"მალე თხილსაც ჩაივით აჩეხავს ხალხი"

მთავარი თემა

"მალე თხილსაც ჩაივით აჩეხავს ხალხი"

2017 აგვ 17 11:18:24

ერთი კილოგრამი თხილის ფასი 2 ლარამდე დაეცა, რასაც გურიის მოსახლეობა ტრაგიკულად აღიქვამს და ამბობს, რომ ერთადერთი კულტურა, რომელმაც საკუთარი თავი თავადვე დაიმკვიდრა და გლეხობისთვის ლუკმაპურის იმედია, მალე ჩაის ბედს გაიზიარებს.

"საშველი არ არის _ მაფია და მავნებლები თანაბარი შემართებით გვიტევენ. ვინ იცის, იქნებ, ერთმა მოიზიდა მეორე ან ბუნების რისხვაა. ყოველ შემთხვევაში, კრიტიკულ ზღვარზე მივიდა თხილის ყოფნა-არყოფნის საკითხი და მალე, დარწმუნებული ვართ, ხალხი ისევე აჩეხავს მას, როგორც ჩაი ამოძირკვეს საქართველოში", _ გვეუბნებიან ოზურგეთის თხილის ბაზარზე თხილის ჩასაბარებლად თუ ფასის გასაგებად მოსული მოქალაქეები: მანანა ქიქოძე, ვაჟა სალუქვაძე, მარინა კაპანაძე, ნორა სალია.

ოზურგეთის თხილის მიმღებ პუნქტებში, ბოლო ოცი წლის მანძილზე რომ აბრებიც არ შეცვლილა და არც მიღება-ჩაბარების მეთოდი და ლექსიკა, უკვე ვწერდით. სიახლედ თუ ჩავთვლით, ახლახან გამოჩნდა პატარა ხის ჩაქუჩიანი ხისავე დაფა, თხილის ზომის ღრმულებით ამოტვიფრული, რომელშიც თხილს აწყობენ და ტეხენ. ათი ცალი თხილიდან თუ ოთხი უვარგისი აღმოჩნდება, თხილი პატრონს უბრუნდება და არანაირ ფასში არ იბარებენ. თუ ორი ან სამი ცალია უვარგისი, შეხედულების მიხედვით, კილოგრამი ორი ან ორლარნახევარი ღირს.

"რა დავაშავე, რომ 200 კილომდე თხილი უკან მიმაქვს? მოვუარე, შევწამლე, მოვკრიფე, ჩამოვიტანე და გატეხვის შემდეგ მეუბნებიან, რომ უვარგისია. შეწამლეთო და შევწამლეთ, თუმცა, ეს შეწამვლა რომ დროულად მომხდარიყო, საშველი იქნებოდა, მგონი. მაშინ დაიწყეს შეწამვლა, როცა ვადები დამთავრებული იყო. მთავრობა იმიტომ გვყავს, რომ დროულად დაეხმაროს საცოდავ გლეხკაცს. გვაქცევს ვინმე ყურადღებას ისე, როგორც საჭიროა?" _ გვეუბნება ოზურგეთში ლანჩხუთიდან თხილის ჩასაბარებლად ჩამოსული, სოფელ ნინოშვილის მკვიდრი მაყვალა ღლონტი და გაბრაზებული, თხილით სავსე ტომრებს მანქანის საბარგულში ალაგებს, _ რამ წამომიყვანა დღეს აქ ან ეს თხილი რამ მომაკრეფინაო.

გასაყიდად წამოღებული თხილი უკან მიაქვს დაბალი ფასის გამო, ოზურგეთის მუნიციპალიტეტის სოფელ მაკვანეთის მკვიდრ შაქრო სალიას: "წამოვიღე საუკეთესო ხარისხის თხილი, მაგრამ ფასი არ აქვს. ყველაფერი მთავრობის და მავნებლის ბრალია? შეხედე, აგერ, რას ჰგავს მიღებული თხილი, თავიდან არჩევენ. ნაგავს და ნაფოტს რომ ურევ შიგ, ვინ მოგცემს კარგ ფასს? ჩემს საქმესაც რომ აფუჭებ, ვინ ხარ? თხილი რომ გაქვს, იმასთან ერთად ნამუსიც უნდა გქონდეს კაცს, თორემ სულ ასეთ დღეში ვიქნებით. შეწამვლა რომ დაგვიანდა, ეს კიდევ სხვა პრობლემაა", _ ამბობს ის.

თხილის მიმღები ნონა ქურციკიძე წუხს, რომ უხარისხო თხილის გამო, ყველა ერთნაირად ზარალდება და წლევანდელი სეზონი ყველაზე ძნელბედობის ჟამს დაემსგავსა, როცა დაბნელებულ წლებში თხილის ფასი ისე იყო დაცემული, რომ ხალხი ამჯობინებდა, სიმწრით მოწეული მოსავალი ღორისთვის ეჭმია:

"ვტეხთ ათ ცალ თხილს. თუ შვიდი ვარგისია, ერთ კილოგრამს ორლარნახევრად ვიბარებ, თუ უვარგისი და კარგი თანაბარია, ანუ 5/5-ზე, მაშინ ლარნახევრად თუ ჩავიბარებთ, მაგრამ ეს როგორ შევთავაზოთ ადამიანს? თუ თვითონ ჩააბარებს, მისი ნებაა", _ გვეუბნება ნონა ქურციკიძე და ბევრის მსგავსად, წლევანდელი ცუდი მოსავლის მთავარ მიზეზად, თხილის პლანტაციების დაგვიანებულ წამლობას მიიჩნევს: "მთავრობის მხრიდან მეტი ყურადღებაა საჭირო. არ უშველა დაგვიანებულმა მკურნალობამ თხილს. ივნისში ვინ წამლავს, როცა ადრე გაზაფხულზე უნდა დაწყებულიყო ეს ყველაფერი? დროულად გაკეთებული საქმეა შედეგიანი, თორემ დაგვიანებული მკურნალობა დიდად არ ამართლებს".

"ხელისუფლება გამოვიდეს გარეთ, მთავრობამ მიხედოს თხილის საქმეს ისე, როგორც არჩევნების დროს გამოდიან მთელი მონდომებით და ყველაფერს კადრულობენ ან ბოლომდე იხარჯებიან, რომ როგორმე ხმები მიიღონ. აი, ასე ბოლო კაკალი თხილი რომ მივიღოთ ხარისხიანი და კარგი, ამაში დაგვეხმარონ. ქალი წაიქცა, თხილის ჩაბარებაზე უარი რომ ვუთხარი. თურმე, დიაბეტით ყოფილა დაავადებული და ცუდად გახდა, სახლში პური რით წავიღოო. ავდექი და 5 ლარი მივეცი. რა მექნა? ყველამ იცის აქ ეს ამბავი, დამემოწმებიან. ძალიან კარგად იცის ხელისუფლებამ, როგორ უნდა მოიქცეს, რა სახის დახმარება სჭირდება გლეხკაცს," _ გვითხრა სასტუმრო "გურიას" ტერიტორიაზე განთავსებული ერთ-ერთი მიმღები პუნქტის მეპატრონემ, რომელმაც უარი განაცხადა ვინაობის დასახელებაზე.

"აპრილიდან რომ დაწყებულიყო თხილის შეწამვლა და საერთოდ, დროულად და წესიერად იწამლებოდეს თხილის პლანტაციები, ეს ამბავი არ იქნებოდა. დღეს უკვე ბევრი თხილის აჭრაზე საუბრობს. აგერ ნახავთ, თუ ისევე არ აჩეხავენ, როგორც ჩაი ამოძირკვეს. დღეს 2 ლარადაც რომ აღარ იბარებენ თხილს, ვის რად უნდა ასეთი კულტურა. ათეული წლების წინ თუ 50 თეთრი ან 1 ლარი ღირდა კილოგრამი თხილი, უარს მაინც არავის ეუბნებოდნენ ჩაბარებაზე. ახლა კი ხედავთ, ავსებული ტომრები უკან გავატანეთ ხალხს. რომელიც ჩავიბარეთ, სამ ტომარა თხილში რომ 75 ლარი მოუწია, იყვირა ქალმა, მუშების გასასტუმრებლად არ მყოფნისო. გააშენებს და მოკრეფს ამის შემდეგ ადამიანი თხილს? მეტი ყურადღება უნდა ხელისუფლებისგან გლეხს. თუ გინდა, თხილმა ივარგოს, ახლა რომ დამთავრდება მოსავლის აღება, მაშინვე უნდა დაიწყოს ყველანაირი შეწამვლა და გაზაფხულის ბოლომდე დამთავრდეს. აი, მაშინ იქნება შედეგი", _ გვეუბნება თხილის მიმღები გიორგი ნაკაშიძე.

ჩოხატაურელი ქეთინო ბერაძე ამბობს, რომ გადარჩეული და გარეგნულად საუკეთესო თხილი მოიტანა, თუმცა, გული უმეტესობას დაობებული აღმოაჩნდა და უკან დაუბრუნეს.

ოზურგეთის მუნიციპალიტეტის სოფელ ბაილეთის მკვიდრი გივი გოგუაძე ამბობს, რომ საკუთარი ინიციატივით შეწამლა თხილის პლანტაცია, როგორც ნაცარზე, ისე სიდამპლის წინააღმდეგ. მავნებლის საწინააღმდეგო შეწამვლისას კი სამთავრობო ღონისძიებით გათვალისწინებულ ფორმაზე უარი არ უთქვამს. ამიტომაც მიაჩნია, რომ წელს თხილის ძალზე ხარისხიანი მოსავალი აქვს. მიმღებ პუნქტშიც კილოგრამ თხილში სამი ლარი გადაუხადეს. თუმცა, ზოგადად, ხალხი ასეთ ღირებულებასაც სამართლიანად მიიჩნევს.

ანალოგიური შედეგი მიიღო დაბა ლაითურში თხილის კერძო მესაკუთრემ, სადაც ძალიან კარგი ხარისხის თხილი ოთხჯერადი შეწამვლის შემდეგ მოკრიფეს.

ჩოხატაურის მკვიდრი უჩა სიხარულიძე ამბობს, რომ სამ ტონამდე მოსავალს იწევს: "წელს დაგვიანებულმა შეწამვლამ არანაირი შედეგი არ გამოიღო და ამიტომაც არის უმეტესად ცუდი მოსავალი. მარტო მოვალეობის მოხდა არ კმარა _ მეტი ყურადღება სჭირდება გლეხკაცს", _ ამბობს ის.

"წესიერი შეწამვლა უნდა თხილს, გლეხკაცს სჭირდება დახმარება. მთავრობა საკუთარ თავს ეხმარება ყველაზე კარგად! ამდენ ხანს ეს პრობლემა მოგვარებული უნდა იყოს, მაგრამ ვის ადარდებს ხალხი? ოთხჯერ და ხუთჯერ შეწამვლა რომ უნდა, იმას ფული უნდა, ტყუილად ვინ მოგცემს? აქვს კი გლეხს ამდენი სახსრები, რომ ოთხჯერ შეწამლოს თხილის პლანტაციები?" _ ამბობს ოზურგეთელი გურამ ჯოჯუა.

ოზურგეთის მუნიციპალიტეტის გამგეობის ეკონომიკისა და სოფლის მეურნეობის სამსახურის უფროსი გიგა ხარაბაძე "გურია ნიუსთან" საუბრისას ამბობს, რომ "თხილზე მარტივად საუბარი არ შეიძლება": "ამ კულტურას აქვს, როგორც დადებითი, ისე უარყოფითი თვისებები და ამავე დროს, თხილის ქარხნებთან საკონტრაქტო ფასები წელს გაცილებით დაბალია _ 5 დოლარი, ვიდრე შარშან იყო _ 7 დოლარი. ამას აქვს თავისი გამომწვევი მიზეზები, რაზეც უახლოეს პერიოდში გესაუბრებით", _ გვითხრა მან და ბოდიში მოგვიხადა იმის გამო, რომ "ახლა საქმეზეა გასული და სამსახურში არ იმყოფება".

მცენარეთა დაცვის გურიის რეგიონულ სამსახურში, გამოცდილმა სპეციალისტმა მადონა ჩიტაიშვილმა "გურია ნიუსთან" ისაუბრა უამრავ თანმხლებ პრობლემაზე, რაც თხილის კულტუ რას უკავშირდება და უარყო აზრი იმის თაობაზე, რომ წლევანდელი ცუდი მოსავალი დაგვიანებული წამლობის ბრალია:

"წელს შეწამვლა კი არ დაგვიანებულა, მავნებელი გამოვიდა დაგვიანებით, არახელსაყრელი, ცუდი პირობების გამო. გამოსვლის შემდეგ კი, უკვე მეორე წამლობის ჩატარება შეუძლებელი იყო, რადგან 21-დღიანი ინტერვალი სჭირდება აღნიშნულ პროცესს. რაც შეეხება აზიურ ფაროსანას, რომლის საწინააღმდეგო შეწამვლაც მოხდა, მხოლოდ ეს მავნებელი არ ანადგურებს თხილს. თხილი აღარ ემორჩილება იმ მამაპაპურ ტექნოლოგიებს, რაც ადრე იყო. ექვსჯერ შეწამვლაც სჭირდება, რომ ხარისხიანი თხილი მივიღოთ. კერძო პირმა თავადაც უნდა იზრუნოს საკუთარ პლანტაციაზე. რატომღაც არავინ ამბობს ხშირად: "მე შევწამლავ, მე ვუპატრონებ"; იმას გეუბნებიან: "მოდი და შეწამლე". ჩვენ მაქსიმუმს ვაკეთებთ. გარემო პირობები, ბუნებაც შეცვლილია და თხილის აჭრაზე საუბარს, წამლობის გაუმჯობესება და მეტი გულისხმიერებით მოვლაზე საუბარი სჯობს. მთელი ციკლია თხილის მოვლისა, რომელსაც თუ სრულად არ დავიცავთ, მივიღებთ იმ შედეგს, რაც მივიღეთ.

ისმის კითხვები, რომელსაც ვერავინ უპასუხებს. მაგალითად, სანამ შეწამვლა დაიწყებოდა, ოპერატიულად ავრცელებდნენ ხმებს, რომ პირუტყვიან-ფრინველიანად ყველაფერი დაეხოცებოდათ ამ წამლით და სულ მშიერი დარჩებოდნენ. დღესაც ამბობენ, რომ თითქოს, იმ შეწამვლამ იმოქმედა უარყოფითად და მოსავალიც ამიტომაა უხარისხო. დავიჯეროთ, რომ თხილი აღარ ემორჩილება იმ მამაპაპურ ტექნოლოგიებს, რაც ადრე იყო. ამიტომ უნდა ავამოქმედოთ ჩვენი შესაძლებლობები სრულად, რომ გადავარჩინოთ ეს კულტურა და აქედან გამომდინარე, თავი გადავირჩინოთ. კარგა ხანია ვამბობთ, რომ თხილის მდგომარეობა საგანგაშო გახდებოდა და აი, შედეგიც. უკეთ უნდა მოვუაროთ, მეტი ყურადღება უნდა დავუთმოთ!" _ გვითხრა მადონა ჩიტაიშვილმა.




 ახალი ამბები
  • ფიზიკური დაპირისპირება რუსთავში სამორინესთან30 წლამდე მამაკაცმა, სამორინეს დაცვის წევრი სცემა. შემთხვევა რუსთავში,  მეგობრობის გამზირზე, ღამით მოხდა. დაშავებული  სამედიცინო დაწესებულებაში გადაიყვანეს. შინაგან საქმეთა სამინისტროს ინფორმაციით, მომხდარზე გამოძიება სსკ 118-ე მუხლით მიმდინარეობს, რაც ჯანმრთელობის განზრახ დაზიანებას გულისხმობს. პირი, რომელმაც სამორინეს დაცვის თანამშრომელი სცემა ... ...
  • თბილისში 2-მა პირმა 24 ბინა გაქურდაშინაგან საქმეთა სამინისტროს თბილისის პოლიციის დეპარტამენტის გლდანი-ნაძალადევის სამმართველოს თანამშრომლებმა, ოპერატიულ-სამძებრო და საგამოძიებო მოქმედებების შედეგად, ქურდობის ბრალდებით, თბილისში ორი პირი:1981 წელს დაბადებული ა. კ. და 1984 წელს დაბადებული ა. ტ. დააკავეს. დანაშაული 3-დან 7 წლამდე ვადით თავისუფლების აღკვეთას ითვალისწინებს. სამართალდამცველებმა ორივე ბრალდებული დიდ დიღომში იმ დროს დააკავეს, როდესაც ისინი ვეფხისტყაოსნის ქუჩაზე მდებარე ერთ-ერთ საცხოვრებელ კორპუსში გაქურდული 8 ბინიდან მოპარულ ნივთებს ავტომანქანაში ტვირთავდნენ. პოლიციამ შემთხვევის ადგილიდან ნივთმტკიცებად ამოიღო ა. კ.-ს კუთვნილი, „რენჯ როვერის“ მარკის ავტომანქანა და ნაქურდალი ნივთები. დაკავებულების პირადი ჩხრეკისას, ასევე, ამოღებულია კარის გასაღები ხელსაწყოები. გამოძიებით დადგინდა, რომ ა.კ-მ და ა.ტ.-მ, ბოლო სამი თვის განმავლობაში, თბილისის სხვადასხვა უბანში 24 ბინა გაქურდეს, მოპარული ნივთების ნაწილს კი თავიანთ საცხოვრებელ სახლებში ინახავდნენ. სამართალდამცველებმა დაკავებულების სახლებში ჩატარებული ჩხრეკის შედეგად, ნაქურდალი ნივთების ნაწილი ნივთმტკიცებად ამოიღეს, დანარჩენი ნივთების ძებნა - ამოღების მიზნით ტარდება ოპერატიულ-საგამოძიებო ღონისძიებები. ორივე დაკავებული აღიარებს ჩადენილ დანაშაულებს. წინასწარი შეთანხმებით ჯგუფის მიერ ბინაში უკანონო შეღწევით ჩადენილ ქურდობის ფაქტებზე გამოძიება საქართველოს სისხლის სამართლის კოდექსის 177-ე მუხლის მე-3 ნაწილის "ა" და "გ" ქვეპუნქტებით ... ...
  • ხანძარი თბილისში-ცეცხლი საცხოვრებელ სახლში გაჩნდათბილისში დოლიძის ქუჩაზე საცხოვრებელ სახლში ხანძარი გაჩნდა. როგორც „გურია ნიუსს“ საგანგებო სიტუაციების მართვის სამსახურში განუცხადეს, ხანძარი ამ დროისთვის ლიკვიდირებულია. შემთხვევის შედეგად არავინ ... ...
  • თეთრიწყაროს მერიის ქონების მართვის განყოფილების უფროსი ქრთამის აღების ფაქტზე დააკავესსახელმწიფო უსაფრთხოების სამსახურის ანტიკორუფციული სააგენტოს თანამშრომლებმა, ჩატარებული ოპერატიულ-სამძებრო და საგამოძიებო მოქმედებების შედეგად, ქრთამის აღების ფაქტზე, თეთრიწყაროს მუნიციპალიტეტის მერიის ქონების მართვის განყოფილების უფროსი ლაშა ქ. დააკავეს. გამოძიებამ დაადგინა, რომ ლაშა ქ-მ თანამდებობრივი მდგომარეობის გამოყენებით, თურქეთის მოქალაქეს, თეთრიწყაროს მუნიციპალიტეტის ტერიტორიაზე არსებული მიწის ნაკვეთის იჯარით გაცემის სანაცვლოდ ქრთამის სახით მოსთხოვა და გამოართვა 1000 ლარი. გამოძიება ქრთამის აღების ფაქტზე მიმდინარეობს (საქართველოს სსკ-ის 338-ე მუხლის 1-ლი ნაწილით, რაც სასჯელის სახით 6-დან 9 წლამდე თავისუფლების აღკვეთას ითვალისწინებს). გამოძიებას აწარმოებს სახელმწიფო უსაფრთხოების სამსახურის ანტიკორუფციული ... ...
  • „შეშფოთებული ვართ რუსეთის, სოხუმისა და ცხინვალის რეჟიმების გახშირებული პროვოკაციებით"ეუთოში საქართველოს მეგობართა ჯგუფი ექიმ ვაჟა გაფრინდაშვილის ოკუპანტების მიერ დაკავებას ეხმაურება და მის სასწრაფოდ გათავისუფლებას ითხოვს. განცხადებაში ასევე აღნიშნულია, რომ ისინი რუსეთის, სოხუმისა და ცხინვალის რეჟიმების გახშირებული პროვოკაციების გამო შეშფოთებულები არიან. „შეშფოთებული ვართ რუსეთის, სოხუმისა და ცხინვალის რეჟიმების გახშირებული პროვოკაციებით, მათ შორის, ოკუპაციის არეალის გაფართოების მცდელობითა და სამხრეთ ოსეთის რეგიონის ე.წ. უსაფრთხოების ძალების მიერ „საგუშაგოების“ მშენებლობით სოფელ ჩორჩანას სიახლოვეს, საქართველოს მთავრობის მიერ კონტროლირებად ტერიტორიაზე. ჩვენ ასევე შეშფოთებული ვრჩებით მავთულხლართებისა და სხვა ხელოვნური ბარიერების აღმართვით ადმინისტრაციული სასაზღვრო ზოლის გასწვრივ სოფელ ატოცსა და გუგუტიანთკარში და საქართველოს სამხრეთ ოსეთის რეგიონში ე.წ. გადასასვლელი პუნქტების გრძელვადიანი დახურვით. ამ ქმედებებმა გამოიწვია ადგილზე არსებული მდგომარეობის დესტაბილიზაცია და მძიმედ იმოქმედა კონფლიქტით დაზარალებულ ადგილებში მცხოვრები ხალხის უსაფრთხოებაზე, კეთილდღეობაზე და ჰუმანიტარულ მდგომარეობაზე. ახლახან ახალგორის რაიონში მცხოვრები მარგო მარტიაშვილის გარდაცვალება, რომელიც მოკლებული იყო შესაძლებლობას, მიეღო სწრაფი და ადეკვატური სამედიცინო მომსახურება ე.წ. გადასასვლელი პუნქტების დახურვის გამო, კიდევ ერთი ტრაგიკული ილუსტრაციაა ადგილობრივი მოსახლეობის გადაადგილების თავისუფლების მუდმივი შეზღუდვით გამოწვეული მძიმე შედეგებისა. ჩვენ ღრმად ვართ შეშფოთებული ქართველი ექიმის, ვაჟა გაფრინდაშვილის დაკავებით სამხრეთ ოსეთის რეგიონში და მოვითხოვთ მის სასწრაფოდ გათავისუფლებას“, – აღნიშნულია ... ...

არქივი

ზაფრანი

მკურნალი ყავა

საინტერესოდ გამოიყურება ჰარვარდის უნივერსიტეტის მეცნიერთა...

საშიშია თუ არა მზის სათვალე

მზის სათვალე წარმოადგენს არა მხოლოდ...

ლიმონის დიეტა

ლიმონის დიეტა გრძელდება 10-დან 14...

ახდენს თუ არა ცხელი ჩაი კიბოს პროვოცირებას

ჩინელი მედიკოსები ცხრა წლის მანძილზე...

ნივთები, რომლებიც იმაზე ჭუჭყიანია, ვიდრე წარმოგიდგენიათ

წარმოგიდგენთ ნივთებს, რომლებიც იმაზე ბინძურია,...
კარმიდამო ჩემი

"მოხრაკულა" დილით განსაკუთრებით საამოა

„მოხრაკულა“ _ ერთერთი ძველი ქართული...

საშიშია თუ არა ჯანმრთელობისთვის ლამინატის იატაკი

დღეს მოჭიმული იატაკი და ლამინატი...

როგორ ამოვიცნოთ ნატურალური თაფლი

ნამდვილი თაფლი არომატით გამოირჩევა ხელოვნურად...

უებარი საშუალება სიბერის შესაჩერებლად

მწვანილი ანელებს დაბერების პროცესს, აუმჯობესებს...

უებარი საშუალება გაციების წინააღმდეგ

ზამთრის მოახლოებასთან ერთად ვირუსებისა და...

მარილი _ უნიკალური გამაყუჩებელი საშუალება

თავის ტკივილით უამრავი ადამიანი იტანჯება....

ხურმა _ ჯადოსნური ხილი

ხურმა - ჩვენში დასავლეთ საქართველოში...

საშუალება, რომელიც კიბოს ამარცხებს

ლიკოპენს, რომელიც ბუნებრივი ძლიერი ანტიოქსიდანტია,...

უნიკალური მკურნალი მცენარე

მიუხედავად არაერთი მედიკამენტისა, საზოგადოების გარკვეული...

რას კურნავს მრავალძარღვა

მრავალძარღლვას საუკუნეების განმავლობაში იყენებდნენ, როგორ...

საპარლამენტო არჩევნების რომელ მოდელს უჭერთ მხარს