"საარჩევნო ადმინისტრაცია აპრობირებული და სამართლიანად აღიარებული მეთოდით კომპლექტდება"

პოლიტიკა

"საარჩევნო ადმინისტრაცია აპრობირებული და სამართლიანად აღიარებული მეთოდით კომპლექტდება"

26 ივლ. 2017, 22:01:01

„არგუმენტების არარსებობა და პოლიტიკური მიკერძოების პირდაპირი ნიშნები მიგვითითებს ჩვენ იმაზე, რომ ამ შემთხვევაშიც, აბსოლუტურად სუფთა სინდისით შეგვიძლია მხარი დავუჭიროთ ჩვენ პირვანდელ კანონპროექტს და დავძლიოთ საქართველოს პრეზიდენტის ვეტო",_ ასე შეაფასა ირაკლი კობახიძემ, საპარლამენტო უმრავლესობის სახელით, საქართველოს საარჩევნო კოდექსში ცვლილებებთან დაკავშირებით პრეზიდენტის მოტივირებული შენიშვნები.
საქართველოს პარლამენტის თავმჯდომარემ განაცხადა, რომ კანონპროექტის თანახმად, საარჩევნო ადმინისტრაცია ყველაზე აპრობირებული და ყველაზე სამართლიანად აღიარებული მეთოდით კომპლექტდება.
„ეს ყველაზე სამართლიანი პრინციპი არის აღებული განსხვავებით იმ მახინჯი მოდელისგან, რომელიც დღეს მოქმედებს საქართველოს საარჩევნო კოდექსის შესაბამისად. აქ იყო დასმული კითხვა რატომ არ არის გათვალისწინებული ადგილობრივი თვითმმართველობის არჩევნების შედეგები საარჩევნო ადმინისტრაციის ფორმირებისას. ვთხოვ ოპონენტებს, დაასახელონ ერთი განვითარებული ქვეყანა, სადაც ხდება თვითმმართველობის არჩევნების შედეგების გათვალისწინება რაიმე პრივილეგიების განაწილებისას. ასეთი ქვეყნები არ არსებობს ერთი მარტივი მიზეზის გამო-რეალურად, კრიტერიუმი ყოველთვის არის საპარლამენტო არჩევნები. ეს არის საერთო ეროვნული პოლიტიკური არჩევნები. რაც შეეხება ადგილობრივი თვითმმართველობის არჩევნებს, მას აქვს სრულიად სხვა დატვირთვა. ვისაც სხვა მოსაზრება აქვს, შეუძლია, გაეცნოს შესაბამის სახელმძღვანელოებს. საუბარია პირველი კურსის სახელმძღვანელოებზე. არსად, განვითარებულ ქვეყნებში არ გამოიყენება კრიტერიუმად ადგილობრივი თვითმმართველობის არჩევნები. შესაბამისად, ეს კრიტიკა არის აბსოლუტურად დაუსაბუთებელი და მოკლებულია ყოველგვარ არგუმენტებს",- განაცხადა ირაკლი კობახიძემ.
მისი თქმით, პროპორციული გადანაწილების შესაბამისად, მიღებულ იქნა პარტიულ-პოლიტიკური პარიტეტი, რაც იმას ნიშნავს, რომ „პოზიცია", ისევე, როგორც ოპოზიცია, ცესკოში და საარჩევნო ადმინისტრაციაში სამი წევრით არის წარმოდგენილი. კიდევ ერთი მიღწევა, პარლამენტის თავმჯდომარის თქმით, ისაა, რომ მანიპულაციების ყოველგვარი რისკი ისპობა.
„დაცულია პარიტეტის პრინციპი, რაც არის მეორე ფუნდამენტური სამართლიანი პრინციპი. ასევე უზრუნველყოფილია მრავალპარტიული წარმომადგენლობა, კერძოდ, ოთხი სხვადასხვა პარტიების წარმომადგენლები იქნებიან წარმოდგენილნი საარჩევნო ადმინისტრაციაში ახალი რეგულაციის თანახმად და საუბარია დღევანდელ მოცემულობაზე. ბუნებრივია, შემდეგი არჩევნების შემდეგ მივიღებთ ასევე მრავალპარტიულ, შეიძლება, ცოტა განსხვავებულ კონფიგურაციას.
ახალი რეგულაციების ერთერთი მნიშვნელოვანი მიღწევა მდგომარეობს იმაში, რომ ისპობა მანიპულაციების ყოველგვარი რისკი. ჩვენ ვხედავთ ამ მანიპულაციებს დღეს, წლების განმავლობაში, როდესაც ვსაუბრობდით ბლოკების გაუქმებაზე, ერთ-ერთი კონტრარგუმენტი რაც ჰქონდათ ოპონენტებს, მდგომარეობდა იმაში, რომ დატოვეთ ბლოკები, ოღონდ მოაწესრიგეთ შესაბამისი კანონმდებლობა და არ მისცეთ არავის მანიპულაციების შესაძლებლობა. ახლა, როცა მანიპულაციების შესაძლებლობას ვსპობთ, ამასთან დაკავშირებით ისმის აბსოლუტურად დაუსაბუთებელი და გაუგებარი კრიტიკა. დღეს აქვთ მანიპულაციის შესაძლებლობა კონკრეტულ პოლიტიკურ პარტიებს და ამ მანიპულაციების შედეგად, როგორც აქ ითქვა არაერთგზის, „ნაციონალურ მოძრაობას" თავისი ორი განშტოებით აქვს მთლიანობაში სამი ადგილი მოპოვებული ცენტრალურ საარჩევნო კომისიაში და ზოგადად, საარჩევნო ადმინისტრაციაში. მაგალითიც მოიყვანა ქალბატონმა ეკამ, არავინ არ იცის რა არის ქრისტიანულ-კონსერვატული პარტია. ასეთი პარტია რეალურად არ არსებობს, თუმცა წარმოიდგინეთ, რომ მას აქვს ადგილი მიკუთვნებული ცენტრალურ საარჩევნო კომისიაში და ყველა დონეზე არის წარმოდგენილი საარჩევნო ადმინისტრაციაში. ბუნებრივია, ასეთი მანიპულაციების შანსი უნდა მოისპოს და ეს არის პრინციპულად მნიშვნელოვანი. ეს არის მესამე პრინციპი, რომელიც იყო გათვალისწინებული ამ ცვლილებების განხორციელების დროს",- განაცხადა ირაკლი კობახიძემ.
პარლამენტის თავმჯდომარემ ისაუბრა პოლიტიკურ კონფიგურაციაზეც. მისი თქმით, რომ არა ცენტრალურ საარჩევნო კომისიასა და საარჩევნო ადმინისტრაციაში ადგილების განაწილების წესის ცვლილება, პოლიტიკური პარტიები ადგილს დაკარგავდნენ.
„ჩვენ დღეს გვესმის კრიტიკა „პატრიოტთა ალიანსის" მხრიდან. კიდევ ერთხელ, ხაზგასმით მინდა გავიმეორო, რომ უსამართლოდ დაკარგავდნენ ადგილს ცენტრალურ საარჩევნო კომისიაში ჩვენ რომ არ შეგვეცვალა სამართლიანად ცესკოში ადგილების და საარჩევნო ადმინისტრაციაში ადგილების განაწილების წესი. ასევე, ძალიან მაღალი ალბათობით, „ევროპული საქართველოც" დაკარგავდა ადგილს ცენტრალურ საარჩევნო კომისიაში, შესაბამისი მაქინაციები რომ გაგრძელებულიყო.
ეს არის პოლიტიკური მოცემულობა. დღეს არის სამი ორზე, „ნაციონალური მოძრაობა"-„ქართული ოცნება" და ეს იცვლება ორი სამით, ანუ „ქართულ ოცნებას" ექნება სამი ადგილი საარჩევნო ადმინისტრაციაში, „ნაციონალურ მოძრაობას" ექნება ორი ადგილი. რაც, ყველა დაგვეთანხმება ბუნებრივია, არის ბევრად უფრო სამართლიანი, იმ მარტივი მიზეზის გამო, რომ ბოლო არჩევნებში „ქართულმა ოცნებამ" მიიღო ხმების 49 %, ხოლო „ნაციონალურმა მოძრაობამ" - ხმების 27%",_ განმარტა ირაკლი კობახიძემ და აღნიშნა, რომ ეს შეიძლება არ მოსწოდეთ პოლიტიკურად მიკერძოებულ პირებს.
ეს არის მეორე საქართველო, სადაც არიან თავმოყრილნი პოლიტიკური სპექტრის მეორე მხარე, ეს არის საქართველოს პრეზიდენტი, ე.წ. ნეიტრალური ფიგურა, „ნაციონალური მოძრაობა" თავისი ორივე განშტოებით, „პატრიოტთა ალიანსი", „დემოკრატიული მოძრაობა" და ა.შ. ეს არის მეორე საქართველო, რომელსაც აქვს თავისი ჭეშმარიტება, ჩვენ გვაქვს ჩვენი ჭეშმარიტება, რომელიც არის დადასტურებული საქართველოს მოსახლეობის ძალიან მყარი მხარდაჭერით. აქ კიდევ ერთხელ ითქვა, არ ვიცი, ეს რას უნდა მივაწეროთ, საუბარი იყო „ქართულ ოცნებასა" და ხალხზე - „ქართულ ოცნებას" და ხალხს აქვს თავისი ურთიერთმიმართება და ეს ურთიერთმიმართება გულისხმობს იმას, რომ ყოველ შემდგომ არჩევნებში ჩვენ ვიპოვებთ ძალიან დამაჯერებელ გამარჯვებას. ეს არის ურთიერთობა „ქართულ ოცნებასა" და ქართველ ხალხს შორის. და ეს განმეორდება ამ თვითმმართველობის არჩევნებშიც, სადაც ჩვენ გვაქვს ძალიან მაღალი რეიტინგი. არცერთ ოპოზიციურ პოლიტიკურ პარტიას დღეს არ აქვს რეალურად მერის არჩევნების მოგების რესურსი და ამ პირობებში გვესაუბრებიან ჩვენ იმაზე, რომ თითქოს რაიმე პრობლემა არსებობს „ქართულ ოცნებას" და ქართველ ხალხს შორის. ჩვენი პოზიცია მდგომარეობს იმაში, რომ აბსოლუტურად მყარი პოლიტიკური მდგომარეობა გვაქვს განსხვავებით იმ პოლიტიკური ძალებისგან, რომლებიც არიან სრულ სასოწარკვეთილებაში იმის გამო, რომ ვერ ახერხებენ ხალხის ნდობისა და ხალხის მხარდაჭერის მოპოვებას",- აღნიშნა პარლამენტის თავმჯდომარემ.
ირაკლი კობახიძის შეფასებით, ცენტრალური საარჩევნო კომისიის პოლიტიზირების საკითხთან დაკავშირებით, დღეს პლენარულ სხდომათა დარბაზში საშიში განცხადება გაისმა.
„რაც შეეხება ცესკოს პოლიტიზების საკითხს -ეს ძალიან საშიშად გაისმა დარბაზში. ჩვენ ვიცით საზოგადოების განწყობიდან, რომ ცესკო დღეს აღიქმება, როგორც დამოუკიდებელი ორგანო და ეს არის „ქართული ოცნების" ხელისუფლების დამსახურება. ამ პირობებში ჩვენ გვაქვს ძალიან საშიში ჩანაწერი მოცემული პრეზიდენტის ვეტოს დასკვნაში, სადაც საუბარია იმაზე, რომ ცესკოს კიდევ უფრო მეტად პოლიტიზებას გამოიწვევს ეს ცვლილებები. ეს არ შეესაბამება რეალობას, რაც ყველამ ძალიან კარგად ვიცით.რაც შეეხება იმას, რომ შეიძლება „ქართულმა ოცნებამ" დომინირებული მდგომარეობა მოიპოვოს საარჩევნო ადმინისტრაციაში - საზოგადოებას რომ განვუმარტო, ცესკოში, ისევე, როგორც ქვედა დონეზე, წარმოდგენილია სულ 12 წევრი. აქედან სამ წევრს ნიშნავს „ქართული ოცნება" ახალი რეგულაციების თანახმად. მაშინ, როდესაც გადაწყვეტილების მისაღებად არის საჭირო 7 ხმა, ხოლო ნორმატიული აქტების მისაღებად არის საჭირო 9 ხმა. რომელ დომინირებაზე არის საუბარი?",- განაცხადა პარლამენტის თავმჯდომარემ და აღნიშნა, რომ ოპონენტების მხრიდან არგუმენტებში აღრევა გაუგებარია.
მისივე თქმით, მმართველი გუნდის ინტერესები ოპოზიციის ინტერესების უკეთ რეალიზების ხარჯზე - მცირდება. ირაკლი კობახიძემ აღნიშნა, რომ პროპორციული გადანაწილების შესაბამისად, „ქართულ ოცნებას" ცესკოში მინიმუმ 4 ადგილი უნდა ჰქონოდა და მაქსიმალურად სამართლიანი გადანაწილების ჩამოყალიბების მიზნით, მმართველმა გუნდმა მეოთხე ადგილი მოიკლო.
„პრეზიდენტის ვეტოს არგუმენტაციაში ნათქვამია, რომ უნდა დარჩეს უცვლელი ის სიმახინჯე, რომელიც დღეს არის ჩამოყალიბებული. ეს ერთადერთი, შეიძლება აინტერესებდეს მას, ვისაც აქვს პოლიტიკური მიკერძოება და პოლიტიკური დაინტერესება, რომ მეორე საქართველო დომინირებდეს ცესკოში. ჩვენი ამოცანა არ არის არც ერთი და არც მეორე საქართველოს დომინირება, არც „ქართული ოცნების" დომინირება და არც მარგველაშვილი, ევროპული საქართველო, ნაციონალური მოძრაობის, პატრიოტთა ალიანსი, დემოკრატიული მოძრაობის და ა.შ. დომინირება. ჩვენი ამოცანა არის ის, რომ სამართლიანად იყოს ჩამოყალიბებული და ფორმირებული როგორც ცენტრალური საარჩევნო კომისია, ასევე, მთლიანად, საარჩევნო ადმინისტრაცია",- განაცხადა პარლამენტის თავმჯდომარემ.
ირაკლი კობახიძემ ისაუბრა პრეზიდენტის მიერ მერის რიგგარეშე არჩევნების დანიშვნა შესახებაც და აღნიშნა, რომ ეს ტექნიკური საკითხია.
„დღესაც არის ასეთი სახით რიგგარეშე არჩევნების დანიშვნის საკითხი მოწესრიგებული საარჩევნო კოდექსში კონკრეტულ არჩევნებთან დაკავშირებით. გამომდინარე იქიდან, რომ ცვლილება არის აბსოლუტურად ტექნიკური ბუნების და ჩაითვალა უბრალოდ, რომ ცესკო უმჯობესია იყოს ამ შემთხვევაში დამნიშნავი სუბიექტი, მხოლოდ ამის გამო იქნა ეს გადაწყვეტილება მიღებული. არანაირი პოლიტიკური დატვირთვა არ აქვს იმას, თუ ვინ დანიშნავს რიგგარეშე არჩევნებს, იქნება ეს ცესკო თუ იქნება ეს საქართველოს პრეზიდენტი. ორივე შემთხვევაში, ეს არის წმინდა ფორმალური უფლებამოსილება",- განმარტა პარლამენტის თავმჯდომარემ.
საქართველოს საარჩევნო კოდექსში ცვლილებებთან დაკავშირებით პრეზიდენტის მოტივირებული შენიშვნებზე საუბრისას, ირაკლი კობახიძემ განაცხადა, რომ ორი პრობლემა გამოიკვეთა - არგუმენტების აბსოლუტური დეფიციტი და პოლიტიკური მიკერძოება,რაც მისივე თქმით, სამწუხაროა იმ პირობებში, როდესაც საქმე საქართველოს პრეზიდენტს ეხება, რომელიც კონსტიტუციის თანახმად, ამ მმართველობის სისტემაში ნეიტრალური სუბიექტი უნდა იყოს.




 ახალი ამბები
  • რაგბის კავშირის ვიცე-პრეზიდენტს აღკვეთის ღონისძიების სახით პატიმრობა შეეფარდარაგბის კავშირის ვიცე-პრეზიდენტ მერაბ ბესელიას აღკვეთის ღონისძიების სახით პატიმრობა შეეფარდა. მორაგბე რამაზ ხარაზიშვილის დაჭრაში ბრალდებულ რაგბის კავშირის ვიცე-პრეზიდენტ მერაბ ბესელიას მიმართ აღკვეთის ღონისძიების შეფარდების თაობაზე საქალაქო სასამართლოს მოსამართლე ლელა კალიჩენკომ იმსჯელა. 16 სეტემბერს რაგბის კავშირის შენობაში „შვიდკაცას“ ყოფილი კაპიტანი დაჭრეს. დაჭრის ფაქტზე რაგბის კავშირის ვიცეპრეზიდენტი მერაბ ბესელია დააკავეს. რაგბის კავშირის შენობაში მომხდარ ინციდენტთან დაკავშირებით შსს-მ გამოძიება იარაღის მართლსაწინააღმდეგო შეძენა-შენახვა-ტარებისა და სხეულის განზრახ ნაკლებად მძიმე დაზიანების ... ...
  • ქედის მუნიციპალიტეტის რამდენიმე სოფელში მეწყერი ჩამოწვაქედის მუნიციპალიტეტის რამდენიმე სოფელში, ძლიერი წვიმის შედეგად, მეწყერი ჩამოწვა. მიწის მასა საცხოვრებელ სახლებთან ახლოსაც ჩამოწვა. ადიდებულმა მდინარემ დააზიანა სავარგულები და წყალი სახლებშიც შევიდა. ამ დროისთვის სტიქიურ ზონებში შესაბამისი ტექნიკაა მობილიზებული და აღდგენითი სამუშაოები მიმდინარეობს. ქედის მერის ინფორმაციით, სიტუაცია მართვადია და მოსახლეობის ევაკუაციის საჭიროება არ არის. მეწყრული პროცესებია დოლოგანში, ზუნდაგაში, ბზუბზუში, ცხემნაში, დაბა ქედასა და ... ...
  • ბოკერიამ ძალიან სამართლიანად უთხრა „ქოცებს“ - კანდელაკიროგორც გუშინ გიგამ ძალიან სამართლიანად უთხრა ქოცებს - ჩვენს შორის ომის დროს ვინც გარბოდა იმის დედა ვატირე - "ევროპული საქართველოს" წევრი, გიორგი კანდელაკი, გიგა ბოკერიას გუშინდელ მიმართავს ეხმაურება ქართული ოცნების დეპუტატის, მიხეილ ყაველაშვილის მიმართ. გიორგი კანდელაკის თქმით, აგვისტოს ომის დროს ის ბრიტანეთში , დიპლომატიურ მისიაზე იმყოფებოდა და უცხოურ გავლენიან ტელევიზიებში რუსულ პროპაგანდას ებრძოდა. კანდელაკმა აღნიშნა, რომ ომის დროს რეგულარული ფრენებით დაბრუნება საქართველოში შეუძლებელი იყო, ამრიგად ლიეტუვური სამხედრო სატრანსპორტო თვითმფრინავით დაბრუნდა თბილისში და იმავე დღეს ოკუპირებულ გორში უცხოელ ჟურნალისტებთან  წავიდა სამუშაოდ. კანდელაკმა აღნიშნა, რომ გიგა ბოკერიამ ძალიან სამართლიანად მიმართა ქართულ ოცნებას შემდეგი ფრაზით -" ჩვენს შორის ომის დროს ვინც გარბოდა იმის დედა ვატირე!" „ისე მოხდა რომ 2008 წლის ომის დროს ლონდონში ვიყავი. რადგან მაშინდელი ელჩი გელა ჩარკვიანი შვებულებაში იყო, ხან მისი მოადგილე და შემდგომში საქართველოს ყველაზე წარმატებული ელჩი გაერთიანებულ სამეფოში გიორგი ბადრიძე და ხან მე, როგორც პარლამენტის წევრი, სიენენზე, ბიბისიზე და ალ ჯაზირაზე ხშირად გამოვდიოდით და ვებრძოდით რუსულ პროპაგანდას. "რადგან რეგულარული ფრენებით საქართველოში დაბრუნება უკვე შეუძლებელი იყო წავედი ლიტვაში სადაც შაულიაის ნატოს საჰაერო ბაზიდან, ლიტვური სამხედრო სატრანსპორტო თვითმფრინავით „სპარტანი“ დავბრუნდი თბილისში 14 აგვისტოს და იმავე დღეს წავედი ოკუპირებულ გორში უცხოელ ჟურნალისტებთან სამუშაოდ. ჰოდა მართლაც, როგორც გუშინ გიგამ ძალიან სამართლიანად უთხრა ქოცებს - ჩვენს შორის ომის დროს ვინც გარბოდა იმის დედა ვატირე!“ -განაცხადა გიორგი ... ...
  • წყალი მწყურვალისთვის ოთხას მეტრშია...შუახევის მუნიციპალიტეტის მაღალმთიანი   სოფელი ბუთურაული   სასმელი წყლის პრობლემის წინაშე დგას.  ღობეებზე, ერთი შეხედვით სასაცილო (სატირალი რომ არ იყოს), ფირნიშებს  შეხვდებით. „აქ სასმელი წყალი ფაქტიურად არაა.   და ეს იმ აჭარაში,  სადაც ჭარბი წყლის პრობლემაც  კი არის“, - გვწერს ჩვენი კოლეგა ზურა ... ...
  • საქართველოს რკინიგზის განცხადება ქუთაისში, უბედური შემთხვევის გამო თანამშრომლების დაღუპვის შესახებქუთაისში, თაბუკაშვილის ქუჩაზე მეცხრე ჩიხში მაღალი ძაბვის გადამცემი ხაზის საყრდენი კონსტრუქციის დემონტაჟის დროს მოხდა უბედური შემთხვევა _  გარდაიცვალა საქართველოს რკინიგზის ორი თანამშრომელი (ელენტრომონტიორები), დამწვრობა კი მიიღო ერთმა თანამშრომელმა (ასევე, ელექტრომონტიორი). „საქართველოს რკინიგზა“ მწუხარებას გამოთქვამს რკინიგზის თანამშრომლების გარდაცვალების ფაქტთან დაკავშირებით, უსამძიმრებს ოჯახებს და მაქსიმალურ თანადგომას აღმოუჩენს მათ. ამასთანავე, საქართველოს რკინიგზა განმარტავს, რომ პირველადი მოკვლევის შედეგების მიხედვით, სამუშაოების შესრულების დროს შრომის უსაფრთხოების პირობები სრულად იყო დაცული. სამუშაოების წარმოება წინასწარ იყო შეთანხმებული ელექტროგადამცემი ხაზის ტექნიკურ ოპერატორთან და ხაზი, რომლის აბონენტიც არა მხოლოდ საქართველოს რკინიგზაა, არც ერთ შემთხვევაში არ უნდა ყოფილიყო ძაბვის ქვეშ. ხაზის ძაბვის ქვეშ დადგომა არ წარმოადგენს საქართველოს რკინიგზის კომპეტენციას. შესაბამისად, კომპანია იმედოვნებს, რომ გამოძიებით დადგინდება მომხდარზე ობიექტური ჭეშმარიტება. რაც შეეხება, საქართველოს რკინიგზის კიდევ ერთ დაზარალებულ თანამშრომელს, მის მდგომარეობაზე ზრუნავს შესაბამისი სამედიცინო დაწესებულება და პროცესში სრულად არის ჩართული საქართველოს რკინიგზის სამედიცინო სამსახური. ... ...

არქივი

ტესტები

ტესტი _ ყველაზე, ყველაზე...

იცი თუ არა გეოგრაფია

ტესტი _ შენ და საქართველოს ისტორია

საქართველოს რომელი მეფე დასაჯეს სიკვდილით...

ტესტი _ რა იცი ჰოლივუდის ვარსკვლავების შესახებ

ლეონარდოს დი კაპრიოს სახელი ლეონარდო...

ტესტი _ რამდენად ერკვევი სხვადასხვა სფეროში

რომელია ყველაზე პატარა სახელმწიფო მსოფლიოში?

ტესტი _ რა გახსოვს სკოლიდან?

გამოქვაბულში ქვევიდან ზევით აღმართულ წარმონაქმნებს...

კარმიდამო ჩემი

დროა, მივეჩვიოთ ბუნებრივი რესურსების ეკონომიურად ხარჯვას

პლანეტის გლობალური კლიმატური ცვლილებები ბევრ...

როგორ მოვრწყოთ ვარდები _ ნუ გამოვიყენებთ სუფთა წყალს

ყვავილები, განსაკუთრებით, ვარდები, ყველას უყვარს....

ჩითილების მომზადება კოშტების და ნახერხის დახმარებით

ჩვენი გამოცდილი მეურნეები, სხვადასხვა ხალხურ...

რომელი მცენარეა ფშატი?

ჩვენი არა ერთი მკითხველის გვთხოვს,...

ხალხური მედიცინა დეზინფექციისთვის

სისუფთავის ხარისხი იქ, სადაც ადამიანი...

"საშობაო ლიქიორის" მომზადების ყველაზე შედეგიანი მეთოდი

ძალზე პოპულარული, "საშობაო ლიქიორის" მომზადების...

ყაბაყის ტორტი

საჭირო მასალა: ორი ცალი ყაბაყი,...

სტაფილოს სალათი ცერეცოთი

საჭირო მასალა: სამი ცალი სტაფილო,...

სოკოს სალათი შებოლილი ქათმის ხორცით

ეს უგემრიელესი სალათი უნდა მოვამზადოთ...