"ბევრმა ნიჭიერმა ადამიანმა იმიტომ წაიტეხა ცხვირი, რომ გვერდით "მომქანჯალებელი" არ დაიტოვა" _ ვასილ მაღლაფერიძე

მთავარი თემა

"ბევრმა ნიჭიერმა ადამიანმა იმიტომ წაიტეხა ცხვირი, რომ გვერდით "მომქანჯალებელი" არ დაიტოვა" _ ვასილ მაღლაფერიძე

8 თებ. 2016, 16:02:30

რა ურთიერთობა აქვს ბიძინა ივანიშვილთან, როგორი პარლამენტი სჭირდება საქართველოს, რამდენად ადეკვატურები არიან დღევანდელი პარლამენტარები და შეძლებს თუ არა "ქართული ოცნება" არჩევნების მოგებას, რა კავშირი აქვს "მაესტროს" წილების გადაფორმებასთან _ ამ და სხვა მნიშვნელოვან თემებზე "გურია ნიუსისთვის" მიცემულ ექსკლუზიურ ინტერვიუში ტელეკომპანია "GDS"-ის გადაცემა "20/30"-ის მთავარი პროდიუსერი, პუბლიცისტი ვასილ მაღლაფერიძე საუბრობს.

_ ბატონო ვასილ, ბოლო დროს აქტიურად ვრცელდება ხმები, რომ "ქართული ოცნების" სიის ათეულში მოხვდებით. მიუხედავად თქვენს მიერ გაკეთებული განცხადებებისა, რომ პოლიტიკაში მოსვლას არ აპირებთ, მედია ამ თემაზე ბევრს წერს. უფრო მეტიც, მომავალი პარლამენტის თავმჯდომარედაც კი გასახელებენ... 

– ამ შემთხვევაში უფრო საინტერესო ის არის, როგორი დიდი გასაქანი აქვს ჩვენში ჭორ-ინფორმაციებს. რაც გინდა სისულელე მოიგონე და მთავარია, თქმა მოასწრო, უცებ გავრცელდება, არც გადაამოწმებს ვინმე, არც წყაროს იკითხავს. მაგის საჩვენებლად იყო, თავის დროზე რომ დავწერე, ევროკავშირი გოჭის დაკვლას გვიკრძალავს,-მეთქი და გახსოვთ, რა ამბავიც ატყდა. ჩვენთან წაკითხულის და ტელევიზორში მოსმენილის ლამის ბრმად სჯერათ, ლუარსაბს რომ მკითხავის სჯეროდა ისე და ჭორების შექმნაც ბიზნესად იქცა.

ახლა ეს ჩემი მოგონილი გოჭის ამბავი დამიბრუნდა პარლამენტის თავმჯდომარეობის ამბად. თუმცა, გამორიცხულია, რომ საერთოდ პარლამენტში შესვლაც კი ვცადო და ამაზე სამჯერ თუ ოთხჯერ ვუპასუხე ამ მოკლე ხანში.

ვინც ჩემი პარლამენტში შესვლის ამბავი შეთხზა, იმას, სინამდვილეში, საკუთარი თავი ანაღვლებს. არჩევნებამდე რამდენიმე თვეა დარჩენილი და ალბათ, აინტერესებს, რა ბედი ელის. ეტყობა, არ ეუბნება არავინ არაფერს, ამიტომ შემოაგდო ჭორი და აკვირდება, ვის რა რეაქცია ექნება, რომ, იქნებ, აქედან მაინც გაიგოს რამე.

_ ანუ პარლამეტში შესვლას არ აპირებთ!

– არ მგონია, ვინმეს დიდად აინტერესებდეს ეს საკითხი, მაგრამ, ვინაიდან გამეორება ცოდნის დედაა, კიდევ ერთხელ ვიტყვი _ პარლამენტში შესვლას არ ვაპირებ და იმედია, დაიხურება თემა. თუმცა, როგორ წარიმართება არჩევნები, ძალიანაც მაინტერესებს _ პროცესიც და შედეგებიც.

_ ერთ-ერთ კომენტარში აღნიშნეთ, რომ თქვენ იცით, როგორი პარლამენტარები სჭირდება ქვეყანას.

_ ეგ ვინ არ იცის?! მთავარია, როგორ შევიყვანოთ! გონიერი, სხარტი აზროვნების, ენა უნდა უჭრიდეს, უნდა ერკვეოდეს _ ვინ ვართ, საიდან მოვდივართ და საით მივდივართ. უნდა შეეძლოს საზოგადოების მთავარი პრობლემების დანახვა და მათი სწორად ფორმულირება; კანონის სტრიქონებს შორის ჩამალულ ნადვილ აზრს უნდა ხვდებოდეს; ადეკვატური უნდა იყოს! მგონი, დიმიტრი გელოვანის თამასას გადავაჭარბე, მაგრამ ნამდვილად სჭირდება ქვეყანას ადეკვატური პარლამენტარები.

_ დღევანდელი პარლამენტარები არ არიან ადეკვატურები?

_ 2012 წელს ხელისუფლების შეცვლა და თანაც უსისხლოდ, იყო უმნიშვნელოვანესი მოვლენა. როცა, პირდაპირი მნიშვნელობით ბრძოლა მიდიოდა ყველაფრის მკადრებელ ავტორიტარიზმის წინააღმდეგ და, კარგად გვახსოვს, რომ "ქართულ ოცნებასთან" სიახლოვე სახიფათო თემა იყო, იმ დროს, რასაკვირველია, "ქართული ოცნების" სია იყო ადეკვატური. ეს ადამიანები ბიძინა ივანიშვილს გვერდით დაუდგნენ, ბრძოლის ავანგარდში ჩადგნენ და მათ ამისთვის მადლობა ეკუთვნით. 

მაგრამ 2016 წლის პარლამენტი ახალი გამოწვევების წინაშე დგას და ამიტომ ამჟამად ისეთი პარლამენტარები სჭირდება ქვეყანას, რომლებიც ამ ახალ გამოწვევებს უპასუხებენ. შეიძლება, ძალიან კარგი ადამიანი იყო, ქვეყნის გულშემატკივარიც, მაგრამ თუ კონკრეტული დროში, კონკრეტულ სივრცეში, კონკრეტული საქმის კეთებისას მაინცდამაინც ის უნარები არ აღმოგაჩნდება, რომელიც ამ საქმეს სჭირდება, სასაცილო გამოჩნდები, შემაფერხებელი გახდები, ხელს შეუშლი სხვას და ქვეყანას დააზარალებ. საბოლოოდ, ამას არაადეკვატურობისკენ მივყავართ. ამიტომ, პარლამენტარი სტუმარივითაა, როგორც დროული მოსვლით გაგვახარა, ასევე წასვლით უნდა გაგვახაროს. თუ სტუმრის საუბარი ბჟუტურში გადადის და მისი საქციელი არაადეკვატური ხდება, მისი ადრინდელი დამსახურებაც გავიწყდება. ამიტომ წასვლა ყოველთვის დროულად სჯობს. თუნდაც ადრე წასვლითაც კი არაფერი შავდება, მაგრამ თუ წასვლა თუნდაც ერთი დღით დააგვიანე, დაგისტვენენ.

_ ვინ უნდა გადაწყვიტოს, ვინ რამდენად ადეკვატურია?

_ ამის უნივერსალური რეცეპტი არ არსებობს. გურიაში იციან სიტყვა "მოქანჯალება", რაც იმას ნიშნავს, სადღაც რომ იჩეხები და ცოტას შეგაჯანჯღარებენ, შეგაფხიზლებენ, რათა აზრზე მოხვიდე. 

ტკბობაში რომ ხარ, თავი კიტრად რომ მოგაქვს, შენ რომ არ შეგშვენის, იმ საქმისკენ რომ გაგიწევს გული და ამ დროს ახლობელი დაგიშლის, არ ქნა მაგი საქმეო, ე, მაგია "მოქანჯალება". 

ბევრმა ნიჭიერმა ადამიანმა სწორედ იმიტომ წაიტეხა ცხვირი, რომ გვერდით "მომქანჯალებელი" არ დაიტოვა, შემაკავებელი არ ჰყავდა და თავკონტროლი დაკარგა _ ამ წუთისოფლის უღრანში "მომქანჯალებლის" გარეშე მარტოხელა ადამიანი გზას ვერ გაიკვლევს.

_ ბიძინა ივანიშვილმა თუ იცის "მოქანჯალება"?

_ მე ახლა ბიძინა ივანიშვილს არ ვგულისხმობდი, თუმცა, რატომაც არა?! ბიძინამაც მაგარი "მოქანჯალება" იცის, მაგას კაცს არ ამადლის, მაგრამ, "მოქანჯალება" სახრე და იძულება კი არ არის, რჩევაა და გაფრთხილება; შეუსმენელი თუ ხარ, "მოქანჯალება" ვერ გიშველის _ ცოტა შენც უნდა გინდოდეს, რომ კედელს არ ურტყა თავი.

პარლამენტის თემას დავუბრუნდები. პარლამენტი განსაკუთრებული ადგილია _ აკვარიუმის თევზივით ხარ, ყველა მხრიდან გიყურებენ, შენს მუშაობას პირდაპირ ეთერში გადასცემენ, აიხედავ - გადაგიღებენ, დაიხედავ - გადაგიღებენ, ყველა ნაბიჯს და სიტყვას გიწონიან, სისულელეს იტყვი - დაგცინებენ, აბდალიაო! პირში წყალს ჩაიგუბებ და უაზროს დაგიძახებენ! სულ ფორმაში უნდა იყო და, რაც მთავარია, შენი აზრები და საუბარი მხოლოდ შენ კი არ უნდა მოგწონდეს, სხვებისთვისაც მისაღები უნდა იყოს და არსებულ რეალობასთანაც მოდიოდეს თანხვედრაში.

ისეც ხდება, რომ ადამიანს თვითშეფასებაში ჩავარდნა აქვს ხოლმე _ ვირს რქები არ ამოუვიდა, თავი ბოჩოლა ეგონა და კუნტრუში მოიწადინაო, - მაშინ ოჯახმა უნდა მოაქანჯალოს, მეგობარმა უნდა მოაქანჯალოს, მშობლიურმა პარტიამ უნდა მოაქანჯალოს და, თუ მაინც გაჯიქდა, ბოლოს ამომრჩეველმა უნდა მოაქანჯალოს. მოკლედ, რეცეპტი ის არის, რომ ადამიანი გრენლანდიის ნახატად არ უნდა გადაიქცეს!

ახლა გვჭირდებიან ისეთი პარლამენტარები, რომლებიც, პოლიტიკური ცხოვრების ავანგარდში იქნებიან, ქვეყნის შიგნით პულსზე ედებათ ხელი და კანონის სტრიქონებს შორის ამოიკითხავენ ნამდვილ შინაარსს. ამავე დროს, საერთაშორისო ასპარეზზე და სტრუქტურებში შეძლებენ ქვეყნის ინტერესების დაცვას, რაც ძალიან კონკრეტულ ცოდნას და უნარებს მოითხოვს.

_ თქვენი აზრით, როგორი მთავრობა სჭირდება საქართველოს?

_ მე ვფიქრობ, გიორგი კვირიკაშვილი ახლაც და არჩევნების შემდეგაც შეძლებს ისეთი მთავრობის ჩამოყალიბებას, რომელიც წარმატებით უპასუხებს ახალ გამოწვევებს. მას აქვს თანამედროვე მმართველისთვის მნიშვნელოვანი თვისებები _ კეთილსინდისიერია, კვალიფიციურია, მშვიდია, გულისყურით მომსმენია(!), საკმარისად მკაცრია, გადაწყვეტილებების მიმღებია და კლანებთან არ ასოცირდება. არც ერთ ამ საკითხში საზოგადოებას მის მიმართ ეჭვი არ უჩნდება.

სხვათა შორის, ვინაიდან გიორგი კვირიკაშვილს პარტიის თავმჯდომარედ ირჩევენ, ზემოთ ნახსენები საპარლამენტო სიის შემადგენლობაც მნიშვნელოვნად იქნება დამოკიდებული მის პოლიტიკურ გემოვნებაზე და ხედვებზე. ნადვილად ველი, რომ ეს პროგრესზე ორიენტირებული სია იქნება!

_ არჩევნების თემაზე რადგან ვსაუბრობთ, მინდა გკითხოთ, როგორ უყურებთ ოლქების ახლებურად დაყოფის საკითხს. მაგალითად, გურიაში ჩოხატაურმა და ლანჩხუთმა ერთი დეპუტატი უნდა აირჩიოს, ზოგან _ პირიქით, გაიყო მუნიციპალიტეტი. თქვენი აზრით, რამდენად გამართლებულია ამომრჩეველთა ასეთი გადანაწილება?!

_ ამჟამად მიღებული გადაწყვეტილებით, ეს დროებითი ნორმაა და 2020 წლიდან მაჟორიტარული არჩევნები საერთოდ უნდა გაუქმდეს. ზოგი წელსვე ითხოვს მაჟორიტარული სისტემის გაუქმებას.

პარტიების წარმომადგენლები, ბუნებრივია, ამ საკითხს ისე შეხედავენ, ისე დაასაბუთებენ და ისეთ მაგალითებს მოიყვანენ საერთაშორისო პრაქტიკიდან, რაც მათ პარტიებს უფრო მეტ ძალაუფლებას მოუტანს. ეს ბუნებრივია, რადგან ნებისმიერი პარტია ძალაუფლების მოპოვების მსურველთა გაერთიანებაა.

მაგრამ ეს ჩვენ დაგვატყდა უცებ ყველაფერი ერთად _ დამოუკიდებლობა, დემოკრატია, პარლამენტი, პარტიები, პოლიტიკური ცხოვრება და თანაც უკიდურესი გაჭირვების ფონზე, როდესაც ადამიანები პირდაპირი მნიშვნელობით გადარჩენისთვის იბრძოდნენ. ამიტომაც ვერ დავლაგდით; ამიტომ ვერასდროს გახდა კონსტიტუცია საერთო ეროვნული შეთანხმების საგანი. ვისაც როგორ "აწყობდა" იმ მოცემულ მომენტში, ისე ჭრიდა და კერავდა ამ კონსტიტუციას. დღეს აღმოჩნდა, რომ თურმე მაჟორიტარული სისტემა გვიშლის ხელს, დრო გავა, მერე შეიძლება ისევ მოგვინდეს.

ბევრ ქვეყანაში, სადაც საზოგადოებრივი და პოლიტიკური ცხოვრება საუკუნეების განმავლობაში დამოუკიდებლად და თანამიმდევრულად ვითარდებოდა, ქვედა პალატასთან ერთად, თითქმის, ყველგან არის ზედა პალატა _ სენატი, სადაც თანაბრად წარმოდგენილია კუთხეების, რეგიონების თუ შტატების ინტერესები, განურჩევლად მოსახლეობის რაოდენობისა.

საქართველოს რეალობიდან და ბუნებითი მოწყობიდან გამომდინარე, ვგულისხმობ, კუთხეებს, რაც ჩვენი სიმდიდრე და საფუძველია, პირადად მე სენატი აუცილებელი მგონია და დარწმუნებული ვარ, აქამდეც მივალთ.

_ ფიქრობთ თუ არა, რომ ქალები და კაცები თანაბრად უნდა იყვნენ პარლამენტში?

_ დარწმუნებული ვარ, რომ მალე შეიცვლება არასწორი წარმოდგენა, თითქოს პოლიტიკური გადაწყვეტილებები მხოლოდ კაცებმა უნდა მიიღონ და ეს მათ უკეთ გამოსდით. 

სახელმწიფოს საფუძველი ოჯახია და მხოლოდ ის ოჯახი იქნება სიცოცხლისუნარიანი, სადაც ქალი და კაცი ერთად იღებენ გადაწყვეტილებებს. ყველაფერს რომ თავი დავანებოთ, გადარჩენის ინსტინქტი გვკარნახობს ამას და ეს ქართველებმა კარგად გამოვცადეთ _ საუკუნეების განმავლობაში სახელმწიფო არ გვქონდა და ოჯახებმა შეინარჩუნეს საქართველო. იმ ოჯახში კი, ცხადია, ქალი და კაცი ერთად იღებდნენ გადაწყვეტილებებს. ასე ხდებოდა ყველაზე ტრადიციულ საზოგადოებებშიც კი, სადაც არასდროს ყოფილა მამაკაცების დიქტატურა, როგორც ეს ზოგს შეცდომით ჰგონია.

ხოლო თუ ერთპიროვნული მმართველობების ეპოქებს გავიხსენებთ, ვერავინ იტყვის, რომ, გინდ საქართველოში და გინდ საზღვარგარეთ, ქალებმა მართვა მამაკაცებზე ცუდად მოახერხეს. პირიქით _ ქალების მმართველობის პერიოდი თითქმის ყველგან ოქროს ხანად იქცა. ჰოდა, თუ ყველგან და ყველა დროში შეძლეს ქალებმა მართვა, რაღა ამ ჩვენ პარლამენტში არ გამოუვათ?!

ჩვენ ქვეყანას განსაკუთრებით სჭირდება გადაწყვეტილებების მიღებაში ქალების მონაწილეობა ყველა დონეზე. ეს კაცების დაჩაგვრას სულაც არ ნიშნავს _ ქალს ძლიერად აქვს განვითარებული შთამომავლობის დაცვის ინსტინქტი და ხანგრძლივ სტაბილურობაზე ორიენტირებულ გადაწყვეტილებებს იღებს. ამიტომ, თანაბარი ბალანსის შემთხვევაში, ბავშვიც უფრო დაცული იქნება, კაციც, ქვეყანაც და გარემოც. ვის რა უნდა ჰქონდეს ამის საწინააღმდეგო?! 

_ ასევე, აქტიურად იწერება თქვენი და ბიძინა ივანიშვილის ურთიერთობაზე. ხშირად ამბობენ, რომ ივანიშვილი გადაწყვეტილებებს თქვენს გარეშე არ იღებს და უფრო მეტიც, მედიასთან ურთიერთობებს სწორედ თქვენ არკვევთ. რა ურთიერთობა გაქვს ბიძინა ივანიშვილთან?

_ ასეთი რამ სხვადასხვა დროს, მხოლოდ ჩემზე კი არა, ბევრ სხვაზეც დაწერილა. კარგი და თავმოსაწონი ამბავი იქნებოდა ეს ჩემთვის, მარა დაიჯერებს ამას ვინმე?! ნებისმიერი საშუალო სტატისტიკური გურული რას გეტყვით ამაზე, თუ იცით? – "ამდენი თუ იცოდა და ასეთი ჭკვიანი იყო, ივანიშვილს რეიზა ეუბნებოდა ამ რჩევებს, თავისთვის ვერ მეიხმარაო?!" ამ გურულის ნათქვამს დავამატებ, რომ "მაგრობა" ბიძინა ივანიშვილისთვის რჩევის მიცემა კი არ არის _ იგი დიდი ყურადღებით უსმენს ყველას, "მაგრობა" მისგან რჩევის მიღებაა. 

მედიასთან ურთიერთობის გარკვევას რაც შეეხება, აგერ არის მედია და ტყუილს არ მათქმევინებენ _ საერთოდ არანაირი ურთიერთობა არ მაქვს სხვა მედიასაშუალებებთან, თუ მხედველობაში არ მივიღებთ, რომ ზოგან მუშაობენ ჩემი მეგობრები და ნაცნობები, რომელთაც ძირითადად ფეისბუქში თუ ვხედავ და კიდევ ხანდახან ინტერვიუსთვის მირეკავენ ხოლმე. 

_ ჟურნალისტმა ელისო კილაძემ ინგა გრიგოლიასთან თქვა და დაწერა კიდეც ასეთი რამ: "უჩა მამაცაშვილთან ერთად "მაესტროს" წილების გაფორმების მოლაპარაკებებში ნამდვილად მონაწილეობდა "20/30"-ის ჟურნალისტი ბიძინა ივანიშვილის მხრიდან. მის ვინაობას დავასახელებ მაშინ, როცა ამას საჭიროდ ჩავთვლი." თქვენ ან სხვა ვინმე მართლაც მონაწილეობდით "მაესტროს" წილების გაფორმებაში?

_ ქალბატონ ელისოს, ალბათ, ძალიან დაწყდება გული, როდესაც შეიტყობს, რომ მისთვის, თურმე, არასწორი ინფორმაცია მიუწოდებიათ გასავრცელებლად. ასევე, ალბათ, გული დაწყდებათ იმ ჟურნალისტებსაც და ექსპერტებსაც, რომელთაც ამ მცდარი ინფორმაციის საფუძველზე, მცდარი ვარაუდები გამოთქვეს და შესაბამისი დასკვნებიც გააკეთეს, მაგრამ, მიუხედავად ამისა, მაინც უნდა ვთქვა, რომ ამ ინფორმაციას სიმართლესთან არავითარი კავშირი არ აქვს. 

რას ვიზამთ, ხდება ხოლმე _ ვის არ შეშლია?! თუმცა, ეს ტრაგედია ნამდვილად არ გახლავთ _ საქართველოში ყოველდღე იმდენი დეზინფორმაცია ვრცელდება, რომ ერთი და ორი ტყუილით მეტი საერთო სურათს ძალიან ვერ დაამძიმებს.

_ საინტერესოა თქვენი აზრი იმ წინააღმდეგობების შესახებ, რაც პერიოდულად თავს იჩენს ხოლმე პრეზიდენტის ინსტიტუტსა და აღმასრულებელ ხელისუფლებას შორის...

_ პრობლემის სათავე ლოგიკურად გაუმართავ კონსტიტუციაშია, რომელიც ასეთი იმიტომაა, რომ თავის დროზე ერთმა ადამიანმა, ამჯერად სხვა ქვეყნის მოქალაქემ, საკუთარ ტანზე გადაწყვიტა ქვეყნის ძირითადი კანონის მორგება და ცუდმა მკერავმა _კონსტიტუციონალისტებმაც მის ხუშტურზე ჭრეს და კერეს. ამიტომაც დღეს ჩვენი კონსტიტუცია ისევ სერიოზულ ცვლილებებს საჭიროებს. საკონსტიტუციო კომისიაც არის შექმნილი ამ მიზნით.

ჯერ საპრეზიდენტო ქვეყანა ვიყავით, მერე გავხდით საპარლამენტო, მაგრამ შევინარჩუნეთ საპრეზიდენტო მოდელის ორნამენტები. აღმასრულებელი ხელისუფლება და რეალური ძალაუფლება პრემიერის ხელშია, რომელსაც პარლამენტი ნიშნავს, სამაგიეროდ, საყოველთაო არჩევნების გზით ვირჩევთ პრეზიდენტს, რომელიც ბევრს ვერაფერს წყვეტს. მე მგონია, რომ წინააღმდეგობები სწორედ იმიტომაც იჩენს ხოლმე თავს, რომ დღევანდელი პრეზიდენტი, ცნობიერად თუ ქვეცნობიერად, ძველი საპრეზიდენტო უფლებებისადმი მონატრებას განიცდის და ეს განუწყვეტლივ იგრძნობა მის ქცევაში, საუბარში, ცერემონიების დაგეგმვაში და, თუ გნებავთ, იმ ბედუკუღმართი სასახლისადმი დამოკიდებულებაშიც, რასაც იგი, როგორც ჩანს, ძალაუფლების სიმბოლოდ აღიქვამს.

ძალაუფლებისადმი ლტოლვა ადამიანის ინსტინქტია და ეს უნდა მივიღოთ, როგორც ბუნებრივი მოვლენა, მაგრამ კონსტიტუციის დანიშნულებაც სწორედ ის არის, რომ ეს ინსტინქტები მოთოკოს, ძალაუფლება გადაანაწილოს და მკაფიო საზღვრებში მოაქციოს ისე, რომ ერთი შტო მეორის ფუნქციებში ვერ შეიჭრას. ამ კუთხით ჩვენი კონსტიტუცია გარკვეულ კითხვის ნიშნებს აჩენს. მაგალითად _ საპარლამენტო ქვეყანაში რატომ ვირჩევთ პრემიერზე გაცილებით დაბალი უფლებების მქონე პრეზიდენტს საყოველთაო არჩევნებით?! არჩევნები პრეზიდენტს ანიჭებს მაღალ ლეგიტიმაციას, თუმცა, კონსტიტუცია უსაზღვრავს დაბალ უფლებებს, ამიტომაც პრეზიდენტი მუდმივად ცდილობს, რომ ხელისუფლების დანარჩენმა შტოებმა მისი უფლებამოსილება ცნონ არჩევნებით განპირობებული მაღალი ლეგიტიმაციის კონტექსტში, მთავრობა კი მის უფლებებს განიხილავს კონსტიტუციით განსაზღვრული უფლებების ფარგლებში. უბრალო ენით რომ ვთქვათ, პრეზიდენტი იბრძვის საკუთარი ძალაუფლებისთვის.

ამჟამად ბატონმა გიორგი მარგველაშვილმა პრეზიდენტად მუშაობის საკმაო გამოცდილება მიიღო და საინტერესო იქნებოდა მისი მოსაზრებების მოსმენა სწორედ კონსტიტუციასთან დაკავშირებით _ როგორ ხედავს იგი მისი გადმოსახედიდან პრეზიდენტის ინსტიტუტს, რა უფლებების დამატებას მიიჩნევს მიზანშეწონილად და რა უფლებების ჩამოცილებას მიაჩნევს საჭიროდ. თუ ასეთი დისკუსია დაიწყება, თვალნათელი გახდება ნამდვილი მიზეზი, თუ რატომ იძაბება პერიოდულად ურთიერთობები პრეზიდენტსა და მთავრობას შორის. პრობლემის დანახვა კი მისი მოგვარების აუცილებელი წინაპირობაა.

_ შეძლებს "ქართული ოცნება" არჩევნების მოგებას?

_ ფაქტობრივად, უკვე გიპასუხეთ ამ კითხვაზე, როდესაც გითხარით, რომ ჩემი აზრით, გიორგი კვირიკაშვილი ახლაც და არჩევნების შემდეგაც შეძლებს ისეთი მთავრობის ჩამოყალიბებას, რომელიც წარმატებით უპასუხებს ახალ გამოწვევებს,-მეთქი.

დღევანდელი გადასახედიდან ასე ჩანს, რომ ახალ პარლამენტში "ოცნების" და "ნაციონალების" გარდა, შეიძლება ვიხილოთ კიდევ ორი, ან იქნებ სამი პარტიაც კი, რომლებიც დამოუკიდებლად გადალახავენ ბარიერს. ეს არის ჩვენი პოლიტიკური რეალობა, და, სწორედ ამ პარტიებს შორის მოუწევს მოსახლეობას არჩევნის გაკეთება.

არ ჩანს, რომ ამ ეტაპზე "ქართული ოცნების" გარდა, რომელიმე სხვა პარტია მზად იყოს ხელისუფლების ასაღებად. ვგულისხმობ პარტიულ ინფრასტრუქტურას, რეგიონებში განშლადობას და მოსახლეობის განწყობას, თორემ ცალკეული პარტიების ლიდერებს შეიძლება აქვთ კიდეც ასეთი ირაციონალურ სურვილები!

თუ "ქართულ ოცნება" კარგ საპარლამენტო სიას დადებს და სწორ საარჩევნო სტრატეგიას შეიმუშავებს, რაც ძალიან რთულ ამოცანას არ წარმოადგენს, იგი მყარი უმრავლესობით იქნება წარმოდგენილი პარლამენტში.





 ახალი ამბები
  • ხელს მოვაწერ შეწყალების აქტს _ პრეზიდენტი გიორგი რურუას შეიწყალებსსაქართველოს პრეზიდენტმა, სალომე ზურაბიშვილმა საგანგებო ბრიფინგზე განმარტა, თუ რა შემთხვევაში შეიწყალებს გიორგი რურუას. „პრეზიდენტი გადაწყვეტილებას იღებს მოსალოდნელი კრიტიკისა თუ შექების მიუხედავად. შეწყალების უფლებამოსილება პრეზიდენტის დისკრეციაა და არა მოლაპარაკებების საგანი. შეწყალება არ ექვემდებარება რაიმე ზეწოლას. მას ბევრი რამ შეიძლება დავარქვათ, გარდა პოლიტპატიმრისა, მაგრამ თუ სასწორზე დგას პოლიტიკური ჩიხიდან გამოსვლა, პრეზიდენტის მოვალეობაა, საკუთარ შეხედულებებსა და პრინციპებზე მაღლა დააყენოს ქვეყანა. როდესაც პარტიები შევლენ პარლამენტში, ხელს მოაწერენ საბოლოო დოკუმენტს და აშშ და ევროკავშირი გამოაცხადებენ, რომ შეთანხმება შედგა, ერთი კვირის ვადაში, ხელს მოვაწერ შეწყალების აქტს“ - აღნიშნა სალომე ... ...
  • ჭიჭინაძე: ერთი ფეხით პარლამენტში ყოფნა და მეორე ფეხით _ აქციებზე, არავის გამოუვაერთი ფეხით პარლამენტში ყოფნა და მეორე ფეხით აქციებზე, არავის გამოსვლია არასოდეს  და არც გამოუვა, _ ამის შესახებ პოლიტიკური გაერთიანება ტრიბუნას ლიდერმა "დავით ჭიჭინაძემ განაცხადა. ჭიჭინაძის თქმით, "ნახევრად გამარჯვებები, დამარცხებას ნიშნავს". "ერთი ფეხით პარლამენტში ყოფნა და მეორე ფეხით აქციებზე, არავის გამოსვლია არასოდეს  და არც გამოუვა. ოპოზიცია უნდა გაერკვეს, რადგან მათ 8 მარტის შეთანხმებაც გამარჯვებად აღიარეს და რა შერჩათ ხელში, ფაქტია. ახლა უარესი პერსპექტივის წინ ვდგავართ. ნახევრად გამარჯვებები, დამარცხებას ნიშნავს და იმიტომ. მითთუმეტეს, რომ ძალიან დიდია იმ ხაფანგში გაბმის ალბათობა, რასაც „ოცნება“ ხლართავს. დღეს გასათავისუფლებებლია ოპოზიციის ლიდერი, ოღონდ ღირსეულად! ამნისტრია კი, „ოცნებას“ და იმ ჩინოვნიკებს სჭირდებათ, ვინც დანაშაული ჩაიდინა და არა ნიკა მელიას! ნიკა მელიაა სწორედ ის ადამიანი, ვინც საკუთარი თავისუფლების, ჯანმრთელობის ფასად დაუბრუნა ღირსება იმ ოპოზიციას, რომელმაც 8 მარტის მერე ყველაფერი ჩააფლავა", _ განაცხადა დავით ... ...
  • "გირჩმა" ევროპული საბჭოს პრეზიდენტის ახალ დოკუმენტს ხელი მოაწერა"გირჩის" სამმა დეპუტატმა, ვახტანგ მეგრელიშვილმა, იაგო ხვიჩიამ და ალექსანდრე რაქვიაშვილმა, ევროპული საბჭოს პრეზიდენტის,  შალრ მიშელის ახალ დოკუმენტს ხელი მოაწერეს. შესაბამისი ხელმოწერა პარტიის წევრებმა Facebook ლაივში გააკეთეს. როგორც მეგრელიშვილმა განაცხადა, რომ დარჩენილმა 60-მა კაცმა თვითონ უნდა გადაწყვიტოს უნდა შეთანხმება და ამ ხალხის გვერდზე დგომა, თუ უნდა, რომ ფეხებზე დაიკიდოს ეს ხალხი და საერთოდ ეს ყველაფერი. ,,ვუსურვოთ წარმატება ამ პროექტს, მე მინდა, რომ მოგვბაძონ ადამიანებმა, ჩვენმა კოლეგებმა ოპოზიციიდან და ხელისუფლებიდან, ყოველ შემთხვევაში ეცოდინება ხალხს, რომ ჩვენ არ ვართ დესტრუქტორი ხალხი, გვინდოდა შეთანხმება. ინდივიდუალურ პასუხისმგებლობაზე დაიყვანეს ჩვენმა დასავლელმა მეგობრებმა თავიანთი წინადადება. მე ვფიქრობ, რომ დარჩენილმა 60-მა კაცმა თვითონ უნდა გადაწყვიტოს უნდა შეთანხმება და ამ ხალხის გვერდზე დგომა, თუ უნდა, რომ ფეხებზე დაიკიდოს ეს ხალხი და საერთოდ ეს ყველაფერი. მოდით, ჩვენ რაღაცნაირი მაგალითი მივცეთ იმის, რომ ეს შესაძლებელია - მოვაწეროთ ხელი ამ ფორმალურ დოკუმენტს“ - განაცხადა მეგრელიშვილმა. იაგო ხვიჩიამ,   აღნიშნა, რომ თუ შეთანხმება ცალხმრივი იქნება და "ქართული ოცნება" მას ხელს არ მოაწერს, იმ რეჟიმით მუშაობას გააგრძელებენ, რაც დაანონსეს. „მინდა, რომ მოგვბაძონ კოლეგებმა ოპოზიციიდან და ხელისუფლებიდან. ყოველ შემთხვევაში ეცოდინება ხალხს, რომ ჩვენ არ ვართ დესტრუქტორი ხალხი და გვინდოდა შეთანხმება. მე მინდა, რომ განვმარტო, რომ თუ „ქართული ოცნება“ ჩვენთან დადებს ამ შეთანხმებას და მოაწერს ამას ხელს და აქ არსებული პირობები აღსრულდება მიუხედავად იმისა, რაც იზამს „ნაციონალური მოძრაობა“ და სხვა ოპოზიციური პარტიები, ჩვენ შევდივართ სრულად პარლამენტში და ეს ხელმოწერა ნიშნავს ამას. თუ „ქართული ოცნება“ ამას არ მოაწერს ხელს და ეს მხოლოდ ცალმხრივი იქნება - ის არ იქნება შეთანხმება და ჩვენ გავაგრძელებთ იმ რეჟიმში პარლამენტში ყოფნას, რა რეჟიმშიც დღეს შევდივართ პარლამენტში“ - განაცხადა იაგო ხვიჩიამ. ცნობისთვის, 18 აპრილს, ევროპული საბჭოს პრეზიდენტმა შარლ მიშელმა საქართველოს პოლიტიკურ პარტიებს ახალი წინადადება შესთავაზა. წინადადება ხუთ პუნქტს მოიცავს. მათ შორის არის, პოლიტიზებულ მართლმსაჯულებად აღქმული საკითხები და მომავალი არჩევნები. დოკუმენტის თანახმად, ხელისმომწერები ვალდებულებას იღებენ, შეთანხმების ხელმოწერიდან ერთი კვირის ვადაში, რეაგირება მოახდინონ პოლიტიზებულ მართლმსაჯულებად აღქმულ ორ საკითხზე, ამნისტიის საშუალებით და / ან ისეთი ზომების მიღებით, რომელიც ანალოგიურ შედეგს გამოიღებს. კერძოდ, ამ შეთანხმების ხელმოწერიდან ერთი კვირის ვადაში, პარლამენტში წარმოდგენილმა პარტიამ უნდა მოახდინოს ინიცირება კანონისა ამნისტიის შესახებ, რომელიც 2019 წლის 19 – 21 ივნისის პროტესტებთან დაკავშირებულ ყველა დარღვევასა და დაკავებას შეეხება. ამასთან, შარლ მიშელის წინადადების თანახმად, "ქართული ოცნების" 2021 წლის 16 აპრილის შეთავაზების შესაბამისად, ვადამდელი საპარლამენტო არჩევნები დაინიშნება 2022 წელს იმ შემთხვევაში, თუ 2021 წლის ოქტომბრის ადგილობრივი თვითმმართველობის არჩევნებში პარტია "ქართული ოცნება" მიიღებს ნამდვილი პროპორციული ხმების 43% -ზე ... ...
  • ვაშაძე: "ხელსაყრელ პირობებს ქმნის გამარჯვებისთვის“ „სტრატეგია აღმაშენებელი, როგორც პასუხისმგებლიანი ოპოზიციური პარტია, ვთვლით, რომ უნდა გამოვიყენოთ საერთო ბრძოლით მიღწეული  შექმნილი შესაძლებლობის ფანჯარა და ხელი უნდა მოვაწეროთ ჩვენი დასავლელი მიუკერძოებელი და სამართლიანი მედიატორების მიერ შემოთავაზებულ დოკუმენტს, რომელიც მიუხედავად არსებული ხარვეზებისა, რაც გამომდინარეობს კომპრომისის ბუნებიდან, შესაძლებელია ყველამ ერთად  ვაქციოთ დიდი შემობრუნების, დიდი ცვლილებების გარდამტეხ წერტილად. ჩვენ ამ ბრძოლაში გვაქვს  ორი მთავარი ფაქტორის მხარდაჭერა: 1. ეს არის ჩვენი მოქალაქეები და მათი ურყევი ნება, იცხოვრონ თავისუფალ და ძლიერ სახელმწიფოში; 2. ჩვენი დასავლელი პარტნიორების მხარდაჭერა, რომ საქართველო იყოს ძლიერი, თავისუფალი და დემოკრატიული სახელმწიფო. შეთანხმება თავისი ბუნებიდან გამომდინარე გულისხმობს კომპრომისებს და სწორედ ამიტომ წარმოდგენილი ხუთ  პუნქტიანი დოკუმენტი სულაც არ არის იდეალური. მას გააჩნია ხარვეზები, მაგრამ ერთობლიობაში შეთანხმება ქმნის პირობებს ქართული ოცნების სწრაფად და ჩვენი ქვეყნისთვის ნაკლები  ზიანით ჩამოშორებისთვის. მე მესმის, გარკვეულ საკითხებთან მიმართებაში ემოციური დამოკიდებულებების, ასევე კარგად მესმის იმ ჯგუფების, რომლებიც გარკვეული მაქსიმებით ხელმძღვანელობდნენ გადაწყვეტილების მიღების პროცესში, მაგრამ ჩემი და სტრატეგია აღმაშენებლის გუნდის მოტივაცია შეთანხმების მიღწევაზე მომდინარეობს შექმნილი რეალობის არა ემოციური და რადიკალური, არამედ რეალური და პრაგმატული აღქმებიდან. მეგობრებო, ჩვენ ვცდილობთ გამოვიყენოთ ქართულ ოცნებასთან, როგორც უდიდეს უსამართლობასთან ბრძოლის ყველა საშუალება და რაც მთავარია, გამარჯვებამდე შევქმნათ გამარჯვებისთვის საჭირო წინაპირობები. ის, რომ ქვეყანაში უნდა შეწყდეს პოლიტიკური მოტივით დევნა და უნდა გათავისუფლდნენ ამ მოტივით დაკავებული ადამიანები, არის ძალიან მნიშვნელოვანი; ის, რომ თვითმმართველობის არჩევნები შეიძლება ვაქციოთ ქართული ოცნების ხელისუფლებისგან ჩამოშორების დიდ სამოქალაქო მოძრაობად; ის, რომ  ქვეყანას უნდა ჰქონდეს თავისუფალი და მიუკერძოებელი სასამართლო და დეპოლიტიზირებული სამართალდამცავი სისტემა; ის, რომ  ქვეყანას უნდა ჰქონდეს სამართლიანი და დემოკრატიული არჩევნები, უფრო თავისუფალი და მიუკერძოებელი საარჩევნო სისტემა; დიახ, სწორედ ამაზე შეთანხმება არის გამარჯვების მიღწევის წინაპირობა. უნდა გვახსოვდეს, რომ დამოუკიდებლობისთვის ბრძოლის საწყის ეტაპზე,  შეუძლებელი ჩანდა 9 აპრილის კომუნისტ ჯალათებთან რამეზე შეთანხმება , მაგრამ იმ დროინდელი ლიდერების ჯგუფის პრაგმატულმა ქცევამ, რომ დაეყოლიებინათ კომუნისტური პარტია მრავალპარტიულ არჩევნებზე, შექმნა თავისუფლების მოპოვებისთვის და გამარჯვებისთვის გადამწყვეტი პირობები. დიახ, დღეს საქართველო იმყოფება ისტორიულ გზაგასაყარზე, როცა საბოლოოდ უარი უნდა ვუთხრათ კომუნისტურ და ბოლშევიკურ სულისკვეთებას. შესაბამისად, ჩვენ ან ვიპოვით კრიზისიდან გამოსავალს შეთანხმების გზით, ან უკომპრომისო და შეურიგებელი ქმედებებით კიდევ ერთხელ, ეჭვქვეშ დავაყენებთ თავისუფლებას და  ჩვენ სახელმწიფოებრიობას, რითაც ისარგებლებს არა ჩვენი მოქალაქეები, არამედ მტრული სახელმწიფო, რომელზეც არა ერთხელ მიგვითითეს ამერიკის სენატის და ევროპარლამენტის ტრიბუნიდან. დიახ, აღნიშნული შეთანხმება გამარჯვება არ არის, მაგრამ არსებულ ვითარებაში ხელსაყრელ პირობებს ქმნის გამარჯვებისთვის“,_ აცხადებს "გიორგი ვაშაძე - სტრატეგია აღმაშენებლის" ლიდერი, გიორგი ... ...
  • „საარჩევნოდ ჩაგვისხეს, ახლა ჩაგვიხსნეს“: ოზურგეთში გარემოვაჭრეები წყალს ითხოვენოზურგეთში, ცხრა აპრილის ქუჩის მონაკვეთზე, ერთი წლის წინ, მუნიციპალიტეტის მერიამ გარე სავაჭროდ ჯიხურები დადგა .  მანამდე ღია ცის ქვეშ მდგმომ  მოვაჭრეებს, ადგილების გამოყოფის გარდა, იქვე  წყლის ონკანიც გაუკეთეს. -ონკანი ღიად არასდროს  დაგვიტოვებია. ამ გახურებული პანდემიის  პირობებში ხელს ვიბანდით. გვიხაროდა. სასმელი წყალიც არ გვქონდა საძებარი. მთელი დღე ჯიხურებში ვზივართ, რომ საღამოს სახლში ორიოდე პური წავიღოთ. მოვიდნენ ახლა და დაგვიკეტეს. არჩევნების წინ წყალი ჩაგვისხეს აქ, ასე ჰქვია.  ახლა მილი ჩაგვიხსნეს მთლიანად და მიაწებეს ზედ რაღაც და ლუქი დაადეს, რომ ვინმემ თავიდან არ ჩართოს, _ გვითხრეს ჯიხურების  მოვაჭრეებმა. წყალმომარაგების კომპანიის დირექტორმა, დავით ცერცვაძემ, „გურია ნიუსთან“ ასეთი კომენტარი გააკეთა: _მრიცხველი არ დგას.  ეს იყო აღურიცხავი წყალი,   ამიტომ ჩავკეტეთ. _ერთი წლის მანძილზე როგორ აწვდიდით აღურიცხავ წყალს? ამბობენ, რომ ხელისუფლებამ საარჩევნოდ გაუკეთა. აქამდე რატომ არ დაუკეტეთ   ან მრიცხველი რატომ არ დაუდგით? _არ ვიცი. აღურიცხავი იყო და ამიტომ გავაუქმეთ, _ მოკლედ გვიპასუხა  ცერცვაძემ. შემდეგ ჩვენ ოზურგეთის მუნიციპალიტეტის მერიას მივმართეთ. _ვიცით ამ პრობლემის შესახებ. მრიცხველი მალე დაიდგმება და მოვაჭრეებს წყალი დაუბრკოლებლად მიეწოდებათ, ამ დღეებში მოგვარდება ეს საკითხი - გვითხრეს პრრესსამსახურში.  ... ...

არქივი

ტესტები

ტესტი _ როგორ იცნობ საქართველოს ისტორიას

სად დაამარცხა თამარ მეფემ რუმის...

ტესტი _ გაქვს თუ არა კარგი ზოგადი განათლება?

რომელ ცნობილ მეცნიერს მიენიჭა 1921...

ტესტი _ რა იცი ჰოლივუდის ვარსკვლავების შესახებ

ლეონარდოს დი კაპრიოს სახელი ლეონარდო...

ტესტი _ რამდენად ერკვევი სხვადასხვა სფეროში

რომელია ყველაზე პატარა სახელმწიფო მსოფლიოში?

ტესტი _ როგორ იცნობ გარე სამყაროს?

რომელ ცხოველს შეუძლია უწყლოდ გაძლება...

ტესტი _ აქვს თუ არა თქვენს ერუდიციას ფართო ჰორიზონტი

ეიფელის კოშკი ზაფხულში 15 სანტიმეტრით...

კარმიდამო ჩემი

"კალისტო 1920 "_ გურიაში "გემოვანის" პური გამოჩნდა

პური ერთ-ერთი უძველესი საკვებია და...

ერთი ნაჩუქარი ბაჭიით დაწყებული საქმე: "ბოცვრის მოშენება ყველა ოჯახმა უნდა შეძლოს"

ჩოხატაურის მუნიციპალიტეტის სოფელ შუაამაღლებაში მცხოვრები,...

ზღმარტლი _ მცენარე, რომელიც იმსახურებს ყურადღებას

მუშმულას და უნაბის შემდეგ, ჩვენს...

გავამზეუროთ ქოთნის ყვავილები

ახლა, ადრიან გაზაფხულზე, მზიან, თბილ...

ქათმის მხალეული

მრგვალად მოხარშული (და არა შემწვარი)...

ბადრიჯნის უხორცო ჩანახი

ერთი კილოგრამი (ან რამდენიც გსურთ)...

უნაბი _ ძვირფასი ხეხილოვანი და სამკურნალო მცენარე

უნაბის ნაყოფი გემოთი და გარეგნობით...

მუშმულა _ საუკეთესო მცენარე, რომელიც უყურადღებოდ არ უნდა დარჩეს

 მუშმულა (იაპონური ზღმარტლი) განთქმულია ნაყოფის...

ჩავატაროთ თხილის "ცისფერი წამლობა"

ჩვენი მკითხველები აქტიურად გვეხმაურებიან და...

გურიაში კივს საშიში დაავადება გაუჩნდა

გურიაში, კერძოდ კი, ოზურგეთში, კივის...