგად ადამიანის ბედნიერების...

ჰოლივუდელი მარტოხელა მამები

ალ პაჩინო - მსახიობი სამი...

ქალები და მანქანის მართვა

ბრიტანული კვლევის თანახმად, ქალები კაცებზე...

რა არის ბედნიერება?

რას გულისხმობს ბედნიერება?_ სტაბილურ სამსახურს,...

რატომ „იყინებიან“ ქალები ხშირად

ქალებისგან ხშირად მოისმენთ, რომ ეყინებათ...

რა პროდუქტები უნდა მივირთვათ ზამთარში

რძე სუპერმარკეტებში სულ უფრო ხშირად...
კარმიდამო ჩემი

საკურა_ იაპონიაში გაზაფხულის სიმბოლო, მალე სამტრედიაშიც აყვავდება

საკურა-იაპონიაში გაზაფხულის სიმბოლო, ულამაზესი ალუბლის...

ფუტკრის რძე _ ოცდამეერთე საუკუნის ჯადოსნური წამალი

საქართველოს ბუნება ყოველგვარ პირობას ქმნის...

როგორ დავიბრუნოთ ფუტკრის მართვე

გაზაფხულის მოახლოებისთანავე ნებისმიერმა მეფუტკრემ თუ...

მსხვილნაყოფა ციტრუსი _ "ოიუ" (Citrus Oiu)

საქართველოს მოსახლეობისთვის ციტრუსოვანი კულტურებიდან ყველაზე...

"გვაქვს უთვალავი ფერითა!"

ოზურგეთელი, პროფესიით ფარმაცევტი და ხელოვანი...

"დეკემბერა" საოცარი საშობაო ყვავილია

ალბათ, არც ერთი ყვავილის შესახებ...

როგორია ტყის მარწყვი და რა სასარგებლო თვისებები გააჩნია

გაზაფხულის დადგომისთანავე, ადამიანებს უდიდესი სურვილი...

პროდუქტები, რომელიც საუზმეზე არ უნდა მიირთვათ

დიეტოლოგებმა შეადგინეს პროდუქტების სია, რომელიც...

როგორ გაისუფთავონ ფილტვები მწეველებმა

ცოტა ხნის წინ ბრიტანულ მასმედიაში...

შქმერული

დღეს ერთ-ერთი საუკეთესო ქართული კერძის...

"მოხრაკულა" დილით განსაკუთრებით საამოა

„მოხრაკულა“ _ ერთერთი ძველი ქართული...