“ვერავინ შეძლებს უსინდისო ბრალდებებით, ჩემი პიროვნების დისკრედიტაციას“_ გარიგება თუ იმპიჩმენტი

მთავარი თემა

“ვერავინ შეძლებს უსინდისო ბრალდებებით, ჩემი პიროვნების დისკრედიტაციას“_ გარიგება თუ იმპიჩმენტი

2018 აპრ 17 18:59:52

ოზურგეთში პოლიტიკური პროცესები თანდათან მძაფრდება _ როგორც "გურია ნიუსი" უკვე წერდა, "ქართული ოცნების" ოზურგეთის რაიონული ორგანიზაციის თავმჯდომარეს დავით დარჩიას პარტიის თავმჯდომარის პოსტი დაატოვებინეს. მოვალეობას ამ დროისთვის, გურიის გუბერნატორი მერაბ ჭანუყვაძე ასრულებს. ჯერჯერობით, გადაწყვეტილი არ არის, გახდება თუ არა ის ოფიციალურად თავმჯდომარე.

ყრილობაზე, რომელიც 23 აპრილს ურეკში უნდა ჩატარდეს, მოხდება პარტიის თავმჯდომარის არჩევა, პოსტზე კი რამდენიმე კანდიდატურა სახელდება, მათ შორის, "ოცნების" სიის მეათე ნომერი გიორგი ჭკუასელი, რომელიც, როგორც ჩვენი წყაროს ამბობს, პარლამენტარ არჩილ თალაკვაძის კადრია. აღსანიშნავია, რომ ადგილობრივი თვითმმართველობის არჩევნებზე ჭკუასელი საკრებულოში ვერ მოხვდა.

რატომ გადააყენეს დარჩია? ამ კითხვაზე ჩვენთან საუბრისას რამდენიმე დეპუტატი "ოცნებიდან" ხაზს უსვამს ერთ გარემოებას _ ახალარჩეულ მერს მასთან ურთიერთობა დალაგებული ჰქონდა, რაც არ მოსწონდათ პარტიაში და მიიღეს გადაწყვეტილება მისი თავმჯდომარეობიდან გადაყენების თაობაზე. აღნიშნულ ინფორმაციას, "გურია ნიუსთან" არ ადასტურებენ არც პარტიაში და არც თავად დარჩია, ისინი გვპასუხობენ მხოლოდ ერთს _ უბრალოდ, ახალი სახეა საჭირო კარს მომდგარი კიდევ ერთი არჩევნების წინ.

როგორც უკვე არა ერთმა წყარომ კონფიდენციალურად გვაცნობა, მათ შორის, საკრებულოს დეპუტატებმაც, მმართველ გუნდს საკრებულოს უმრავლესი დეპუტატების ხელით სურთ ახალარჩეულ მერს _ კონსტანტინე შარაშენიძეს იმპიჩმენტი მოუწყონ. ასევე, შესაძლოა, საკრებულოს თავმჯდომარის პოსტიდან გადააყენონ დავით დარჩიაც.

დეპუტატები საუბრობენ იმაზეც, რომ იმპიჩმენტის საფუძველი, შესაძლოა, გახდეს არა ერთი სასამართლო პროცესი _ მერს რამდენიმე ყოფილი თანამდებობის პირი მობილობის არასწორად გახორციელებას და კანონის დარღვევას ედავება. მმართველ გუნდს მერის იმპიჩმენტისთვის საკრებულოში 31 ხმა და ამომრჩევლის 20 პროცენტი სჭირდება. საამისოდ 31 დეპუტატი "ოცნებას" ჰყავს. როგორც ჩვენთან რამდენიმე დეპუტატი კონფიდენციალურად ამბობს, დეპუტატების ნაწილი, როგორც შარაშენიძეს ჰპირდებიან გვერდზე დგომას, პარტიის ხელმძღვანელობასაც პირობას უდებენ, რომ, საჭიროების შემთხვევაში, მათ დავალებას შეასრულებენ:

"აქედან გამომდინარე, მათ ვერ დაეყრდნობი", _ამბობს წყარო. მისივე თქმით, "საკრებულოს გარეთ კი, სოფლებში ყოფილი წარმომადგენლები და "ოცნების" შტაბის ხელმძღვანელები, მერის წარმომადგენლის პოსტზე დასანიშ პირებს ემუქრებიან, რომ მაისის შემდეგ მაინც სხვა პროცესები წავა და მათი თანამდებობა მხოლოდ ერთთვიანი იქნება. ისინი ამ პროცესებში იმპიჩმენტს გულისხმობენ", _ ამბობს კონფიდენციალური წყარო.

კონსტანტინე შარაშენიძე აღნიშნული თემის დალაგებას საკრებულოს დეპუტატებთან ცდილობს. ჩვენი წყაროს ინფორმაციით, სოფლების უმრავლესობას ის წარმომადგენლები უხელმძღვანელებენ, რომლებიც მუშაობდნენ წინა ხელისუფლების პერიოდში და აქტიურად იყვნენ ჩართულები არჩევნებში მმართველი პარტიის სასარგებლოდ. მათ კონკურსი გაირეს, რომელიც ორი დღის წინ დამთავრდა.

_ თითქმის ყველა სოფელში ტოვებს შარაშენიძე ძველ გამგებლებს. მაგალითად, ნაგომარი, ძიმითი, ნარუჯა, სილაური, ნასაკირალი, სოფელი ოზურგეთი, შემოქმედი, ბაილეთი... რა გამოდის _ კონკურსი რატომ ჩატარდა? როგორც ჩვენ ვიცით, შარაშენიძეს დეპუტატები გარიგებას სთხოვენ, დატოვოს სოფლებში მათი კანდიდატები წარმომადგენლებად, თუ უნდა, რომ იმპიჩმენტის დროს ისინი მერს გვერდზე დაუდგნენ. თუმცა, მაინც არ გაახარებენ _ გამორიცხულია, არ შეარჩენენ, _ ამბობს ჩვენთან საუბრისას ერთ-ერთი დეპუტატი.

ოზურგეთის ჩინოვნიკები, ასევე, საზოგადოებაში უკვე ღიად საუბრობენ მერსა და გუბერნატორს შორის დაძაბულ ურთიერთობებზეც.

ჩვენი წყაროს ინფორმაციით, გუბერნატორმა მერაბ ჭანუყვაძემ ოზურგეთის მუნიციპალიტეტში მომხდარი სტიქიის მონაცემებს, რომელიც ინფრასტრუქტურის სამინისტროში უნდა გადაგზავნილიყო გუბერნიის მიერ, ხელი ორი კვირის განმავლობაში არ მოაწერა.

აღნიშნული ინფორმაცია მერის მოადგილემ ოსიკო თოთიბაძემ დაგვიდასტურა.

ჩვენ შევეცადეთ ეს ინფორმაციები პირველ პირებთან გადაგვემოწმებინა.

ფლობს თუ არა შესაძლო იმპიჩმენტთან დაკავშირებით ინფორმაციას ოზურგეთის მერი კონსტანტინე შარაშენიძე, აქვს თუ არა დაპირისპირება გუბერნატორთან მერაბ ჭანუყვაძესთან, არის თუ არა გარიგებული დეპუტატებთან, სოფლებში მისი კანდიდატურების წარმომადგენლებად დატოვების შესახებ? _ ამ და სხვა კითხვებით შარაშენიძეს მივმართეთ, რომელმაც პრესსამსახურისკენ გადაგვამისამართა. პრესსამსახურში, საიდანაც პასუხს თითქმის მთელი დღის განმავლობაში ველოდეთ, გვითხრეს, რომ მერს ვერ უკავშირდებიან და ამიტომ კომენტარს ვერ გააკეთებენ.

ენმ-ს ოზურგეთის ლიდერი ბესიკ ქათამაძე "გურია ნიუსთან" ამბობს, რომ ამომრჩევლის ნებას პარტიამ პატივი უნდა სცეს:

_ ხალხის ნება იყო, რაც მოხდა. "ოცნება" კი ამ ხალხის საწინააღმდეგოდ მოქმედებს, რასაც ვხედავთ ასეა _ ამის ფაქტი არა ერთია. იმპიჩმენტის თემაც არ არის ასე მარტივი. თუმცა, საკრებულოში "ოცნებას" ჰყავს იმპიჩმენტისთვის საჭიროს რაოდენობის მხარდამჭერები.

დეპუტატი ლევან მგელაძე ამბობს, რომ, ჯერჯერობით, ოფიციალურად არაფერი თქმულა ამასთან დაკავშირებით:

_ არ უნდა დადგეს ეს საკითხი. თუ დადგება, მოვითხოვ განმარტებას, რა დანაშაულისთვის დგება იმპიჩმენტი.

ფრაქცია "ოცნების" თავმჯდომარის მოადგილე მარი ჩხიკვიშვილი "გურია ნიუსთან" ამბობს, რომ თუ იმპიჩმენტის საკითხი დღის წესრიგში დადგა, პარტია მხარს დაუჭერს მოსახლეობის ინტერესებს და საკრებულო კანონის შესაბამისად იმოქმედებს:

_ არ ვადასტურებ იმპიჩმენტის საკითხთან დაკავშირებულ ინფორმაციას. მსგავსი განხილვა ჩვენს გუნდში არ ყოფილა. ჯობს, რომ აღმასრულებელი ორგანო, მერია იყოს საქმეზე, ხალხსა და პროექტებზე ორიენტირებული. რაც შეეხება არასწორად გახორციელებულ მობილობას, იყო თუ არა დარღვევები, ამას შესაბამისი სამსახურები იძიებენ, სასამართლო პროცესებია ჩანიშნული და დასკვნებს სასამართლოს დასრულების შემდეგ გავაკეთებთ. რაც შეეხება ჩვენი გუნდიდან სხვა დეპუტატების მიერ მოწოდებულ ინფორმაციას, ამას არ დავადასტურებ, _ამბობს ჩხიკვიშვილი.

ჩვენს კითხვაზე, თუ რატომ გადააყენეს დავით დარჩია პარტიის თავმჯდომარეობის პოსტიდან, ჩხიკვიშვილი გვპასუხობს, რომ ეს მოხდა უბრალოდ სიახლეებისთვის:

_ ვფიქრობ, რომ სიახლეებისთვის, ახალი ძალის შემოსვლისთვის. ეს ჩვეულებრივი მუშა პროცესია. სხვა მუნიციპალიტეტშიც მოხდა მსგავსი რამ. არც საკრებულოს თავმჯდომარის გადაყენებაზეა საუბარი ) ამის მიზეზი არ ჩანს.

წყაროს თქმით, საკრებულოს წევრებს "მმართველი გუნდიდან" სხდომებზე პარლამენტარებისგან მესიჯები მოსდით, თუ რა უნდა თქვან სხდომის მიმდინარეობისას. აღნიშნულ ინფორმაციას ჩხიკვიშვილი არ ადასტურებს:

_არანაირი მესიჯი არ მოგვდის. არ ვასრულებთ მითითებებს, არ ვართ არავის მიერ მართული.

ჩხიკვიშვილის მსგავსად საუბრობს ფრაქცია "ოცნების" თავმჯდომარე გელა აროშიძე:

_ პირველად მესმის. მე ასე ვფიქრობ, რომ არ დადგება დღის წესრიგში აღნიშნული საკითხი, ახალარჩეული მერი აკეთებს ისეთ რამეებს, რაც ჩვენთვის მისაღებია.

ის ამბობს, რომ იმპიჩმენტს მხარს არ დაუჭერს. რაც შეეხება დარჩიას გადაყენებას, აროშიძე ამ გადაწყვეტილებას დარჩიას ნებას უკავშირებს:

_ დარჩია პარტიის თავმჯდომარეობიდან თავისი ინიციატივით გადადგა. ახალის სახე იყო საჭირო.

დავით დარჩია: _ არ დაიჯეროთ ეგ ამბავი, არ მოხდება, არანაირად, შვილებს ვფიცავ. არც ჩემი გადაყენების შესახებ ინფორმაციაა სიმართლე.

კითხვებზე, არის თუ არა იმპიჩმენტის საკითხის დაყენების პროცესებში ჩართული გურიის გუბერნატორი, რას ფიქრობს 23 აპრილის ყრილობაზე, სადაც, შესაძლოა, არ გახდეს პარტიის თავმჯდომარე, არის თუ არა მას და მერს შორის დაძაბულობა, რატომ მოაწერა თუ არა დაგვიანებით ხელი სტიქიის მონაცემებს, მერაბ ჭანუყვაძე გვპასუხობს, რომ მას ოზურგეთის მოსახლეობა ძალიან კარგად იცნობს:

_ მე არ ვიცი და ნაკლებად მაინტერესებს, ვინ რას ამბობს. მე ვიცი, რასაც ვაკეთებ! ვინც თქვენ გეუბნებათ, რომ თითქოს რაიმე დოკუმენტს ხელი დროულად არ მოვაწერე, მობრძანდეს და გაერკვეს კარგად _ ეს არის ტყუილი! რაც შეეხება დაპირისპირებას, მე არავის ვუპირისპირდები და თუ ვინმეს მსგავსი განცდა აქვს, ესეც მისი პრობლემაა. რაც შეეხება პარტიის თავმჯდომარეობას, გეთანხმებით, დიდი პასუხისმგებლობაა და ეს გაირკვევა 23 აპრილს. მე, პირადად, ყოველთვის განსაკუთრებულ პატივს ვცემ მოსახლეობის აზრს, ვიდექი და ვიდგები მათ გვერდით! გარწმუნებთ, ვერასდროს ვერავინ შეძლებს, უსინდისო, გამოგონილი ბრალდებებით ჩემი პიროვნების დისკრედიტაციას, რადგან ძალიან კარგად მიცნობს ოზურგეთის მოსახლეობა. ასე რომ, წინ ბევრი გამარჯვება გველის! _ ამბობს ჭანუყვაძე.




 ახალი ამბები
  • გიორგი მიქაუტაძე უვადო მოსამართლედ განამწესეს იუსტიციის საბჭოს მდივანი გიორგი მიქაუტაძე თბილისის საქალაქო სასამართლოს ადმინისტრაციულ საქმეთა პალატაში მოსამართლედ უვადოდ გაამწესეს. მიქაუტაძის კანდიდატურას საბჭოს 11-მა წევრმა ერთხმად დაუჭირა მხარი. მიქაუტაძესთან ერთად საქალაქოს ადმინისტრაციულ კოლეგიაში ნიკოლოზ მარსაგიშვილი გაამწესეს. საქალაქო სასამართლოს ადმინისტრაციულ საქმეთა პალატაში 2 ვაკანსიაზე 28 კანდიდატი ... ...
  • WHO : მნიშვნელოვანია ყურადღების გამახვილება ურბანულ განვითარებაზეჯანდაცვის მსოფლიო  ორგანიზაციის ინფორმაციით, მსოფლიო მოსახლეობის ნახევარი ქალაქებში ცხოვრობს, 2050 წლისთვის კი, მოსახლეობის რაოდენობის ზრდის შედეგად, ქალაქებში კიდევ 2.5 მილიარდი ადამიანი იცხოვრებს. აღნიშნული ტენდენცია კი  ნიშნავს, რომ მნიშვნელოვანია ყურადღების გამახვილება ურბანულ განვითარებაზე, რომ ხელი შეეწყოს ჯანსაღ ცხოვრებას ქალაქში. როგორც ჯანდაცვის მსოფლიო ორგანიზაციაში ამბობენ, ხალხი ქალაქში საცხოვრებლად ცხოვრების გასაუმჯობესებლად გადადის. თუმცა, ურბანული ცხოვრება  საზოგადოების ჯანმრთელობის სფეროში ბევრ გამოწვევას ქმნის. მაგალითად, არის  ქალაქები, რომლებსაც არ აქვთ სუფთა წყლის, სანიტარიისა და ნარჩენების მართვისთვის ეფექტური სისტემები, სადაც შეგხვდებათ ისეთი დაავადებები, როგორიცაა ქოლერა და დიარეა. ქალაქები ასევე დგანან დაბინძურებული ჰაერის, არაჯანსაღი კვების და არასაკმარისი ფიზიკური აქტივობის წინაშე. გარდა ამისა, საგზაო უსაფრთხოება და ძალადობა არის მუდმივი შეშფოთების საკითხი, ისევე როგორც ფსიქიკური ჯანმრთელობა. ჯანმრთელობაზე გავლენას ახდენს მრავალი ფაქტორი, რომელიც ცდება ჯანდაცვის მომსახურების ხელმისაწვდომობას. ეს მოიცავს ინფრასტრუქტურულ საკითხებს, ასევე დასაქმების, განათლებისა და საკვებ პროდუქტზე ხელმისაწვდომობას. ჯანდაცვის მსოფლიო ორგანიზაციის განცხადებით,  უნდა შეიქმნას ქალაქები, რომლებიც მათი დიზაინით, პოლიტიკით და პროგრამებით ჯანმრთელობას ხელს შეუწყობენ.       ... ...
  • ევაკუაცია ყავლაშვილის ქუჩაზე_ ჩამონგრეულია სახლის ნაწილითბილისში, შოთა ყავლაშვილის ქუჩაზე 2-სართულიანი საცხოვრებელი სახლის ნაწილი ჩამოინგრა. როგორც საგანგებო სიტუაციების მართვის სამსახურში აცხადებენ, შემთხვევის შედეგად არავინ დაშავებულა. ადგილზე მისვლისთანავე მეხანძრე-მაშველებმა უსაფრთხოების მიზნით, ამავე შენობასა და მის მიმდებარედ მცხოვრები მოსახლეობის ევაკუაცია განახორციელეს. ადგილზე მიღებულია უსაფრთხოების ზომები.       ... ...
  • ჭიათურაში არსებული სიტუაცია არის მძიმე და მე ვიზიარებ ჩვენი მაღაროელების მოთხოვნას _ ბახტაძეჭიათურაში არსებული სიტუაცია არის მძიმე და მე ვიზიარებ ჩვენი მაღაროელების სამართლიან და ობიექტურ მოთხოვნას ისეთ საკითხებში, როგორიც არის შრომის უფლებები, უსაფრთხოება, სამედიცინო მომსახურება ადგილზე, კვება, - განაცხადა საქართველოს პრემიერ-მინისტრმა.პრემიერ-მინისტრმა მოუწოდა ორივე მხარეს, მისაღებ შედეგებზე დროულად ჩამოყალიბდნენ.„მე ვიცი, რომ ამავე დროს, კომპანიამ მიიღო გადაწყვეტილება, მათ გააკეთეს შეთავაზება და მინდა ორივე მხარეს ვთხოვო, რომ რაც შეიძლება მეტი ინტენსიური დიალოგის შედეგად დროულად ჩამოვყალიბდეთ მისაღებ შედეგებზე. ეს არის სისტემური მნიშვნელობის მქონე საწარმო ჩვენი ეროვნული ეკონომიკისთვის და მისი სრულფასოვანი ფუნქციონირება არის ძალიან მნიშვნელოვანი“, _ განაცხადა მამუკა ... ...
  • როგორი ამინდია მოსალოდნელი უახლოეს დღეებშიგარემოს ეროვნული სააგენტოს ინფორმაციით, 24-27 მაისს საქართველოში მოსალოდნელია დროგამოშვებით წვიმიანი ამინდი, ზოგან შესაძლებელია სეტყვა, 25-27 მაისს იქროლებს ძლიერი ქარი. 24-25 მაისს ჰაერის ტემპერატურა დაბლობსა და ბარში +26, +31, ხოლო 26-27 მაისს +22, +27 გრადუსია მოსალოდნელი. თბილისში, ძირითადად, ღამისა და საღამოს საათებში მოსალოდნელია ხანმოკლე წვიმა ელჭექით. ჰაერის ტემპერატურა +27, +29 გრადუსი იქნება.     ... ...

არქივი

ზაფრანი

მიირთვით ბევრი ვაშლი, კივი და ფორთოხალი

მწვანე ჩაი არა მხოლოდ აუმჯობესებს...

ბრიტანელმა სწავლულებმა სინათლის სხივების შენელება ისწავლეს

ბრიტანელმა სწავლულებმა კიდევ ერთი ნაბიჯით...

შაოლინის მონასტრის დიეტა

დიეტით მხოლოდ ლამაზი ქალბატონები როდის...

როგორ ვებრძოლოთ სლოკინს

სლოკინთან დაკავშირებით შესაძლოა ბავშვობა და...

როგორ მოვიშოროთ კბილის ტკივილი

ყველაზე მარტივი რეცეპტები: მოამზადეთ "სალბის"...

გინდათ, არასდროს გასუქდეთ?

ზოგიერთი ჩვენგანი თვით ბუნებამ დაასაჩუქრა,...
კარმიდამო ჩემი

პიტნის სამკურნალო თვისებები

ამ საოცრად სურნელოვანი და არომატული...

"ჩემი პატარა ვენეცია" მაქვს" _ რას საქმიანობს 80 წლის პურის...

ამირან პეშკოვი ოზურგეთის მუნიციპალიტეტის სოფელ...

როგორ ვკვებოთ ქათამი, რომ საუკეთესო კვერცხი მოგვცეს

სოფლის პირობებში, როცა შინაურ ფრინველს...

"საქართველოში მოყვანილი მანდარინის ჩირი მსოფლიოში საუკეთესოა"

ოზურგეთში, სოფელ გურიანთაში მცხოვრები იუზა...

დედამიწაზე სიცოცხლის წარმოშობის საიდუმლო

ბრიტანელმა სწავლულებმა, შესაძლოა, გახსნან მეცნიერების...

ეკონომიური დიეტა

ამბობენ, სწორად შერჩეული რაციონი ძვირი...

რა რაოდენობის მარილი გვჭირდება დღეში

მარილი აუცილებელია, რომ ორგანიზმმა სწორად...

წიწიბურა წნევას არეგულირებს

წიწიბურა ადამიანისთვის ძალიან სასარგებლო და...